دردشة

[معتصم العطبراوى]

معتصم:
أنا أبدا من وين يا القصيد
بي يات حواس أو يات حرف ..
و انا فيكي كاتلني الكلام
يا الشايله من لون الجرف ..
يا لافحه شوقك أغنيات
يا الواقفه جمبي كتف كتف ..

أسماء :
أبداني من لهف الجنون
و ادخلني من باب الحرف ..
يا ساكن البال العيون
يوماتي بي شوقك ترف ..

معتصم:
خليني ابدأ من العيون
من قلبك الخفه ورهف ..
انا كلي يابت اشتهاي
خاتفاني اشواقك ختف ..

اسماء :
مدفوقه ريقين من رضا
و مفتوقه بالبوح بعترف ..
بهواك و اكتر من كده
و يا ريتو لو قلبك عرف ..!
معتصم:
وقفتو تيراب الغرام
لامن من السنوات نشف ..
لاتدقي في بابي الكلام
بتقده توب شوقي الرهف ..!
او كبي في جوااي شوووو
يا اتبلبل الشوق ياتلف

اسماء :
جاياك كما السيل في العبور
خلي المشاعر تنجرف ..
بملا الخواطر بالحضور
و اسرف تفاصيلك سرف ..
يا دفقة الشوق التجيش
بيهو الدواخل و ترتجف ..
محتاجه اشوفك شان اعيش
في كون مرتب و مختلف ..

معتصم:
راجيك ياازينة البنات ..
راجيكي يانخلاتنا ريد
فات في حدود وصفو الوصف
ياابكرة مااتسرع تعال
من هسع عيني بقت ترف

اسماء :
مشتاقه و اشواقك جمر
ما راضي يختاني و يخف ..
بمسك تلابيب الصبر
باكرنا قررررب ينكشف ..
لابد حيجمعنا الزمان
لو مره ساعدني الظرف ..
و احضن ربابة أحلامي شان
لحن إشتياقك ينعزف ..
أرجاني و الموعد قريب
نتلاقى و الهم ينصرف ..
نتناجي في النيل يا الحبيب
نغرف من الأفراح غرف ..

معتصم :
وين القى (فاااء) الاشتهاء..
قافية غناويك والولف ...
محقتي وين حرفي الكلام ..
من كتر ابداعك نشف
يابت ملاني غناك شوق
لامن قليبي الشاخ وقف ..

اسماء :
عمرك و لا بشيخ ليك قلم
لا نيل حكاياتك بجف ..
يلاك ندق نوبة الحنين
في حضرة الغنا ننجرف ..
نلهب تقاقيب القصيد
ما أحلى دروشة الحرف ..

معتصم :
من كتر مابي من حنين
من لهفة من ريد من ولف
كبيتو في حب الوطن
في روعة النيل والجرف
محقتو في ذكرى البيوت
في نور فوينيسنا اليرف
يالله في يوم الغرام
والناس تقيف شوق تعترف
استرني لايمرق كلام ..
يفضح قليبي وينكشف

اسماء :
دقيتو ميعادك فرح
فاح إشتياقك في العزف ..
غنيتو ضحكه و مقطعين
غناني إنشودة ولف ..
قلبي المجننو ضي عينيك
بي شوقو ليك واصل السقف ..
بينادي ليك يا مشتهاي
استر معاي
جسد المشاوير النحف ..

معتصم :
يالله من هاادي الجمال ..
خاتف بصر عيني ختف ..
كلما كشحتك بالكلام ..
تتكشحي بالتبر الصٍرف ..
يااا سكري الفي راحة إيدي
وانا بي شقاوة الريد أسف ..

اسماء :
ارحم عشوقا" في هواك
عاصفاهو ريح ريدك عصف ..
كل ما يميل عنك و يفوت
تالاك قليبو بينعطف ..
يا تبقى ديمه معاهو أو
من دنية الناس ينحذف ..