لــــــــــيــــــــك

[معتصم العطبراوى]

يا عارفه إني بلاك بموت
يا عالمه بالحاصل علي ..
مالن شموسك دار تفوت
من غير تمد إيدينا ضي ..
مالن خطيواتك مشن
في سكه ما بتودي لي ..
يا مخدره الريد في القلوب
و مخليه الشوق أرضو صي ..
ما تظني بالي وراك بروق
انا لسه جرحك فيني ني ..
لو كنتي هاميك العذاب
الكاوي قلبي بلاكي كي ..
كان جيتي قبال العتاب
لو كنتي جد مشتاقه لي ..

راجياك تعالي إتفضلي
و يا مرحبابك في الفؤاد ..
يا ملونه الإحساس حنين
و مكحله العينين سهاد ..
سبتيني كيف يا بت هواي
لي الغربه لي ألم البعاد ..
لي الآهه للشوق و الأنين
فتيني و الأيام سواد ..
لو كنتي صح مشتاقه لي
ما كان تركتي هواي جريح ..
ما كان فتحتيهن علي
طاقات من الشقى و النويح ..
مالك غبيتي الأمنيات
و هتفتي بالصمت الصريح ..
و سلبتي حسي الأغنيات
و العافيه و اللحن المريح ..
يا واقفه في آخر رصيف
خليتي قلبي غلب يسيح ..
قوليلي كيف يا غاليه كيف
أمشيكي و الخاطر كسيح ..

جاياكي يا نفس الصباح
في دربك الأشواق حفن ..
عينيا من كتر النواح
يا جافيه وحياتك عمن ..
شاوريهو قلبك لو يلين
يرحمني من نار الشجن ..
ينصف عيوني إذا شكيت
أو مره لي عينيك شكن ..

مشكلتك إنك بت هواي
مشكلتي إني بحن ليك ..
عارفاني بدفع عمري شان
ألقاكي و اسرح في عينيك ..
كل ما ألم حرفي و نقول
ننساكي ما نفكر نجيك ..
بلقى الحروف بي لهفه جات
تفضحني و تقول بشتهيك ..
يا راسمه في النبض إشتهاك
و مفرهده الشوق في الفصول ..
شاوريهو قلبك يا ملاك
هو العندو تصريح الدخول ..
لي باحة القلب الهواك
ختاكي قبال أي زول ..
هل شايفا بستاهل جفاك
هل عادي بس غيبتك تطول ..؟
و الله يا أشواق حرام
انا غايتو ما فاضللي حيل ..
احزاني تتجمع غمام
و نشف بحر صبري الجميل ..
علي كل حال بهديك وسام
أشواقي و الشكر الجزيل ..
لو جيتي لي أو قلتي ( مام )
ياكي الحبيبه و انا الخليل ..

لو ماكي غاليه علي شديد
ما كنت برمي عليك ملام ..
لو ما دفقتك في القصيد
كان إنفجرت من الغرام ..
بقراكي في الخاطر نشيد
و ابداكي رغم إنك ختام ..
لي شوقي يا نبض الوريد
الشوق ده قايلاو بالكلام ؟

[مها]

سنين في رجــاك سنين راحــــو وسنين جايات

والليلة يوم هليت علي زي قمـــر وســط نجمات

مديت ليك بفرح أيدي وإتخاذلت في اللقا الكلمات

وبس كيفن يجيني القول هاك أقــراه في الدمعات

[/font]

[عبدالله عوض الكريم احمد]

والله رائعين رائعين
لمن رائعيـــــــــــــــــــــــــــن
العطبراوي
و
مهــــــــــــــــا

[لبيب]

جميل والله