حلمنتيش: لاقيتو في المسنجر

[asool22]

[align=center]حلمنتيش: لاقيتو في المسنجر



لاقيتو فى الماسنجر
خلانى زول كسمبر
كتبت ليه رسالة
وعملت ليها إنتر
أدانى كلمة حلوة
تكتل قليب عنتر
قال لى سمح حديسك
ينقط عسل وسكر
قُت ليه عايز أشوفك
قال لى بلاش تهظر
أنا مابشوفنى زولن
فى الكى بورد يفرفر
أنا بت جميلة خالص
بدور لى زول غضنفر
كدى رسل لى صورتك
بعدين براي بقرر
كتلت قليبى خالس
واحساسي صار مدمر
رسلت ليها صورة
شينة وكمان مصنقر
وقعدت راجى كلمة
من الحليوة سكر
وانا فى قليبي راسم
صورة الدهب مجمر
واحساسي بى جمالها
زى مدفعن معمر
جاني الخبر صقعني
بلوك فظيع مدمر
ومن يومي داك أفتش
فى كل ايميل ماسنجر
وما لقيت غير هامر
فى الحوش قاعد فى بنبر
شين شناتو مرة
زى مرفعين فى بربر
ما بكوس غير المشاكل
وبين السطور بيهظر
مديدة حارقاني
وفى الشكل بيحرر
ومازلت كل يوم أحلم
أن الحبيبة تغفر
لو مرة بس تقول هاي
وترجعني للماسنجر

تحياتي::[/align][/size]

[asool22]

[align=center]هذه قصيدة حلمنتيشية عن الغربة أتمنى أن تنال رضاكم


يا غربة يا غشاشـه يـا بكايـة يـا مستهبلـة
تغرينـا بدرهـم قـروش ولا قنـطـار بهـدلـه
جيناك بس نقصد سنه وحاجاتنا ناقصـه نكملـه
نبني البيوت في العاصمه نفـرش أثاثـه نجملـه
وكورلا حاره نرسله أصلو النقـل صـار مشكلـه
ونكمل الدين بي مهل والسمحه جاهـزه نحصلـه
غير القـروش اللاهـل عبـر الشهـور بنرسلـه
والباقي يدخل في البنوك ونشـوف دينـا نشغلـه
لكن حساباتنـا الغلـط فـي كـل عـام بنرحـل
مـرة سنـه مـن عمرنـا بنعدهـا ونفصـلـه
والحسبه وصلت طاشرات يمكن نعيـش ونعدلـه
لكن تعال نحاسبك يا وهم من غير رقم أو أمثلـه
كان للقروش نجري ونحوش لكن تقول بنشاكلـه
ما راضيه تقعد في الجيوب وتقول حرامي وبينشله
لكن بتقعد في الضهـور بديـون تقيلـه مقيلـه
كملانه ما بتقضي الغرض وأقـل حاجـه تكملـه
كملانه بي مطار وحق وزن ومجاملات مستعجلـه
ضرائب أبو عاج المشى وإلزامي حمـدي نحولـه
أحلامنا فيك صبحت سراب نمشي ونجر ما نحصله
زله ومهانه وإحتقـار خلـو النفـوس متململـه
سجن كبير فيـه الكفيـل سجـان قيـوده مكبلـه
وبقينا زي كيمان لحـم جـوه الهـدوم متكومـه
وأكيـد أكـل المعلـب والكندشـه ليهـم صلـه
مصران وقرحه وإكتئاب مرض القلب ووجع الكلى
لكن أريت هم القروش يا غربه فيك هو المشكلـه
سجن العيال جـوه الشقـق ولا فـراق العائلـه
جيب العيال بجيبنا مال وجيوبنـا غيـره مميلـه
تلقى الولد غالبوا الكـلام والبـت كبيـره مريلـه
كل المشاكل جاتهم سوا ما قدرنا أصلـوا نغيـره
لكن خلاص هان الخلاص عدك نزل مهمـا عـلا
يا غربه أدينـاك كتيـر أدينـا خاطـرك يسهلـه
خلينا نرجـع بالفضـل نلحـق حياتنـا نواصلـه
يا غربه يا غشاشـه يـا بكايـه يـا مستهبلـه[/align][/size]

[asool22]

[align=center]الكشه في جده
من بورسودان
قطع التذاكر للسفر
الود خلاص قال اغترب
كبّا الهموم فى راسو كبْ
هم للعرس
هم للقرش
هم للملابس والدهبْ
( بتَّ الحلال) قالتلو يا زولي الحبيب
والحاجة قالت ( يا مجيب)
نجّيهو لىْ من كلو (جيب)
والود كمان شال الدُعا
يا ربى يّسر لى سبب
***
قطع البحر
لا فى الهبايب والخطرْ
لمّن وصل ( جّدة) بسلامْ
وقتو الوصل . من تاني قام شال الدُعا
يا كاشف الشر والكُرَبْ
نجيّني من (جِيب ) العرب
(جيب) النصايب والتّعب
و (الكشّه) والحظ الكَعَبْ
والناس تهاتي (الكشّه) جات
(الكشّه) راحت بى هناك
(الجيب) ظهر فوق الدَّرِبْ
الزول خلاص قلبو اضطرب
عقلو انشطب
فكر وحاول فى مفرْ
(لوحات حُمُر) فى السّكه
زى لمبات خطر
داقش يمين داقس شمال
لمّن وقع فوق المطب فى (باخشب)
قام خابى خب
خاف السؤال
(وين الهوّيه) سؤال صعب
يرميكا فى ساعة غضب
من جدّه لمن (ديم عرب)[/align]

[بت أبوظبي]

رائع .. رائع
جميل جدا يا عسول
ويديك ألف عافيه

[asool22]

[align=center]مشكووووورهـ اختي بت ابوظبي على المروووور

ويــــــديـــــكــ الــعــــــــــــافيــــهـ[/align]

[waya]

جميلة منك يا عسوووووووووووووول

[ملك الشمارات]

يسلموووووو يا عسووووووووووووول

[بسمة الحياة]

حلمنتيش اكتر من رائع

ولي قدام

[عاشقة توتيل]

[align=center]يديك العافيه ياعسول،،،
،،،
الله يقطع الغربه،،وسنين الغربه،،،
بتاخد منك كل شيء،،
وتجي راجع من بره محتاج إعادة تأهيل،،،
،،
،،[/align][/u][/size]