مزيعات بالوســـــائط المتعددهـ ..
جلس حاج احمد على عنقريبه فى ضل الضحى ومدد أرجله قبل أن تعبث أنامل بموجة الراديو الصغير الذى لا يفارقه ابداً الا لقضاء شيئاً ما .. مرت كم دقيقة وهو يدير مؤشر الترددات حتى توقف فجأة عند إحدى المحطات بعد أن جذبه صوت المذيعه الساحر ..
- نستمع الآن الى اتصال هاتفى . الو .. الو ...
- الووووووو
- مرحبا منو معاى ...
- معاك أبكر ..
- اهلييين صديق البرنامج .. أبكر .. بتحب تهدى الاغنية لمنو ؟
- اول حاجة بهدى الاغنية للشعب السودانى بمناسبة الانفصال .
وتانى ليك انتى يا عسل ..
- هاهاهاهاهاهاها
- عجبتك .. طيب والله انتى عسل ومنقه عديل كدا ..!
- هاهاهاهاهاهاهاهاهاهااااااى
- يا بت نحن حنعديها كلها ضحك كدا . ما تذكرى حتى اسم الفنان عشان حقو الادبى وكدا ..
والله شنو يا عسل ..
ينقطع فى تلك للحظة صوت الاتصال الهاتفى قبل أن تدخل دعاية أحدى
المشروبات الكتيرهـ ومسيخه دى ..!
بينما يظل حاج احمد ملصق الراديو فى احد أذنيه يترقب عودة ذلك الصوت الآسر
وتلك الضحكات الصافية ..!
- نعود اليكم سادتى المستمعون وننتقل الان الى مراكز الاقتراع ونتابع الاحداث من هناك ..
- ( الله يحرقك انت والبرنامج الجابيو لينا دهـ )
- انفصال شنو .. ووحدة شنو .. من احداث السلام جات . كل يوم ناطى لينا قرد فى الشاشة
لحدى ما الواحد كرهـ النشره الجوية ذاتو ..؟! هو نحن ناقصيين حركات ولا سكك قطر ياااخ ..
هكذا عبر حاج احمد عن سخطة وغضبه من الانقطاع المفاجىء لبرنامج ( الضحك بقروش ) الذى تبثه اذاعة ( النواعم ) والذى ينتظرهـ بثه بفارق الصبر .!
وهذا ما دفعهو ليرتدى جلبابه الابيض ويحمل عكازهـ وينادى ابنه الاكبر أن ياتى له بتكسى أجرهـ قبل ان يخرج للشارع العام .
وبضع دقائق حتى اخذ الحاج مكانه بجوار سائق التكسى وتدور الونسه
كالمعتاد بينما يجلس ابنه فى المقعد الخلفى .
- على وين يا حاج ..
- ماشى دار الاذاعة .
- عندك تسجيل ولا شنو ؟
- اييى عندى تسجيل بس ما التسجيل الفى بالك ..؟
- كيف يعنى ؟ تسجيل مواليد ولا شنو ؟
- وانت مالك ما تسوق سواقتك وانت ساكت ..!
بينما أبنه . ظل ياكله الحرج مما بدر من ابيه ..!
ودقائق معدودهـ حتى توفق التكسى امام الاذاعة ..
وقبل ان يترجل من العربه حتى رآى تلك المذيعه الرشيقه ,( سيما )
والمخرج ابو جاكومة . والشاعر الكبير , ابو حليمة .. امام باب الاذاعة
- يا جنا .. البلوله .
- نعم يا حاج
- شفتا البنية الزى فريع البان دى ..!
- اييى يا حاج شفتها . دى المذيعه البتقدم برنامج ( الضحك بقروش )
- نعم قلتا شنو ؟ دى يا ها ذاتهااااا . فى ذمتك يا البلوله .. يا سلام وانا اقول الصوت الناعم ده ـ
لا عند النواعم فقط !!
- يا حاج هسى دى شنو دى .. ( تنيص ) زى ( ابو الدنان )
-يا ولد اسكت ساااى على ( بالطرب ) امك اكان زى دى انا من البيت ما بمرق ..!!
- مزيعات أخر زمن .. كرهتنا التلفزيون والاذاعة . الوحده منكشة التقول دقوها فى دقائق قيل
المونتاج ..!
بتاع التكسى يضحك فى الحوار المثير الذى يدعو للدهشة
- اسمع يا حاج انت لو بتعايين لديك !
- اييى مالهن .
- اكان كدى واطاااااتك اصبحت .. ورح حاسبنا خلينا النمشى ..!
وبعدين احلم براحتك ..
البلوله .. الحاج شكلو طشه شبكة ...!؟
سنه يا دار الازاعه
.... بوست روعة سوسو 
....تحياتي
