الجامعة كانت منيتا *أمونــة *

[الاميرة توتة]

سألوها أمنيتك شنو ؟؟
وهي صغيرة قالت منيتا ...
الجامعة فيني الأمنية
ياريت أحصل قامتا ..
مرت سنين لمحة بصر
أمونة كبرت زهرتا ..
مضرب جمال بين الفريق
قمحية ناعمة في قمحتا
كل الفريق في اندهاش ..
ده الوز بقلد مشيتا ..
بعد امتحانات البلد
نجاحا كاسح شلتا
أبوها عدمان القروش
من وين يفتش نفقتا ؟!!
دنقر ونقنق حبتين
حبوبة باعت بقرتا ..
الوالدة قنعت في الدهب
والباقي كان مال خالتا ..
يوم الوداع جرت الدموع
في البُكسي شالت شنطتا ..
كل الخلق تبكي وتنوح
أمونة !! أمونة فاتت قريتا ..
مهاجرة في طلب العلم
لازم تحقق منيتا ..
فرحانة لي درب العلم
عيونا عكست فرحتا ..
أمونة دخلت في المدن
بين الخلايق وزحمتا..
مشدوهة تنظر في اندهاش
أمونة طالت نظرتا ..
دخلت في حوش الجامعة ديك
الجامعة زادت دهشتا ..
وقفت بعيد واتمحنت
الكل مراقب محنتا ..
كيف الولاد ياخواني هووي
تشارك البنات في جلستا ؟!!
وكيف البنات تلبس هدوم
كاشفة ومبينة عورتا ؟!!
ناساً تصفق بي عجب
وناساً مقرقرة ضحكتا ..
عاشت شهور الدهشة ديك
الجفلة كانت عادتا ..
عرفوها من أصل القرى
ظهرت معالم لهجتا ..
مرت شهور بعد الشهور
أمونة مالت للمدن لي غادي جدعت طرحتا ..
أختارت الهدم الرهيف
شاشاية كانت لبستا ..
خدعوها !! خدعوها ترباية السجم
في الفارغة ضاعت عزتا ..
وأصلوا الهبوب لمن تهب
تقلع جذور من شدتا ..
وأصلو المدن مافيها خير
ده الخير مفارق حتتا ..
أمونة يومي مع الولاد
خلوها تايهة في دنيتا ..
ساقوها لي نار الجحيم
الزولة فقدت عفتا ..
أبوها منتظر النجاح
بيحلم بنيتوا وظيفتا ..
تجيهو بالخير الوفير
تديهو من حق صرفتا ..
والأم تكتر في الدعا
ياالله كبر رايتا ..
تاريها في درب السواد
أمونة تايهة في لعبتا ..
داخل الحشا نبت الجنين
في الحلة فاحت ريحتا ..
يادوبا !! يادوبا حست بالذنب
في الضلمة صاغت فكرتا ..
لازم تودع وتنتحر
بالتالي تدفن عملتا ..
يوم الخميس بعد الظهر
في موية كبت صبغتا ..
اترددت اتذكرت كل الحصل اتشهدت
في آخرو قامت شربتا ..
لحقوها ..لحقوها ودوها الطبيب
في الغرفة زنّت ضجتا ..
أمونة هوي ..أمونة هوي !!
قعدت تبلع في الكلام
ما الوحش شوه سمعتا ..
والجامعة راحت زي هبوب
والقصة حسرة نهايتا ..
أمونة رجعت للبلد
العبرة حنضل بلعتا ..
الناس دي ما بترحم هناك
بي نظرة شققوا كبدتا..
ركبت على البيت الكبير
وقعت كسرت رقبتا..
أمونة ما آخر البنات
ما الوحيدة في دنيتا ..
والزولة لو نست الشرف
بالجد بتفقد قيمتا ..
والموية كان ضاقا الكلب في الدنيا تحرم شربتا

منقول لأعجابي الشديد بهذه الكلمات ..

[waya]

اسلوب وصفي بديع لحالة واقعية نتمنى تصحيحها

تشكراتي ,,

[طلال الحكيم]

كم في المدن من (أمونة) .....

ربنا يحفظهم ويرجعهم سالمين ..

[ناجي عثمان عبد الرازق]

[align=center]

ﺍﻻﻣﻴﺮﺓ ﺗﻮﺗﺔ
عمل جميل و ﻛﻠﻤﺎﺕ ﻓﻮﻕ ﺍﻟﺮﻭﻋﺔ لك تحياتي
ﻭﺩﻣﺘﻲ ﻣﺘﺄﻟﻘﺔ ﺩﻭﻣﺎً


[align=center]
[/align][/size][/align]

[سيف النصر حسين]

رائعة رغم الحزن الذي يغلفها
لأنها تحمل من الدروس والعبر الشئ الكثير
تشكري على الأختيار...

[الاميرة توتة]

اسلوب وصفي بديع لحالة واقعية نتمنى تصحيحها

تشكراتي ,,

وياااليتها تُصحح ..وتشكراتي لك أيضاً لتواجدك وايا ..

[الاميرة توتة]

كم في المدن من (أمونة) .....

ربنا يحفظهم ويرجعهم سالمين ..

يااارب فهذا هو المبتغى لكل (أمونة) ....أسعدني تواجدك.

[الاميرة توتة]

[align=center]

اﻻميرة توتة
عمل جميل و كلمات فوق الروعة لك تحياتي
ودمتي متألقة دوماً


[align=center][/align][/size][/align]

الأخ المبدع ناجي.. شكرا لتواجدك الجميل وكلماتك المبهجة ..تحياتي لك ..

[الاميرة توتة]

رائعة رغم الحزن الذي يغلفها
لأنها تحمل من الدروس والعبر الشئ الكثير
تشكري على الأختيار...

ولك الشكر أيضا لتواجدك أخ سيف . تحياتي .