مشكلة ولازم ليها حل؟؟

[Amru_2t]

مرات تلقى الشاب متجرس و محتار انو يفًهم الوالد عن حاجة زي رغبة في موبايل أو طالع مع أصحابو... تلقى دايما وخاصة في العوائل السودانية مافي تواصل بين الأب والولد .. ودايما تلقى في نقاش أو صراع على موضوع وطبعا أنا كولد لازم أحترم رأي أبوي حتى لو كان بناقض الواقع ... المشكلة التواصل بين الأهل و أولادهم أو بناتم .. في ثغرة في العلاقة بينهم وأنا بعتقد أنو سببها الفرق بين جيلنا وجيل الأهل ... كتير من عاداتنا كعرب أو مسلمين اختفت في الزمن دا و نحنا كبني آدمين مولودين وعايشين في زمن صعب جدا خاصة ونحن عرب و مسلمين بنواجه مشاكل كتيرة في الاختلاط بالمجتمعات الأجنبية .. صاح انو أهلنا عاشوا في زمن صعب .. ما اتوافرت فيهو سبل المعيسة المتوفرة هسي ... لكن لو بنلاحظ انو كل المشاكل في الزمن دا بقت نفسية و الواحد كان قاعد ساكت ممكن تجيهوا نفسيًات و الوقت الفاضي مصيبة بالنسبة للشباب .. المشكلة الأهل معتبرنها طيش مننا .. هو صراحتا الواحد لمن ما يلقى حاجة تشغلوا أو تكون عند موهبة ما قادر يستغلها أو طاقة زيادة ما لاقي يمارس بيها هوايةٌ, ما يقدر عشان عدم تفًهم الأهل .. مثلا في كتير من الأهل ما مقتنعين بي حكاية انو الولد ينسج بين قرايتو والكورة عشان ما يضيع مستقبلو ... وطبعا دا على خلاف الواقع و زي ما بنشوف الأيام دي بقو لاعبين الكورة سلعة مطلوبة و الكورة نفسها بقت ليها مدارس تعليم لأخلاقيات الرياضة و في شروط لانضمامها حتى بعد الدراسة الواحد ممكن ينضم للجامعة ... ودا كلو ما كان متوفر زمان ... و طبعا في موضوع الاختلاط دا هو صاح موضوع صعب يتخت في الأمر الواقع و دايما بتفرق من جنس لي آخر لكن مجتمعنا كلو بقى مختلط و مافي اي طريقة الزول يتجنبا و طبعا يا حليلك كان شافك واحد من الأهل خالط بزفوك عديل وطبعا عادة النقة عند السودانيين كتيرة ... لكن الواحد برضو يخلط بنية حسنة ... المشكلة الناس بقت تاخذ بالمظاهر و بغض النظر عن البيئة العايش فيها الولد أو البنت يجوا يحكموا عليك الناس الكبار (( شنو الصعلقة دي )) ... الموضوع طويل وعايز ليهوا قاعدة طويلا .. هي تعتبر مشكلة كبيرة ولو انحلت ممكن تنحلا معظم مشاكل الشباب ..
أرجو أسمع ردودكم وشكرا

[انتووو كيف ؟]

دا شنو الكلام الكبير دا ياعمرو !!!؟؟ خخخخ
ماشاء الله كلام 100% صح
المشكلة انو اغلب الاهل مابتفهمو الموضوع دا
وفي اغلب الاحيان مابيرضو حتى يتناقشو معانا فيهو
المهم شكرا ع الموضوع وننتظر جديدك ^_^

[شاعر كتوم]

والله ياعمروا ماشاء الله

لكن ربنا يعينك ويعينا

الفرق في الزمن هو سبب من الاسباب لكن برضوا في سبب تاني انو الاهل دايرين يشوفوا اولادهم بصوره معينه في بالهم , وبيعتقدوا عشان يصلوا للصوره دي لازم يستخدموا اساليب صعبه في التعامل معاهم وفي اغلب الاحيان الاساليب اللي بيستخدموها بترجع بطابع سلبي من جانب الولد .
انشاء الله تكون فهمتني

موضوعك حلوا واحيك عليه