فول السودان العظيم

[asool22]

[align=center]فول السودان العظيم
--------------------------------------

السلام عليكم ياخوانى
البوست ده عجبنى شديد وقلت لازم انقلو ليكم



حبيب الشعب
لينا معاهو قصة ريد غريبة خلاص
وده الفول ياجماعة بالواضح كده يعنى ما خدرة دقاقة ولاعيون براقة ولا قوام فان باستن
وحبيبنا الفول ده ياناس حكايتو مع الشعب السودانى حكاية علاقة ابدية من تصبح لامن تمسى
فطور وعشا وما احلاهو صحن الفول المدنكل والمصلح ( صاح ) على الطريقة السودانية البحتة
وانا زاتى ماعارف الفول ده سموهو فول مصرى ليه صحى اخوانا المصريين بياكلوه لكين مااعتقد
بيعزوه ويدلعوه زينا وهاك يازيت السمسم والطحينة والجرجير والجبنة اهم حاجة
زمان عبد المنعم عثمان قالا فى محطة التلفزيون الاهلية وكان بيمثل دور زول مسافر
بره السودان ولمن جا راجع مشى الدكان وقال لى سيد الدكان عايز لى جبنة اكسرا كده كده
طبعا الفول فى ناس ما لاقينو فى الايام العلينا دى لكين زمان برضو كان فى ناس بكجنو الفول
وبقولو ليهو ( كل يوم معانا ) بس ما بعرفوا قيمتو وزى ما قال الطيب عبد الله مسكينة المحبة تمشى
لى ناس ما بتقدر
والفول فى السودان افوال يعنى بتاع الناصية فى اخر الشارع مازى فول عمك ابو العباس والعشرة
الكرام ولا فول الحرزاوى فى الصحافة شرق بطعم فول عبد الوهاب فى نمرة تلاتة اما فول الثورة
فهو بنكهة خاصة وما بشبه فول الصبابى ولا الشعبية بحرى وياهو ده ياجماعة سر جمال الفول
وديمقراطية حبيب الشعب البيرضى الناس كلهم
وياخوانا انا هسى ده متعشى فول وبكره اكان الله ادانا عمر ناوى عليهو والحمد لله
وياجماعة الفول ده ما ساهل لانوا من عناصر القوة البشرية ومصدر من مصادر الطاقة
وبما ان جزء كبير من هذا الفضاء الاسفيرى قد لا يجد اصحابه ( الفول المدنكل ) فان المجال مفتوح
لمن يريد التعبير عن مشاعره الحميمة تجاه الفول او حتى زكرياته الاليمة مع ذلك الكائن ابوعين كحيلة
بعد ان تحول من كائن فولاوى الى ( ماكدونالدزى ) او بيتزاوى هوت دوجاوى[/align][/color]

[السقا]

الاخ عسول لك التحية ..
والله حقيقي الفول عندو معزة خاصة
ورغم انو الواحد ما كان بيفارق الفول وحتي لمن يدور
يغير بياكل فتة وما بيفارقوالا مجبور لكن برضو
ما زهج منو ولمن اتغربنا كمان زاد شوقنا ليهو ..
لكن البركة في مطاعم الريان ..ولمة السودانيين بالزات
ايام الخميس ..يديك احساس
انك في واحد من مطاعم السودان اللذيذه .. ونفس الطقوس
العجيبة الفول المصلح ..زيت وجبنة وسلطة وطعمية ..
والعجب العجاب الفتة ...انا هسع جعت رغم اني اتغديت قبل
شوية ..
لك التحية والله رجعتني لي ايام جميلة جدا ..قاتل الله الغربة ..

[البادرابي]

ما تتخيلي نححنا هنا فاقدنو كيف اتخيلو لمن يكون في فول بتعزم كل الشباب تعالو علينا الليله جايبين فول من السودان .............اليوم داك زي ما تكون في مناسبة سعيده بجتمعو فيها كل الناس ............الكل في انتظار الفول ...............................واي زول جاي من السودان اول وصيه ليه جيب معاك فول و جبنة
اتخيلو حتى الجبنة نحنا ما عندنا ...وما عندنا مطاعم زي مطاعم الريان فيها فول الا تنتظر زول جاي من السودان عشان اجيب فول جبنة
تحتياتي لك

[asool22]

الاخ السقا والاخ البادرابي مشكورين على المرور

[متين نرجع]

والله حقيقي الفول عندو معزة خاصة
ورغم انو الواحد ما كان بيفارق الفول وحتي لمن يدور
يغير بياكل فتة وما بيفارقوالا مجبور لكن برضو
ما زهج منو ولمن اتغربنا كمان زاد شوقنا ليهو ..
واتفضل معانا
هع هع هع

[سوداني]

رهيب
****
يا حبيب الشعب يا إنتاج بلادي
الله ما أحلاك بالجبنة والزبادي
فيك سحر غير عادي
إنت القدر والحبيب
رهيب والله رهيب
في مناسباتنا العديدة
دايما مشكل حضور
في السمايات والمآتم
في العرس والطهور
يا الكل يوم معانا
في العشا والفطور
عنك ما بنتخلى
إنت القسمة والنصيب
رهيب والله رهيب
نحن البيك همنا
وإنت سبب أذانا
في البيت والمطاعم
شايلين الصحانة
يا الساقينا موية
في الشتاء والسخانة
يا مسمار بطننا
يا أجمل حبيب
***
يا ود عم الفاليوم
وجودك مهم في البيت
في كل المحافل
أصبحت ذايع الصيت
الله ما أحلاك بالبصل والزيت
من ما ناكلك إنت
نكوس العنقريب
----
رهيب والله رهيب
أصلي ولد بلدنا
ماجابوك بالمطار
فيك فيتامين مغذي
زي السمك والخضار
وحاتك إنت طاعم
لو بالملح والشمار
إن شاء الله تكون فطورنا
في الجنة أم همبريب
رهيب والله رهيب

[asool22]

[align=center]مشكوووووورين على المرووووووووور اخووووووواني[/align][/size]