للشهيد رحيم المالكي .................................................
مو ميت عدل واكبالي اشوفك دوم
واتامل رحيم لغيبتك رجعه
ماصدك غفل يوليدي عني تروح
مستعجل تريد فراكنة بسرعه
كدامي القلم كل ساعة اشمن بيه
بلكي اعله القلم نيشان من صبعه
وشكد ذكريات مخلي علاوراق
وحجايات حلوة ابالي متجمعه
نقره بدفترك حد ماتطيح عيون
والبوم الصور نشتاق ونطلعه
عيني اعله لدرب من ربعك يردون
اكولن بلكي اشوفن جاي وي ربعه
ويطول انتظاري او وكفتي عللباب
عين اتاني تبقه وعين بالدمعة
راح التعب يمه وذاك سهرالليل
لاجني صدك ربيت وأمرضعه
لاجني ابمهد هزيت الولي عليك
يبني ولمن تمرض قلبي اتصدعه
طكتني المصايب واوجرت وياي
متعنية وعلي بيبانهه مشرعه
يومية انلجم يومية عندي مصاب
وانه اعله المصايب مالي كل جرعه
شريد انسه ييمه منيلي النسيان
هو الجرف ينسه الماي ويودعه
يوليدي العراقية تسولف بيك
لمن تذكر اسمك كلبي اتكطعه
تبقه عيوني تربي مكابله الشاشات
بلكت صورتك لو صوتك انسمعه
ظلمة ليل صارت دنيتي بلياك
يلحارك حياتك للوطن شمعه
انته وكل شهيد الطاح وفه الكاع
ياسيف العراق او مهرته ودرعه
اقنع روحي يمكن لو كلت انساك
بس كلبي الدفنته وياك شيقنعه
