جميع المغتربين ((بم تحسون عندما تزورون السودان؟؟))

[saro0ona]

بسم الله الرحمن الرحيم
اللهم صل على محمد وعلى آله وصحبه أجمعين
السلام عليكم ورحمة الله وبركاته
جميع المغتربين لدي سؤال لكم....
وهو...
بم تحسون عندما تزورون السودان؟؟
هل تحسون بالرغبة بالعودة الى ارض الغربة...لان بلاد الغربة قد تكون اكثر تطورا وتقدما؟؟
ام تحسون بالرغبة في البقاء أكثر...لانه الوطن...؟؟؟
اتمنى الاجابة بصدق...

[بنت الماحي ونعم]

انا يوم مشيت اخر اجازة ماكنة عاوزين نرجع بس الدارس نسوي شنو اكيد بنشعر بي فرح وحنين للبلد ..... وانا بشكرك ياسارونا على السؤال الرائع دة وحابة اتعرف عليكي ممكن ؟

[سودانى معذب]

بنحس بالعظمة

[احلى دلع]

انا بحس لما ازور السودان بفرحة وتتحول الى حزن شديد والم عندما اعود الى بلاد الغربة فأنا لمى ارجع هنا السعودية بصاب بحالة اكتئاب لعدةايام الله لايوريكم الحالة اللي بكون فيها.

[saro0ona]

يت الماحي وسوداني معذب وأحلى دلع...ربي يسلمكم ويحفظكم داايما وابدا ...
وبشكركم من كل قلبي على ردودكم وعلى انكم اول من رد على السؤال...
ليكم مني محبة واحترام...
وبت الماحي بتشرف بالتعرف عليكي...
ثااااانكس...

[MiSs PlAnEt]

والله نفسي امشي السودان...
بس ما عارفة ليه الامور ما متسهلة!!
حاجة غريبة جدا...كل ما نقرر نمشي..تحصل حاجة تمنعنا
ولغاية الليلة ما قدرت امشي السودان
ادعو الله يسهل علينا ونمشي..عايزة اشوفه مره وحده بس!

[sunni]

بتنا سارونا الصغيرة (طبعا لأنه في سارونا الكبيرة)

أولا لو سمحتي لي أعترض على كلمة (تزوروا السودان) وكلمة (ترجعوا بلاد الغربة)

فنحن بنرجع السودان،، ثم نمشي لبلاد الغربة

فالغربة وبلاد الغربة هي ما إضطرتنا الظروف لأن نمشي ليها في فترة من الفترات،،، وأشبه الوضع بالطالب البيمشي في فترة الدراسة لقعد في الداخلية،، بيتحمل بلاويها لأنه لازم يدرس،، وبتشبه نشوة الرجوع للسودان بنشوة الطالب وهو راجع لأهله في الإجازة،، ثم تفتح المدرسة مرة تانية

وهكذا دواليك

[mark=FFCC33]العز بالأهل العز بالأهل العز بالأهل[/mark]

[saro0ona]

شكرا جزيلا مس بلانيت على المرور الحلو....
ومن كل قلبي بتمنى الله يسهل ليكم وتشوفي الوطن الغالي...
شكرا سوني على المرور...

[ود أونسه]

الغربة قدر كتب على من يرتادها ولكل اسبابه التي يراها ولكنها تبقى محطة يمني نفسه دائما بتجاوزها وان كان هذا التجاوز يتطلب في اغلب الاحيان العمر كله الا من رحم الله ويبقى امل العوده الي الوطن الحبيب يراود الجميع الا من ساءت نفسه وقل ايمانه بربه وبوطنه ولعل الاغلبيه تردد ما قال الشاعر المشتاق لوطنه واهله :

كاتم ســري في جوفي اتنفخ وادشــا

ضارب الغربه عدمان المعاهو اتفشا

يارب يا كــريم تدينــا عيشتن هشــا

نرجــع للبلد نقــدل كــدي ونتمشـــا

[saro0ona]

*·~-.¸¸,.-~*شكرا جزيلا ود أونسة على المرور وعلى أبيات الشعر الحلوة دي........*·~-.¸¸,.-~*

[غربة و شوق]

انا عن نفسي لمن أمشي السودان بكون في قمة السعادة ..

الجو حلوووو .. والناس مفرفشة و نشطانة .. وحركة ... جاحة حلوة .. ما ممكن أوشوفا دايما هنا في بلاد

الغربة ..

وبزيد الفرح لمن أقابل أهلى و أقاربي و أصحابي ... المشتاااااااااقة ليهم شديد ..

ومشكورة saro0ona على الموضوع الحلو ..

احترامي ,,

غربة و شوق

[إيريل]

صراحه مامشيت للسودان إلاّ وأنا طفله

[مومو و بس]

والله انا بتمنى ابقى في ارض الوطن بين الاهل والاصدقاء
وبين احضان الوطن
تقبل مروري اختك مومو و بس

[زوزو الجامعي]

والله بجس بقرحه وبتمنى اني ماارجع للغربه
ويسلموووووووووو

[توتو اصيل]

انو نقعد وما نرجع

[ود الخير]

بحس بروحى رجعت لى

[أهتم فيني]

السلام عليكم جميعا
والله بصراحه ونحن في الغربه نشتاق للسودان كثير ونشتاق لكل شي فيهو من ونست الأهل في الحوش
ونسمه الهواء البارده التمرعليك بليل والظلام هناك يديك جو رمنسي كل شي نشتاق ليهو بس
نوصل السودان نشوف الزحمه في النهار والسخانه والشمس الحاره المتوصيه بيك وماتصدق توصل البيت عشان تشغل المكيف وتشرب مويه بارده تلقا الكهرباء قاطعه و تقطع كمان 4ساعات
هنا تحس بقيمه الغربه وتبقا تحن لبيتك هناك وسريرك ولأوضتك وصوت مكيفك المايطفي ألا أنت تحن عليه وتطفيهووالمويه البااااااااااارده وأول ماتصحا من النوم تلقا وشك نظيف مافيهو تراب
بس برضو نشتاق للسودان والسنه دي أول مره راح أشوف عيد الفطر هناك

[مغتربة مقيمة في الإمارات]

حقيقة السؤال رائع
أنا اخر مرة سافرت السودان كان صف سادس طبعا لمن كان اخر يوم كل الأهل صحوا بدري يجهزوا معانا وانا اتفرج فيهم في اكتئاب كأنم بيجهزوا عشان االسجن.
هم وبس أرجع تجيني حالات والله أدرى

مع تحياتي الاء

[saare]

والله انا جيت وما معاى ولا واحد من اخواني الذكور حاسى نفسى مافاهم اى حاجة اول اسبوع ماشى فى نص الناس زي السكران بعاين يمين وشمال وامشى مايل
و ال 3 شهو الاولى مافى زول بيفهمني غير اخواتي وابوي وبس تاني مافى زول بيفهم انا بقول شنو ولا الناس بيأخدو نظرة على انك وكأنك جاى من المريخ ياخ دي حكاية عجيبة شديد واى زول بيهتم بيك اهتمام مبالغة

[البنيه]

سؤالك حلوو شدييييد يا اخت saro0ona
انا نزلت اجازه شهر 6 الفات ولمن قالوا انو الطياره حا تهبط في مطار الخرطوم الدولي والله قلبي قال لي انط قبل ما تهبط من شدة الشوق العلي لبلدي ولااهلي وناسي شعوور حلو شدييييييييييييييييييييييييييد
ولمن هبطت الطياره ونزلنا اتلفت في المطار كلهـــــــــــــــــــم سودانييييييييييين يا الله مسكتني فرحه مش زي هنا تلف يمين وشمال يا هندي يا باكستاني يا مصريي ....الخ اصلوا ما بتلقي ليك سوداني ولمن اشوف لي سوداني بحس بفرحه شديييده .ولمن دخلنا جوه المطار وشوفنا اهلنا بستقبلوا فينا يا الله بالجد حاجه روعه الواحد بيحس بقيمة نفسوو وهو شايف الكل مشتاقيين ليهوو واحلي حاجه لمن يكونوا محضرين ليك بوكسي بره عشان العفش ومحضرين سياره لينا ولمن تنطلق للبيت ويكونوا النسوان مستنين الاهل والجيران ويلا لمن تصل الزقاريت تقوم والحلاوة تتوزع وريحة اللحمه تضربك يا الله ويكون بكا ممزوج بفرح واحلي حاجه لمن عملوا لينا كرامه وعزموا الاهل والجيران يا الله ولمن جوا الناس لمن تدوخ من كترت السلام وبالذات النسوان العجايز الواحده منهم لمن تقول ليكي واحلااااااااااااتي تعالي لي يا حبيبه قساي (هههه) ويكون بيني وبينكم كدا قصده حاجه تانيه(عايزه تدبسك لولده باي طريقه مش بت بره هههههههههه) واحلي حاجه لمن تمشي السوق المعاكسات دي ههههههههههههههه هنا لمن الوحده مننا يعاكسوها لمن تدور تدي الزول كف لكين السودان غييير حتي معاكساتهم بطريقه كدا تخلي الوحده تضحك وكمان لمن تمشي مع قرايبك الجامعه ويجوك الزملاء هناك يعزموكي علي بارد كدا من كتر اللمه البتكون حواليك لمن قلبك يقول ليك سجل في جامعتهم دي هسييي والحاجه الصعبـــــــــبه لمن تكون خلاص اجازتك خلصت وراجع للغربه والعذاب من تاني بتكون في قمة الحزن انا والله موقف ما بنساهوو لمن كنا راجعيين الدموع كانت في عيونا كلنا حتي امي وابوي بدل ما يهدونا ويسكتونا بقوا يبكوا معانا انا واخواني وكمان لمن قالوا خلاص الطياره حا تهبط في مطار الشارقه الدولي قلبي قال لي اصلك ما تنزلي (غايتوو شعور لا يوصـــــــــــــــف مهما اتكلمته) بس الحاجه البتكيفني فيني اني انا بموووووووووووووت في حاجه اسمه السودان )