الأخطاء الطبية،، ومحاسبة الأطباء

[sunni]

رحم الله البروفيسور عامر مرسال،، ففي حديث لي معه زمان قال لي كلمة، عمري ما أنساها. أن "الطبيب في رأي المجتمع ملاك رحمة،، لكن رأيه في نفسه،، جزاااار، وبالذات الجراحين والزينا بتاعين العظام ديل"

قالها رحمة الله عليه، وهو من الأطباء القلائل الذين لم تسجل لهم أخطاء طبية كثيرة، لأنه كان يخاف ربه فيما يفعل،، ويفصل ما بين مردوده المادي من عمله، وبين ماعليه عمله مهما كلف الأمر،، لأنه كان "إنسان" يحس بمعاناة المريض، قبل أن يري ما في جيب المريض.

ربنا ما يحوجكم لزيارة طبيب في السودان، فقديما كان الطبيب السوداني معروف بالكفاءة،، ولكن،، قلت الكفاءة،، وزادت الأخطاء الطبية،، وزاد الجشع.

بوست فتحته للكل،، أحكوا لينا قصصكم (المؤلمة)،، أنا شخصياُ عندي الكثييير في المجالين
1. جشع الأطباء في السودان
2. الأخطاء الطبية القاتلة البتمر بلا رقيب ولا حسيب.

فهل من مشارك؟؟؟
عاوز أسمعكم،، وبعدين انا نفسي بحكي ليكم


قلبي على ولدي،،،
قلبي على وطن
يموت على رصيف الإنتظار
قلبي على كل الصغار

[alwajeeh]

الاخ السني ابو العزائم

اسعد الله صباحك ياحبيب

المسألة طويلة جدا نبدأ نقول في البداية ليس كل الاطباء جشعين وانما يوجد اطباء ملائك بمعني الكلمة فمنهم من يدفع حق الدواء للمريض
ولكني دعني ابدأ لك من البداية .

كان عدد الطلبة في كلية الطب لا يتعدي الخمسون طالباً وهذا يعني ان الاستاذ يعرف كل طالب وامكانياته ومقدراته وتكون لدي الاستاذ المقدرة لتغذية الطالب بالعلم بصورة مباشرة ويتأكد من انه فعلا لديه المقدرة علي ممارسة عمله بثقة مطلقة والآن عدد الطلاب اكبر من طاقة الاستاذ وأن الطالب لا يجد الفرصة الكافية من التعلم بشكل جيد اضافة الي ذلك كان الاستاذ يدخل المكتبة مثله مثل الطالب ليحضر لمحاضراته ويهئ نفسه للمناقشة . والآن الاستاذ من كلية الي كلية ...ليس لديه الوقت للتحضير ولا لآي شئ اخر غير انه يؤدي محاضرته ويذهب .....لانه مرتبط بكلية اخري ...وذلك نسبة لظروفه المعيشية التي تحتم عليه التنقل بين الجامعات حاملا مع دفتر او مجموعة اوراق اكل الدهر عليها وشرب ...طريقة التدريس ...طريقة مراجعة المادة المدرسة لهم ...مافي مكتبة ..مجموعة مذكرات مكتوبة او مصورة يحفظها الطالب ويدخل ويؤدي الامتحان ....وعلي الدنيا السلام ....طيب كيف يكون طبيب دون اخطاء وهو اصلا لم تتوفر لديه المادة العلمية التي تمكنه من استعياب كل التفاصيل الدقيقة ....
الممارسة ...الطب هو ممارسة وتراكم خبرات بعد وجود الرصيد العلمي في ذهن الطالب او الطبيب .لذلك تندي كفاءة الطبيب بشكل ملاحظ فأني له الا يخطئ وهو لايعلم ان كان يمارس عمله ..لذلك تكثر الاخطاء والاخطاء المميته والقاتلة ...
الرقابة والمحاسبة ...عدم وجود الراقبة الفنية الدقيقة والمتابعة من الوزارة او المجلس الطبي علي مثل هذه الاخطاء .
رغم كل ذلك يوجد عدد كبير من الاطباء يؤدون واجبهم بضمير ووزاع قوي .

في الاسبوع الماضي كنت استمع الي حلقة صحة وعافية وتحدث دكتور مأمون عن موضوع الاخطاء الطبية واعتقد ان هناك خطوات ايجابية تأخذ طريقها لمعالجة هذا الشئ لانه اصبح شئ لا يمكن السكوت عنه ...

لك الود ولنا عودة مرة اخري لتكملة الموضوع ..

ود الزين

[sunni]

عزيزي ود الزين،،، صباحك زي ما إنت عاوز،، وزي ما بتمنى ليك.

حبيبي،، لو أخدنا أحداث واقعية من واقعنا المعاش،، وبدون ذكر أسماء،، بأحكي ليك قصتين،، أخفي فيهم إسماء الأطباء،، وأظهر فيهم أسماء المرضى.

الحادثة الأولى لوالدتي،،، وأعتقد إنك ممكن تذكر الحادثة، لأنها يومها كنا مع بعض ، وفي الأجازة،، ففي سنة 1985، تدهورت صحة والدتي أطال الله في عمرها،، ووصل الأمر إلى أن لزمت المستشفى، وهناك كان التشخيص أن عندها مشكلة في القلب، فكان خفقانه غير طبيعي، ولا ثابت. كان الدكتور المتابع للحالة رمز، ورمز معروف. في يوم من الأيام (وأنت بتعرف انه في الفترة ديك كان عندي شقيق مسؤول من قسم العلاج الطبيعي. بالصدفة مر طبيب متدرب في فترة ال HOUSEMAN وطلب إنه يكشف عليها،، وقال بيجي بالليل،، عشان الدكتور المسؤول (ما بيرضى واحد يشوف مرضاه) بالليل الشاب جانا،، وبعد فحص،، جاب دواء،، وحلاه بالجلكوز،، ولخبطه مع الدريب المغذي ليها،، لأنها كانت وصلت مرحلة إنها بقت ما بتعرفنا،، نحن أولادها الملازمينها. الوجيه،، تاني يوم،، الوالدة بدت تفتح عيونها،، وبعد يومين إتعرفت علينا كلنا،، وبعد 4 أيام طلعوها... السبب بسيط،، كان تعريف المرض غلط،، وهي كان عندها إلتهاب حاد في المصران،، وصاحبنا بعد ما طلعوها،،، عرفنا إنه كان خاتيها حالة ميؤوس منها ؟؟؟

دي الأولى

التانية،،، نسيبي رحمة الله عليه. وهو رجل قدم للولاية الوسطى ما قدم،، لأنه بعد إنتفاضة 1984 وحتى 1989 كان حاكم الأقليم الأوسط،، وفي تلك الفترة بالتحديد (وبحكي القصة دي،، عشان أوريك كيف بيهتموا حتى بوالي الولاية) حس بمشكلة في عيونه،، وهو رجل (رحمه الله) صاحب سكري قديم. الدكتور قال ليه،، عندك بداية موية بيضاء،، لازم ننتظر عشان تستوي،، وبعدها نعمل ليك العملية وتبقى تمام. بعد فترة لون عيونه تغير،، وقلق،، سافر لندن،، وهناك قالوا ليه دي ما موية بيضاء،، ده دم في الشبكية،، وكان لازم يوقفوه ليك بالليزر. كانت ساعتها واحدة من العينين إنتهت 100%، والتانية 30%، وقالوا ليه،، بعد كدة مافي رجعة. مر الزمن،، وعمى الحاج،، وبسبب العمى وعدم الحركة،، بترت ساقاه،، ثم تدهورت ذاكرته،، ثم سلم الأمانة في فبراير الماضي زي ما إنت عارف.

دي حادثتين (نعم هي قدرهم) بس الدكاترة المشرفين ما بتنطبق عليهم ما تقول،، لأنهم دكاترة يشار لهم بالبنان؟؟؟؟


فما رأيك؟؟؟

لك التحية

[صلاح يحيى سليمان]

الاخ السنى.....!

فتحت لينا موضوع ما حا يقيف خالص....! ونتمنى عدد كبير من الاعضاء يدونا من تجاربهم مع الاطباء.
الاخطاء الطبية مشكلة كبيرة فى كل الدول .....ايضا فى معظم الدول المتقدمة......كمثال هنا فى المانيا
جمعية كبيرة من ضحائى الاخطاء الطبية .....ولو شفتوا بعض الحالات.....!!!! حماكم الله ساكت.....!!!
والمشكلة الكبيرة من الصعب جدا مقاضات الاطباء......عاوزه صبر ومتابعة شديدة.

ولى عودة......!!!!

مع تحياتى

[sunni]

أخونا صلاح،، نورت الموضوع.

بس يا صلاح،، من المستحيل في أروبا يحصل إنه،، في نفس غرفة الولادة وفي نفس اليوم وفي نفس المستشفى،، تتوفى 7 سيدات من أصل 9 ولدن في نفس الوردية على يد نفس الطبيب،، ولو حصلت،، أكيد ح تتم المسائلة؟؟؟؟ دي حصلت في مستشفى مدني من حوالي سنتين.................

هل من تعليل لحدث زي ده؟؟؟ وبكرة هذا (من سأطلق عليه مجازاً) الطبيب يفتح عيادة،، ويقول الكشف عنده ب 85؟؟؟

مافيا الأطباء في الخرطوم حاليا بيحاربوا أي طبيب يقلل أسعاره،، والسبب ،،،،،، عشان ما ينزل ليهم السوق !!!!!

عجبي !!!!!! سوق المرض والمرضى ؟؟؟

[MAROKO]

أولا احب احيي عمو صلاح وعمو السني وعمنا الوجيه..والله موضوعكم جميييييييييييييييل جدا..
واللي جذبني للموضوع إني طالبة طب..زيي زي أي طالب طب بيكون في سنة أولى متحمس جدا وشاعر بأهمية الطب والخدمة الانسانية العظيمة.. وبيكون راسم كمية من الاحلام الوردية الجميلة.. وتمر الايام ونمشي سنة تانية وتالتة ونحن لسة حاسين انو الفي في راسنا هو نفسه الفي راس أي زول ماشي في الشارع (مع فائق الاحترام لكل الناس الماشة في الشارع)..
المهم.. الحاجة العايزة احكيها هي إنو انا ومجموعة من الزملاء حبينا نمشي نتعلم اكتر كيف نطعن الحقن والدربات والفراشة....الخ.. شغل تمريض يعني.. المهم قمنا مشينا المستشفى التابع للجامعة.. وهناك بقينا نفتش في زول يرشدنا .. وما صدقنا لقينا دكتور (...) العظيم جدا في نظرنا .. المهم حكينا ليهو قام دخل غرفة الممرضات سريع وطلع وهو شايل كمية من الابر في يده وقال لينا بالنص ((في آخر الزقاق داااااااااااااك في عنبر الباطنية حريمات وكله نسوان عجايز أمشو اتعلموا فيهم)) قمنا قلنا ليهو كويس لكن دايرين زول معانا يورينا..قام ضحك ضحكة عااااااااااالية وقال ((نحن ما في زول علمنا..انتو ما بتحضروا E.r ..امشو طبقوه جوة..ما مشكلة لو قتلت نفرين الليلة لأنك لما تتخرج حيعيش على يدك الملايين)).. يا زول نحن ما صدقنا ووقعنا ليك طعن في المساكين الجوة ديل (على اساس عايزين نشيل عينات دم) وما خلينا زول إلا وتركنا فيه بصمة (عرق مطرشق..كدمات..آلآم.......الخ) من يومها وانا جاتني عقدة الحقن.. وحسيت فعلا إننا مستحيل نكون ملائكة رحمة..
معليش على الاطالة.. ومشكوووووووووووووور مرة تانية يا السني