في هذه الحلقة ننتقل الى نعيم وخالته , طولنا من نعيم لان المغترب اخد مننا كتير لكن حنرجع للمغترب في الحلقات القادمة ليكشف لنا اسرار الاغتراب.
نعيم شايل السكر وماشي لخالتو وفي الطريق يفكر في حيلة لكشف انها صايمه ولا فاطره وبدأ يوسوس مع نفسو ويقول ياربي اعمل شنو ياخي انا مالي ومالها تصوم ولا تفطر كيف مالي لالا لازم اعرف لان رمضان ماشي مسحن ممكن يوم افطر ودا الحيحصل طيب بستفيد شنو؟ كيف بتستفيد شنو لما تكش انها فاطره وفي العمر دا بتكون ليك نظام حماية لما انت تفطر والله فكره لكن الحيله شنو احسن اعمليها كم قصة كدا واجيب ليك راسها .لالالالالا دي راسها ناشف والحيله ما بتنفع معاها ياربي يا ربي يا ربي اعمل شنو والله مافي حل غير اكضب عليها كم كضبه كدا واشوف البحصل شنو تاني لالالا الكضب حرام ولكن برضو هي فاطره برضو حرام انا ما معتبرو كضب بس نظام حيله.
نعيم دخل لبيت خالته وسلم السلام عليكم.
الخاله :- وعليكم السلاااااااااااام وينك يا ولد ليك كم ساعه انا منتظراك؟
الخاله :- بدور اسوي الموية من اسا لان التلاجه بتاعتنا ما بتبرد سريع
نعيم :- موية ولا عكاره قالوا العكارة ما بتتعرف يعني البشوفك بقول بتلخي ليك في عجين
الخاله:- عكارة شنو يعكر دمك بركة شيخي الامين سيد القبب.
نعيم :- انتي عارفه انا اتاخرت لشنو .
الخاله : ما قلت زحمة .
نعيم :- مافي زحمة ولا حاجه اسا انتي بتصدقي تكون في زحمة في دكان حاج علي
الخاله:- كيفن ما بصدق الناس كلها بتجر من حاج علي وهو غير الجروره باقيلك بشتغل اها قول الاخرك شنو؟
نعيم :- والله بدت تقع براها اها الليليه ببقى مؤلف عديل كدا. اها ما قلت ليك قالوا في واحده اخر الحله طلقوها.
الخاله :- اجي اجي دي منو دي .
نعيم :- ما عارف لكن سامع النسوان في الدكان بتكلمن قالوا طلقوها بالتلاته يعني بلا رجعه
الخاله :- والسبب شنو؟
نعيم :- قالوا كانت فاطره بالدس من زوجها
الخاله :- ممكن عندها عزر؟
نعيم :- زوجها عارفها قال ما عندها حاجه قامت من الصباح واتلاهمت الشاي والموية قالوا طبعها كدا متجرسه خلاص.الناس اتدخلت وقالوا لزوجها ياخي كان تستر الولية دي قال ليهم هي فاطره وكمان بتكضب لو اعترفت من الاول ما فيها حاجه .
الخاله :- والله رجال الزمن ديل دايرين ليهم سبب ساي.
نعيم :- والله ما من الرجال منكن انتن براكن بتسونها في نفسكن اسا لو اعترفت فيها شنو كان تكلمو تقول ليهو انا فاطره؟
الخاله :- ولشنو تكلمو
نعيم :- لو عارفها فاطره كان بشغلها في البيت اكتر لكن انا سمعت انو قام من الصباح ملأ الازيار ودخل العناقريب قال احسن يساعدها لان اليوم شكلو حيكون سخن وكل ما يقول ليها اعملي حاجه تقول ليهو صايمه وفي النهاية كشف ليك اللعبة بتاعتها واداها تلاته طلقات بلا رجعه.
الخاله :- والله متحيل ساي الراجل دا نعيم :- يا خاله احسن تعترفي ساي لو فاطره.
نعيم :- والله ما طمني نفسك ساي انا بقول ليك لو يعني حصل يوم دايره تفطري كلمي ناس البيت او كلمي راجلك.
الخاله :- انت بتلف وتدور مالك ؟
نعيم :- لا مافي حاجه
نعيم والله الكلام دا شكلو خافت منو لكن برضو ما اعترفت من الاحسن امشي افتش الروب الداساهو مني واشوف لي حيلة تاني . بس لقيتها النعمل فيها شايف لي فار واقوم افتش الحلل والكورات ديل اشوف كان ما لقيت الروب بتكون فاطره وكان لقيتها فاطره طوالي بفطر .
نعيم :- زحي زحي زحي يا خاله.
الخاله :- مالك يا جنا؟
نعيم :- فار كبير
الخاله :- ما عندنا فيران غيرك
نعيم بدا يفتح في الدواليب وتحت العناقريب وفوق الرفوف حتى المشلعيب حصلو ما فضل محل ما فتشو
الخاله :- يا جنا حيرتني والله فار شنو البتفتش ليهو قلبت علي المكان كلو
نعيم:- الفار دا جقر كبير قالوا بسمم كان ما لقيتو الليله ما برتاح كدي افتحي لي التلاجه دي
الخاله :- والله قصتك عجيبه فار شنو البخش التلاجه
نعيم :- هو بخش البطن غالبو يخش التلاجه ( طبعاً قاصد الروب )
نعيم فتش حتى التلاجه ما لقى حاجه قال احسن يسالها ساي عن الروب الجابتو الصباح من دكان حاج علي
نعيم :- يا خاله خليك واضحه معاي انا ريقي نشف وتعبت خلاص في النهاية كدا بسال من الروب الجبتيهو الصباح من الدكان وكان شربتيهو وفطرتي انا زاتي بفطر لانك انتي الكبيره لما تكوني فاطره نحن الصغار برضو بنفطر لانا اتعلمنا ما ناكل قبل الناس الكبار والناس الكبار لما يكونوا فاطرين برضو بنفطر اها رايك شنو؟
الخاله مسكت المقشاشه وادت نعيم جلده عمرو ما ضاق زيها ومسكتو من اضنينو وطلعتو في راس التكل وقالت ليهو:- شوف الفوق داك شنو
نعيم :- فكيني خلاص شفت دي حله
الخاله :- افتش الحله شوف فيها شنو؟
نعيم :- فيها روب لكن خاتاهو فوق راس التكل لشنو؟
الخاله :- عشان يروب اصلو جبتو فطير الصباح وقلت اختو في الشمش شوية.
هنا نعيم اكتشف انو خالتو ما شربت الروب وان حاج علي غش عليهو عشان يزحلقو لان نعيم كلامو ما بندار كلامو كلو في الاكل والشراب والدنيا رمضان
بعد ما نعيم ادوهو دقه جامده فك البيرق ومسك العراقي في سنونو وبدا يطنطن .....اسا انا كان ما ساي بصدق حاج علي وانا عارف خالتي دي من غير رمضان بتصوم لكن تقولوا شنو اها اودي وشي وين منها وانا زاتي شقيان شقاوه عجيبه البوديني ليها شنو؟ لكن البيت ما بتقعد مع اخواني المشلضمين ديل والله كان قعدت دقيقه في البيت الا افطر والمشكله الكبيره في جيرانا الليل والنهار ريحة الاكل طاقه وخليهم جيرانا دا الفريق كلو شغال يسوي في الاكل في البعملوا في البليله وفي البحمروا في البصله وحاجات كتيره تخلي المصارين ادقشن انا ما عارف امشي وين زاتو , حقو امشي اشاكل عمكم حاج علي لالا بكرة رمضان بمشي وبجي اشيل منو الطحنية والبيبسي احسن اعمل معاهو صحبه , والله الصحبه معاهو ما نافعه غير المراسيل ما عندو حاجه كدي النمشي اقعد معاهو شويه .
نعيم :- السلام عليك يا حاج علي الكضاب
حاج علي :- انا كضاب يا مسخوت انا متل ابوك
نعيم :- والله ابوي ما كضاب زيك
حاج علي :- مالك زعلان وعراقيك مشرط كدا انت يا نعيم خلاص كبرت وبقيت راجل مافي داعي للمشاكل اسا الدقاك منو نعيم:- نعيم مافي زول دقه دقه روحو برا شنو يعني الدقاني منو دقيتني انت بي كضبك دا تقول لي امشي شوف خالتك فاطره
حاج علي :- ما علينا كدي تعال ادينا كضم كضمين خلينا نكسر الوقت الطويل دا
اثناء الحوار البينهم بنات الفريق ملن الدكان وقعدن يشترن ويتكلمن بصوت عالي
زينب :- يا حاج علي دايره لي صابونة وش.
حاج علي:- والله وشك دا ما ببقى ابيض كان سكنتي في المصنع زاتو هاكي لكن داير حقي كااااش
علويه:- هاك يا حاج علي اديني انا فازلين.
حاج علي :- الفازلين شن بدوريبو كركاركم كمل خلاص ؟
فاطنه :- اديني يا حاج انا مستعجله
حاج علي :- اها انتي دايره شنو؟
فاطنه :- بدور مشط كبير.
حاج علي :- زمان بتسرحي بخلال اخوك ابتفه الليله جيتي دايره مشط
حليمه :- دايره لي سفنجه مقاس 12
حاج علي :- مقاسك عارفو و12 ما بقضيك الا تتميهو بي بالنعال القديمه وين البرطوش بتاعك و الزوزو و الشده البتمرقي بيهن للبكيات
طبعاً نعيم راسو ضرب اسمع يا حاج علي الحكاية شنو بكرة العيد ولا شنو
حاج علي :- عندهن غرض وانا عارفو.
نعيم :- والله حكاية عجيبه بنات الحله جت لافات بي جاي ولا بسات الملون شئ اخدر وشئ احمر وشئ اصفر زي التقول في مولد يا حاج علي فهمنا الحاصل شنو الليله نضيفات ساي وبشترن في الصابون والمشط والنعلات والفازلين يا حليل كركانا الصافي ويا حليل الودك المافي اسا الودك دا احسن منو في يا حاج ولا الكركار الريحتو تشمها من بداية الفريق يا حليل زمنكم يا حاج اها قول لي الحاصل شنو؟
حاج علي :- انت ما عارف؟
نعيم :- اول مره اكون مسطح الدقه حاره خلتني ما بفكر زاتو
حاج علي :- انت ما عارف ود ام زين جا من الخارج؟
نعيم :.- عارفو لكن لي شنو البنات ديل بتلبسن كدا
حاج علي :- ههههههههه عييييك يا نعيم الجنا قالوا داير يعرس عشان كدا البنات بتسمحن وبمشن يلمن عليهو
ننتقل لبيت ام زين لنشوف لمة البنوت هناك وكيف حيقابلن المغترب.
ام زين :- اها يا ولدي تم لينا الحكاية كيف وصلت هناك وان شاء الله تكون زرت بيت الله وزرت قبر الرسول صلى الله عليه وسلم
المغترب:- يمه اصبري بتم ليك لكن شوية شويه يمه من جيت ما قادر ارتاح خلاص بعدين اسا انا سامع لي صوت ناس ما شيين علينا
ام زين :- اآآي ديل بنوت الفريق اتلمن وجنك يسلمن عليك خليك نجيض واختار ليك واحده فيهن وما شاء الله عليهن نجيضات عواسات وفراكات الواحده تلقاها قاعده في المنقد من الصباح تسوي الشاي والفطور وتسوي قهوة الضحوية وتسوي ملاح الغداء وتغسل ما شاء الله لا بتكل ولا بتمل اذا انت ما بتعرف تختار انا بختار ليك لكن بختار ليك المواصفات البتنفع معانا
المغترب:- يمه اسكتي اسكتي البنات داخلات علينا.
ام زين :- اتفضلن يا بنوت خشن لي جوه تعالن سلمن علي الولد قاعد بي جاي
زينب :- ازيك حمدا لله على سلامتك
المغترب :- الله يسلمك لكن ما عرفتك
زينب:- انا زينب جارتكم اخت احمد
المغترب :- ما شاء الله كبرتي وبقيتي عروس والله خليتكم صغار بتلعبن بام لعاب وبالكار وبي اركه عميه اتفضلي خشي لي جوة
حليمه :- ازيك ان شاء الله تكون عرفتني؟
المغترب :- ما عرفتك والله انتي هيل منو؟
حليمه :- انا بت حاجه عشه نسيتني ولا شنو نسيت لما كنت بدقنا .
المغترب :- والله كبرتن خلاص .
طبعاً بنات الفريق كلهن اتلمن ويعرفن في اساميهن واحده ورا واحده ويبحلقن ويتكلمن تحت تحت...ما شاء الله عليهو سفتنو جا كيف لونو دا اتغير ما شفتي كلامو غريب شويه يا خيتي ديل المغتربين زي حلاوة قطن اسي بهبد اديهو يوم يومين
وهكذا استمرن بنات الحله في تبادل السلام والنظرات والبسمات مع الود المغترب وكل واحده تمني نفسها بان يتقدم لها ويخطبها وكل واحده بدأت تسرح وتتخيل منظر الغربه ومنظر يديها مليانات بالدهب ومنظرها وهي راكبه البرادو وماسكه اخر الموديلات في الموبايلات وتتونس طول اليوم مع صاحباتها وتتخيل لما تتصل على برامج التلفزيون البتتكلم عن الغربه .
المهم البنات بقن في وادي تاني لما جات حاجه عشه داخله سلمت على الود وتبكي وتقول ازيك يا حشاي يطب عملك بركة الجيت وبردت حشى امك ازيك وازي الاولاد المعاك ان شاء الله كلهم يكونوا كويسين ان شاء الله جبت لينا معاك بن وهبهان وقرفه واهم حاجه يا ولدي ان شاء الله تكون جبت لي معاك دوا العقارب والله العقارب دي منجضانه نجوضيه محل ما تمش تقرصك وانتي عارفني بقوم من الدقش بمش اولع اللدايه واشد الشاي واسوي اللقمه بملاح الويكاب لي عمك كل يوم طاقاني واحده منشفه ريقي البركه في رمضان دا خلاني ما بوقد المنقد من الدقش الا لما تطلع الشمش اقوم اعمل الشاي لجنيات بت عمك وتواصل حاجه عشه في السؤال عن اولاد الحله ... اها قول لينا الجنيات الهناك والعقب خليتم كيف؟
نعيم :- يازول انا كل ما يجي مغترب بمشي اسمع في حكاويهم يكضبوا ساي
المغترب :- القال ليك منو بنكضب.
نعيم :- ههههههههههه ما سمعت بقصة ود الحاج ؟
المغترب:- مالو كمان ود الحاج
نعيم :- جا من السفر هاك يا جلابية بيضاء ومكويه وهاك يالشال الما بنشال وهاك يالساعه السيكو لماعه والريحه طاقه من بداية الحله والبنات يتجارن ملاحقاتنوا من شارع لي شارع وكان شفت الموبايل يغني ساي( التشتش حلاوة لبن ) بقى نضم ناس الحله ود الحاج رفع الفاتحه ود الحاج مشى واجب ود الطهور ود الحاج مشى لعرس هناية ود الحاج مشى يسلم على خديجه المحبوسه من شافوهوا ناس الحله الزول منجخ تب قالوا الجنا بدور يعرس وطلقوا الاشاعه اها ود الحاج سمع بالاشاعه قال احسن ابقيها حقيقه وقال داير يخطب بقى لافي بالاعراس وبنات الحله يغنن فيهو ...ااااي سمح انت وسمح انت ااااي سمح انت وجلابيتك ااااي سمح انت وطاقيتك اااي دا ود الحاج اااي عدل لينا المزاج ...................ما خلوا اغنية ما غنوها ليهو اها بي تحت تحت مشى قال يخطب اسمح واحده في الحله مشى لناس ابقيقه خطب بتهم هو ما بدقس وقع في الحتة الملاينه قروش ابقيقة دا قروشو محل يوديها غالباهو المغترب :- اها ادوهو البنت ؟ ودفع كم؟
نعيم :- ادوهو البت لكن ما دفع ولا بصله قال ليهم العربية في المينا والقروش في البنك والبنك مقفل وانا مستعجل بدور ارجع وعندي هناك قروش وعربات ومحلات كبيره .
المغترب :- اها اتزوج البنية؟
نعيم :- والله مسكينه اتزوجها ولما جا مسافر بقى يدين في حق السفر لكن الناس جات ملتوا قروش اي واحد جا يدينو عشان يديها ليهم بالدبل وفرد طفشه لي يوم الليله ما ظهر والبت كايسه الطلاق
المغترب:- والله لو بتصدق واقعين في الكسره والعصيده بالويكه بس
نعيم :- هههههههههههه دي علينا والجضيمات ديل جبتهن من وين؟
المغترب :- انت مصدق كلام الناس البجوا هنا ويكضبوا والله واقعين الكسره وبنمشي ليها مسافات وبعد دا ما بنلقاها
نعيم :- والله اي واحد يجي يقعد يكضب لينا يعني ما شفت المكرفس؟
المغترب :- والله مره في الاسبوع اقول ليك نحن ويكتنا وكسرتنا ما بنفارقن ليوم الدين .
نعيم :- لكن كسرتنا مافي زيها طاعمه وسمحه وكمان لو خمجتها بطماطم وزيت سمسم تتمنى ما تكمل منك والعجيب لو قرشت معاها بصلايه يااااااااااااااااااااه والله جوعتنا خلاص واليوم قرب يخلص اها يا خوي فتك بعافيه انا بمشي البيت الفطور قرب تلقى امي منتظراني وانا البقول ليها تسوي لينا شنو في الفطور مع السلامه.
ننتقل لبيت نعيم الذي بدت منو قصتنا طبعاً وقت الفطور قرب وصاحبنا لسا ما شرف البيت والكل في انتظاره لان البيت من دون نعيم ما يسوى شئ لانو الود النكته والود الجرسه وكل شئ في البيت واضيف على كدا انو ود خدوم جداً ما يلقى حيطه واقعه ولا بيت صابي في المطر الا قام بتصليحه.
اخوان نعيم :- والله تلقيهو بشمشم بالحيط الوقت دا ناس الحله جت بعملوا في الاكل والريحة بتريحوا شويه احسن من يجينا ويقعد يضارب فينا التقول اسمنا رمضان يا يمه كدي اصبري والله بجي اسا ما تشفقي نحن سامعين لينا صوت زي الطياره ياربي دا شنو وااااااااااااي
اعزائي الاكارم لكم مني اطيب تحية لكل من شارك بالرد او قرأ هذه اليوميات واحب اوضح بان هذه اليوميات وليدة لحظة كتابتها يعني بكتبها وقتي بدون تفكير واعتزر اذا اخطأت في شئ او جرحت حد بدون قصد واتمنى ايضاً ان تقيموا لي هذه اليوميات .
مع خالص شكري وكل عام وانتم بخير انتظرونا العام القادم
خلاااااااااااااااص من هسع الجرسة بدت
هااا جن خت الرحمن في قلبك وخلي الصوم
يدخل العضم وبعدين التجرس علي راحتك
كاااااااااااااااك
هلا بالنعيم جرسة ومنتظرين
