ليست مجرد أنثى

[مجدي المغربي]

أتمددي جواي...
زي هذا الوطن..
لي الغلابه الغبش
الكل ما يجرح كبرياهم
جــــــــــــوع
هتفو عاش الوطن..
الكل ما أعياهم الرحيل
وضاعت ملامح الطيبه
بين غربة الروح
والمدن..
هتفو عاش الوطن..
وحنّو للحضن القديم
حنّو لي ليل السكون..
لي حضن حبوبه
وحجوات ..
من الزمن الجميل
موسى ود جلي
وسنينات
فاطمه السمحه
والغول
حجوات ..
تطرد ليل الخوف
وتنومنا في حضن الأمان
لا هم لا حزن..
بنوم...
ولا خوف على بكره
وجوانا يقين
ماشقّ حنكاّ ضيعو
بنوم...
ولا شايلين ضغينه
لي حد ولا ناويين
بنوم ...
والأمل في بكره
أجمل ما يكون
أتمددي جواي...
حدي من مدن الضياع
الكبرت والزمن..
ضاع أمان الخوف
ضاعت المبادي والقيّم
ضاع الصدق
وأتلبّست الناس
الزيـــــــــــــــــــــــــــف
ما عادت الأيادي
المرفوعه للسماء
هي البتجيب المطر
ماتت الأرض
من العطش
وماتت من البيعرق ويكد
شان يعيش
ضاعت الضحكه
البتطلع من جوه الضلوع
صادقه زي طلتك علي
وجميله زي ساساك حركتك
بين عقلي والقلب البريدك
من زمن...
ضاعت هيبة الحب
العفيف وصادق
في زحمة المدن الضياع
ضاعت ملامحو
بين ناس
بتجهل معنى العشق
وتجهل تقديس الحب
زي وطن...
أتمددي جواي ...
حد البصر تفاؤل
وغطي المساحات
بالعشــــــــــــــــــم
أتمددي ...
وخليني أحلم بي بكره
أجمل من أي واقع
مُر
بكره ما فيها خوف
لا ذل... ولا إنسان بموت
بي الحسره والندم
أتمددي...
وما تخلي مساحات لي
الظلم
طفي نيران اللّهب
وقفي الحرب
البتنهك جسد الوطن
الحرب البتورث أجيالنا
الندم
أتمددي جواي ...
زي هذا الوطن
لي الغلابه الغبش
الكل ما يجرح كبرياهم جوع
هتفو عاش الوطن..
الكل ما أعياهم الرحيل
وضاعت ملامح الطيبه
بين غربة الروح والمدن
هتفو عاش الوطن

..

[العمرابى]

اجمل من رائع
وخلنا نقول عاش الوطن
عاااش الوطن عاااش الوطن عااااش الوطن
نحن فداك كلنا ياوطن
نحن الوطن

[اركمانيه]

عاش الوطن
الانغمص فى جرحُ
حتى التعب
عاش الوطن
المقلوب على درب
المحن
عاش الوطن
الببحث دوام
عن فجر الزمن
عاش الوطن
الترياقث
كان نظرة حنان
لمت يقين تملا
المكان
عاش الوطن
عاش الوطن
ثم
عاش
فوق أكتاف
المحن
عاش الوطن