ست الودع ...

[بت السرف]

ست الودع ...

ست الودع.. ارمى الودع..

لى كشكشى .. كدا كشكشى ..

شوفى لى كان فيه شئ ..

وامنية زى عصفورة تحلق وهى ترقص وتتمايل زى فريع البان ..

وانا واقفة .. على باب غرفة الداخلية اعاين ..

واذ بامنية تلتفت على .. وتنادى ..

جيتى يا السمحة .. عليك الله اكان ترقصى لينا ..

هههههههه ضحكت انا .. قايلانى زيك رقاصة ..

لا لا لا .. انا جيت اشيل لى t وامشى ..

عندى محاضرة رسم بعد نص ساعة .

امام اصرار امنية دخلت نص الدائرة ..

وغنن لى البنات ...

فريع البان انثنى .. الله يعلم ليه انثنى ..

الله يعلم انا ما جنيت .. وفى الصحارى الفوق ديل مشيت ..

فى الصحارى الفوق ديل مشيت ..

غير حبك انا ما هويت .. انا !!!

وانا اتخيلت نفسى فريع البان واتمايلت بخفة ..

و.......

الليلة المحاضرة ؟؟

ادونى الــــ t.. وجريت ..

[بت السرف]

فى اثناء المحاضرة مرت بخاطرى امنية ..

فتاة زى الورد وانضر ..

ما اروعها .. احبها من كل قلبي ..

تنادينى بــــ السمحة ..

اعرف انى سمحة .. لكن فى نظر امنية ..

احلى من السماحة زاتها ..

بس هى السماحة مجسمة فيها ..لولا غموض يكتنفها ..

ولا تبوح باسرارها لاحد ..ولذلك احترمتها واحببتها ..

فكنت الاقرب اليها ..رغم انها ليست من دفعتى ولا مجالى الدراسى ..

[بت السرف]

هى فى قسم الترجمه واللغات ..من بنات الشرق تحديدا بورتسودان ..

لونها اسمر فاتح تشوبه حمرة محببة وشعر اسود زى الليل ..يسترسل حتى اسفل ظهرها ..

جسمها ممتلئ نوعا ما ..رشيقة جدا وحركتها خفيفة ..

عندما اسألها عن سر رشاقتها ؟؟

تضحك ..

تقول .. هو قالو ليك رقيص العروس دة ليوم العرس يعنى ؟؟

لا يا السمحة ..دة رياضة تحافظى بيها على رشاقتك ولياقتك .

اضحك ..عشان كدة انتى رقاصة ..

ترد على .. انت زاتك رقاصة ماشاءالله عليك .

ياستى انا برقص ديسكو والهيب هوب بعجبنى..

الا رقيصك دة غلبنى ..

ونضحك ...

[بت السرف]

دائما التقيها فى الداخلية ..

والداخلية قريبة من الجامعه ..

امنية لا تحب الجلوس فى الجامعة بعد المحاضرات ..مجرد ماتخلص محاضراتها بترجع الداخلية على طول ..

كانت ترفض عروض الشباب والحب بأدب جم ..

الكل كان يحبها وعايزها وهى تمانع وترفض حتى ان تستمع لاحد..

كل الواسطات فشلت فى ان تفتح قلبها لاى من الشباب .. ولكن ..

الشائعات بدأت تطاردها .. مرة مشوكشة ..

ومرة بتحب شاب من جامعة تانية .. ومرة ومرة ......

لم اكن اهتم بما يقال حولها ..بل كانت تجمعنى بيها دائرةالرقص اغلب الاوقات التى اراها فيها فى الداخلية ..

ومنها اجدت خطوات رقص كانت صعبة على ..

بحكم انى سمينة شوية ..

لكن مع امنية بدأت الرشاقة تعرف خطواتى ..

كنت خفيفة مع امنية فى الدائرة ..

وعندما نرقص الديسكو كنت اضحك عليها ..

لما يغلبها .. لكن كانت ليونتها وخطواتها الرشيقة تساعدها واتقنته بصورة مذهلة .

[بت السرف]

عندما حانت فترة راحة بعد المحاضرة .. اعتذر المحاضر عن اكمال المحاضرة ..

وحدد رسم منظور مع عمل بلان والتسليم بمجرد الانتهاء من الرسم .

رسمت سريع حتى الحق بالرقص فى الداخلية ..

وبما انو مافيش محاضرة معناها عندى ساعتين

وخصوصا ناس ترجمه اليوم اوووف..

رسمت سريع وسلمت اوراقى وجريت على الداخلية ..

امنية كانت بتعلم فى رنا خطوات رقص معين ..

وجيت داخلة تووووش فى نص الدائرة ..

وينو ياناس هلالكم .. انا هلالى هداك ظهر ..

بطلت سهر الليل انا .. وبقيت انوم بدرى انا ..

مناى احلم بيك انا .. فى ليلة القدرِ انا ..

انا ادرى بحالو انا .. انا اعرف احوالو انا ..

تلاتة اربعة خمسة .. اليوم بقى لى شهر ..

وينو ياناس هلالكم .. انا هلالى هداك ظهر ..

وامنية تشبك ايديها وترفعهم عاليا كمن تخبرنا هنداك هلالى ..

وانا اتابع خطواتها ..

[بت السرف]

طلبت سهام ان نهجج شوية بأغانى الزار ..

واحضرت ورق مقوى لفته زى الطربوش ..

لفحت لى توب واتحزمت بيه ..

وبدأت الأغنية ..

قول قولك .. يابشير قول قولك ..

وبدأت امنية ترقص بلا وعى .. انسحبت انا من الدائرة ..

امنية لم تكن تعى بنفسها .. قلبي اكلنى شديد ..

كانت كمن تتوجع .. او احدهم يتحكم فى جسدها ..

وكنت احاول اسكت البنات اللائى اصبح غناهن هستيرى ..

لكن شئ ما كان يمنعنى ..

احسست ان امنية ستقع .. دخلت الدائرة وامسكتها من نصها ..

والبنات لازلن يغنن ..

يللا يامسافر .. يللا قوووم سافر ..

يللا يامسافر .. يللا قوووم سافر ..

ترتررب .. امنية وقعت على الارض ..

حضنتها قبل ان تصل الارض ..ووقعنا سواا ..

موية ياجماعة موية .. كنت اصرخ ..

اسقيتها امنية .. كانت كمن قطع صحراء شاسعة

وتشعر بالعطش الشديييد ..

قرروا البنات انو الحصل دة من الارهاق ..

امنية الليلة رقصت كتير !!!

[بت السرف]

قعدت معاها والكل تفرق لحالو ..

عاينت لى .. انتى يالسمحة ماعندك محاضرة ؟؟

هههههههه ضحكت انا .. لا المحاضر اعتذر

الله جابنى ليك عشان امسكك..

الليلة كان وقعتى واتظلطى ياشينة ..

وضحكنا معا ..

وتحدثنا فى امور شتى دون ان نتطرق لما حدث اثناء الرقص ..

احترمت صمتها ..

وعاينت للساعة .. يللا ياستى .. عندى محاضرة ..

ومنها على البيت نتلاقى باكر ان الله احيانا ..

ومشيت وراسى يودى ويجيب .

[font=&quot] [/font]

[بت السرف]

الليلة عندى اوووف من الجامعة .. لكن عندى بحث تكميلى لازم اخلصو .

صحيت متاخرة .. وقررت امشى الجامعة

اليوم دة كلو حيكون فى المكتبة لازم اخلص البحث دة اليوم ..

فى المكتبة كان يجلس قبالتى شاب لم انتبه له..

عندما رفعت عيني .. مرر ورقة صغيرة امامى !

مكتوب فيها ..

لو سمحتى عايزك فى كلمة ..

بخصوص امنية ؟؟

ممكن ؟؟

قلبي وجعنى .. امنية مالها ؟؟ ياربي مايكون حصل ليها مكروه !!

أومات للشاب ان نطلع من المكتبة ..

خارج المكتبة التقيته .. وفى عيني تساؤل ..

تأملته .. شاب مهذب ووجيه ماشاءالله عليه ..

_هلا بيك ..

رد على ..

_مرحبا .. اسف لو ازعجتك ؟

_لو سمحت امنية مالها ؟.. بدأت اقلق ..

_لا لا لا ياخ .. رد على مع ضحكة خفيفة ..

_انا والله البت دى عاجبانى وعايزك واسطة خير ..

_ومين قال ليك انها ممكن تتكلم معاى فى موضوع زى دة ؟

_لانك الاقرب ليها .

_انا ؟؟ مين قال ليك انا اقرب ليها ؟

_ياخ دى حاجات بتدسا ؟ ونستكم ورقيصكم كلو انا عارفو...

_اممممم طيب المطلوب منى شنو؟

_عاينى .. من الاخر انا اسمى احمد من ابناء ولاية نهر النيل .. خريج طبعا ..انا جادى جدا ..

لا عايز حب ولا غيرو .. توافق ترتبط بي بكرة اهلى يكونوا فى بورتسودان يطلبوها رسمى من اهلها ..

_طيب .. خير ..لما اشوفها واكلمها الاول ..

[بت السرف]

رجعت المكتبة .. خلصت البحث .. عاينت للساعة 4 جات ..

امنية بتكون خلصت محاضرات ..

وحسيت يثقل المهمة الراجيانى .. وانتابنى قلق ماطبيعى ..

شلت سندوتشات من الكفتريا ومشيت على الداخلية .. وجدت امنية ترتب فى حاجياتها ..

جلست قبالتها بعد ان سلمت عليها ..عاينت لى .. قالت لى ..

_جيبي العندك .. رأسك مليان كلام..

ضحكت ..

-ايوة .. تعالى ناكل بعدين نحكى .

نظرت الىً .. سألتنى مباشرة..

_مالو أحمد؟

_مين قال ليك عايزة احكى عن احمد؟

_عيونك .. بتحكى عنه.

_ههههههه ايوة لاقيتو فى المكتبة .. شاب ظريف ومهذب .

_آهااا.

_شنو آهااا؟.. قال عايزك.

_أنا؟؟؟

_لا أنا ..ايوة انتى !

ضحكت امنية .. استهجنت ضحكتها ..

_أمنية الولد دة مهذب ومحترم وود ناس ..

مش عايز حب وكلام فاضى .. عايز يجى البيت عديييييل .

اطرقت برأسها ورأيت دمعتين تفران من عينيها ..قلبي وجعنى .. وجعنى شدييييييد.. رفعت رأسها ببطء..

_قولى ليه لا .. ماعايزاك انا ..

[بت السرف]

[font=&quot] [/font]

احسست بمعاناه حروفها وهى تنطقها ..

_ليه؟

كان سؤالى ؟؟

_ لانى لو رضيت بيه ح يمووووت !!!

كانت كلماتها كالصاعقة فى رأسى ؛؛؛

_ انتى بتقولى فى شنو ؟

_زى ماسمعتى .

تسمرت فى مكانى ..

_ساخبرك يوما ما .

وذهبت تركتنى فى حيرة !!!

كنت اعلم ان احمد ينتظرنى خارج الكلية ..

ماذا ساقول له ؟؟؟

وفعلا التقيته ، كان ينتظرنى بلهفة ،

تحرجت منه ولم ادرى ماذا اقول ؟

نظر الىً .. وعندما لم يجد منى اجابة على تساؤلات عينيه ..

_ رفضتنى .. صاح؟

لم استطع ان ارد عليه ،،

_قالت ليك انى حاموت لو هى وافقت بي ؟

نظرت اليه..

_ كيف عرفت مادار بينا من كلام ؟

_انتى ماعارفة؟

_اعرف شنو؟

_ ان كل من يطلبها بموووت.

الجمتنى الدهشة ..

_مين قال ليك كدة؟

_دى حقيقة وانا عارفها .

_طيب لما انت عارف كدة عايزها ليه؟

_لانى بحبها والموت والحياة بيد ربنا مابيد زول .

_ ونعم بالله.

_عليك الله حاولى تانى ، اقنعيها بالحتة دى ، انتى زولة مؤمنة بالله .

نظرت اليه مليا ، يا لهذه المفأجات !

_طيب ، نشووف.

وذهبت فى حالى .

[بت السرف]

[font=&quot] [/font]

أمنية اصبحت هاجسى وشغلت بالى ، تانى يوم كان الخميس ..

ذهبت بعد المحاضرات الى الداخلية ،

معظم البنات طلعوا يزوروا اهلهم ويتفسحوا

كانت أمنية لوحدها ،طلبت منها تشيل ليها غيار وتقوم تطلع معاى ..

_وين ياعسل حنمشى ؟

_بيتنا .

_لا لا لا خلينى فى الداخلية عندى بحث لازم اخلصو.

بلهجة حازمة قلت لها ..

_لوماقمتى مشيتى معاى تانى نهائى ماح اتكلم معاك.

[بت السرف]

فى البيت لدى قط مرقط زى النمر شعرو غزير اسمه بن بن ، كنت احبه ولما احضر من الجامعه بستقبلنى عند الباب .

عندما فتحت الباب كان ينتظرنى .. ولكن عندما راى أمنية انتفض ونفش شعره كمن سيهجم عليها .. نهرته فتراجع وبدأ يموء بصوت مرتفع .. فاحترت فى امره !

رأيت أمنية تنظر اليه ، وفجأة هدا واستكان !

فاحترت فيه ، اول مرة يعمل كدة ، ياربي مالو ؟

فضحكت أمنية .. امكن عشان انا غريبة عنه .

فاجبتها .. امكن .

عرفتها بامى ومن ثم دخلنا الغرفة مباشرة ..

وقررت ادخل فى الموضوع طوالى لافك حيرة عقلى وقلبي تجاه أمنية .

_ليه كل من يطلبك بموووت؟

اندهشت من سؤالى المباشر واطرقت حينا ..

_لانى فينى لعنة .

_لعنة .. دة كلام مابدخل العقل ؟ دى اوهام خليتيها تعشعش فى راسك براك .

احمد بحبك ، وعايز يرتبط بيك ، وايمانو انو الموت مابيد زول مهما قلتى هو مش ح يخليك .

_عارفة مابيد زول .. لكن ما حيسيبوه؟

_مين الما ح يسيبوه؟

_ القاعدين معاى بياكلو فى لحمى ويشربو من دمائى .

_ انتى بتقولى فى شنو؟ دة كلام شنو؟

_عاينى يا السمحة .. احمد عاجبنى وريدتو من جوة قلبي ، لكن معاك بيكون احلى ، صدقينى .

_لا.. احمد مابحبنى انا ، وتانى شئ انا ..

قاطعتنى ..

_عارفة ، خالد مابستاهلك ، سمع كلام العوازل وخلاك ! وين يلقى جوهرة زيك ؟

_ههههههههه كان جوهرة ما كان خلانى من اساسه ؟

_لا .. جوهرة . لكن ما لقيتى الزول البقيًمك صاح .. وصدقينى يا السمحة الوجع راجيك قداااام كتير .

ضحكت من كلامها ..

_هو فى وجع لسة تانى ؟ اطمنى ما اظن احب من تانى .

[بت السرف]

{تذكرت كلماتها وانا اكتب فى هذه القصة، صدقتى يا أمنية ، لازال الوجع فينى ساكن ومتمكن .}

ساهرنا كتير وتحدثنا فى شتى الامور .

تناقشنا فى رحلة الجامعة الثقافية لولاية البحر الاحمر التى ستكون بعد امتحانات السمستر مباشرة .

[بت السرف]

عندما التقيت احمد اخبرته ان يواجهها بعد ان يخلص امتحاناته وخصوصا انه باقى له ايام ويتخرج.

انهمكنا فى امتحانات السمستر وعندما خلصنا كان باقى للرحلة اسبوع ..

أمنية اخبرتنى انها ستسافر قبل الرحلة لتجهز متطلبات المعسكر فى بورتسودان مع رابطة طلاب البحر الاحمر .

[بت السرف]

انقضت الايام سريعا وجاء اليوم المطلوب .

وكان السفر بالقطر وحجزت لنا عربة كاملة للطلبة فقط .

كانت اول مرة فى حياتى اركب القطر ،ادانى احساس كأنه مهد طفل يهتز لينام كل من فيه .

وكنا كاطفال نتراشق بالحلويات والمكسرات وتحفنا سعادة وفرح بلا حدود .

عندما وصلنا ولاية نهر النيل توقف القطر فى عطبرة ، ونحن فى المحطة فى انتظار ان يتحرك القطار ؛ رأيت أحمد ..

_هاااااااى أحمد .. كيفك ؟

_هلا هلا .. ازيك ؟ كيفك انتى ؟

_تمام ، اخبارك والامتحانات انتهت كيف؟

_الحمدلله . اتوقع اكون اول الدفعة باذن الله .

_ان شاءالله يارب ، اها جاى تودعنا؟

_هههههههه لا .. ماشى معاكم .

_ ح تحلا الرحلة بى حضورك اكيد .

وضحكنا .

تحرك القطر بعد المغرب من عطبرة بعد ساعة من تحركه تعطل وتوقف فى منطقة خلا ،

كل العربات نام ركابها الا عربيتنا كنا نضحك ونتونس للصباح .

تم تصليح القطر واتحركنا ..

جاء أحمد وجلس الى جوارى فى الكنبة ،

تحدثنا فى امور عديدة عندما سألنى من خالد؟

نظرت اليه .. لم استطع ان ارد ..

_خالد سينتظرنا مع أمنية فى بورتسودان .

تفأجات ونظرت اليه ؛

_ بس الانا عارفاه انو خالد مامشارك فى الرحلة دى ؟

_انا اقنعته يشارك، ما لا تعرفيه خالد صحبي .

تفأجات واحسست بوجعى يزداد ، سألنى احمد :

_مالك؟ افتكرتك حتسعدى لما تعرفى انه خالد مشارك فى الرحلة ؟

_مافى شئ بربطنى بخالد عشان اسعد او احزن .

_ لا .. فى .

_عاين يااحمد قصتى مع خالد انتهت قبل ان تبدأ ، ثم مين حكى ليك عنى وخالد ؟

_ خالد حكى لى .

احسست بالوجع بدأ يتضاعف استأذنت وقمت من جنب احمد .

[بت السرف]

جلست فى اخر العربة ؛ وبدأ شريط ذكرياتى يمر بخاطرى ..

خالد مهذب جدا ، اخلاقه عالية ، اسلوبه وتعامله الراقى خلونى احبه .

معى كان الروعة مجسمة ، رغم انو ما دفعتى

كنا نلتقى يوميا بعد المحاضرات ، لم يصرح بحبه ابدا ؛

لكن كنت احسه ، من تعامله معى ، ونظرات الغيرة عندما يتحدث معاى زملائى فى الكلية .

كنت سعيدة جدا بانتمائى له واهتمامه باصغر حاجياتى .

عرفنى بصديقه سمير ود الراحات كأنه يختبرنى ، لكن سمير لم يلفت نظرى رغم تهافت البنات عليه بحكم انو ود راحات !

عندما يلاقينا سمير كنت اتجنبه ، احس بنظراته تلتهمنى ، ظنا منه انه سيشترينى .

لم اهتم به وجن جنونه، قالها لى بصريح العبارة

ما حاخليك لـ خالد نهائى ولو فتنت بيناتكم .

عدم ردى عليه زاد من انانيته وحبه لذاته ، لم يشغل بالى كتير لثقتى فى خالد.

لكن سمير الانانى ملأ قلب وعقل خالد من ناحيتى ، وخالد لم يكلف نفسه ان يسألنى ، تركنى بلا وداع ..

عشت الم فظيع وانا اراه يمر من امامى وكأنى لا وجود لها فى حياته ، احترمت نفسى ولملمت آلامى وتجرعت كأس احزانى وحدى .

رفضت كل الاغراءات لحب جديد ، اغلقت هذا الباب بقوة ولم اكن ادرى ان الزمن سيعيد هذه السيمفونية مجددا كما قالت أمنية ؛؛؛

أحمد كان يريد ان يعيد الىً خالد..

احسست به يريد ان يسعد صديقه ، ويسعد هو مع أمنية ، لكن ..

قلبى منفطر ياأحمد ..كنت احدث نفسى ،

أحمد احسست به سعيدا جدا ..كان يؤمن باننا سنكون اسعد رباعى فى كل الدنيا ..

سرحت مع أمنية وكلماتها التى ترن فى اعماقى كــ جرس كنيسة لا يتوقف ابدا ..

الوجع ما حــ يفارقك ياالسمحة !!!

[بت السرف]

وانا فى سرحانى بعيد اذ بيد تجرنى من عالمى المؤلم .. كانت يد أمنية ..

أمنية كانت تقف امامى فى القطار !!!

كانت تتكلم همسا .. خلى بالك من احمد ، خلى بالك من أحمد.

أغمضت عيني وفتحتهم ..

لم يكن امامى احدا .. بسم الله ، شكلى بديت اهلوس ..

قررت اندمج مع الآخرين لانسى احزانى ..

معز الحلفاوى يصدح بأرض الجزائر..

صوته حنيييين وحزييين..

حليل ارض الجزائر والمراكبية والطنابير الترن ..

حليل ناس ليلى ..ناس ليلى ساعة الليل يجن ..

والقمرى فووق ..فوق نخل الفريق يبكى ويئن..

يشكى ويئن ..

نحمل اشواقنا ورسائلنا لحبايبنا ..

وللقاطعيين الرسائل الاحلى من عسل النحل ..

سرحت مع الاشواق والرسائل .. والحنين ..

عندما لكزتنى امنية .. خلى بالك من أحمد !

أتلفت ..

[بت السرف]

المجموعة فى هجيج والكل مع الأغنية ..

اندمجت من تانى معاهم ..مجدى صوته حلو شديد بس مشكلته مابحفظ الاغنية كاملة ..

عندما يغلبه مقطع بجيب من راسو طوالى ..

كان يصدح ..

اجمل الحلوييين وين عهودك وين ..

انشاء الله ياالهام تتحقق الاحلام ..

ان شاءالله قائد عام ونكون من الناجحيييين ..

قلبوها اغانى بنات سعد ومنى المجنونة ..

جاياك يابشرا .. جاياك جاية افتو معاك يابشرا ..

لمتييين لمتيين يابشرا .. لمتييين بايرة لى سنتييين يابشرا..

بختى بختى يابشرا..بختى ان شاءالله راجل اختى يابشرا..

وكلنا نصرخ بصوت واحد نبرأ ..

عندما احسست بامنية تنادينى بصوت حزين ..

احمد ياالسمحة ... أحمد!

قمت مخلوعة من وسط الهجيج ..

احمد كان يجلس مع طاقم ادارة الرحلة فى اول المقطورة ..

كأنو نايمين ، بعضهم على الكنب وبعضهم يفترش لحافه بتاع الرحلات على ارضية القطار .

[بت السرف]

احمد كان يفترش الارضية ، لم يكن نائما ،

بل يقرأ فى كتاب فى يده..

عندما رأيت شئ يتلوى بجانبه..

صرخت .. احمد ماتتحرك ..

على صرختى صحا الاستاذ المشرف على الرحلة ..

نظر الىً.. فى شنو ؟؟

وانا ارتجف أشرت الى أحمد .. الذى بدأ ساكنا ولم يتحرك من مكانه..

كان ثعبان ضخم بدأ يلتف حول احمد..

لم ندرى ماذا نفعل ..

صادف مرور عامل من عمال القطار ..

بدأ ينكز الثعبان بعصا كان يحملها ..

الثعبان ترك احمد والتفت على العامل .. الذى بدأ حريفا فى تعامله معه ..

لم استوعب شئ بعد ذلك ..

[بت السرف]

فتحت عيني على احدهم يشممنى عطر ما ..

استوعبت من حولى ..

الكل كان فى حالة صدمة ، وبصوت مبحوح سألت من احمد..

حضر وجلس قبالتى .. انا بخير ماجاتنى حاجة .

والعامل ؟؟ تسألت انا .

بخير ماجاته حاجة بس الثعبان جدعه بالشباك

بكون مات تحت عجلات القطار .

كان يقف امامى شباب لم اعرفهم ..

اخبرونى لاحقا هم من الهلال الاحمر صادف وجودهم فى القطار وطلب منهم المشرف يرافقونا فى القافلة ..

شكرتهم لاهتمامهم بي ..

أحمد كان فى حيرة .. احسست به

نظر الىً.. ضحكت .. عايز تعرف الجابنى ليك شنو وكان سبب فى انقاذك من الثعبان ؟

أمنية هى الجابتنى ليك !

لم يستطع ان يتفوه بكلمة ..

عرفت يااحمد انو امنية بتحبك ومافارقتنى لحظة

كل شوية احس بيها معاى وتطلب منى اخلى بالى منك .

طلب شباب الهلال الاحمر من احمد ان يخلينى ارتاح شوية .. لانهم ادونى مسكن بسبب الخلعة من الثعبان مسكتنى رجفة قالو بتروح لو نمت شوية ..

تدثرت بلحافى واغمضت عينى ..