ديل ذنبهم شنو

[ود العمارات]

السلام عليكم ورحمة الله وبركاته
اللهم صلى وسلم وبارك على نبينا محمد الموضوع ياشباب الراكوبة الموضوع انحنا ديل ياجماعة السؤال المفروض نسالو لروحنا انحنا ماشين لوين وانحنا حنصل لوين من القاعد يحصل لينا دا طيب ياشباب الشاب السودانى بعد ما يتخرج ماذا يفعل ؟ والحكومة ماذا توفر لكى تساعد هذا الشاب ؟ وهو هل يستطيع ان يفعل شيئا لنفسه ام لا ؟ ؟ والاجابات ياشباب من الشارع السودانى وليس كلام جرايد وليس كلام معارضة .
اولا : ياجماعة نحنا الشباب مظلومين فالشاب السودانى بعد مايتخرج من الجامعة اللى بيكون شقى فيها بحيث انو بدال مايدرس فى 5 سنوات بدرسها فى 6 سنوات ليه لانو فى مظاهرات الجامعة اتقفلت فى اعتصام الجامعة اتقفلت اها الشاب دا تعب وكافح ونهى الجامعة دى باى صورة من الصور بعد التخرج علشان مايستلم الشهادة تعال شوف الرسوم وناس الخدمة الوطنية وييشتغل سنة خدمة وطنية علشان يستلم شهادتو طيب وبعدين المفروض الشاب دا يحصد مازرع صاح لا ماحيحصد اى شىء لانو بعد دا حيكون اما قاعد فى الشارع قدام باب بيتهم ولا مع ستات الشاى ولا شغال بمرتب ضعيف جدا وشغال شغلانية ما فى نفس المجال اللى درسو ولا اخر حاجة انو ابوه حاجة كبيرة والواسطة لعبت دورها والله يعين المساكين .
ثانيا / ماهو دور الحكومة من الكلام اللى قاعد يحصل دا ولا اى حاجة بل بالعكس بتصعب اجراءات استخراج الشهادة بعد التخرج ولا توجد وظائف حكومية وكمان بيجيبو عمالة اجنبية اقل كفاءة من الموجودين فى السودان كما حدث مؤخرا فى سوداتل جابو مصريين و خريجيين جامعة السودان لافين سايقين رقشات وامجاد انا ماضد الحكومةحتى لاتفسر الامور خطأ ولكن دا اللى قاعد يحصل .
ثالثا : الشاب دا ممكن يساعد نفسوا طبعا لا لانو لاتوجد المقومات اللى تخليهو ينهض ويساعد نفسو اولا لاتوجد حكومة تساعد الشاب دا بمبلغ بحيث انو يبدا مشروع وكما تعلمون لاتوجد ايضا مؤسسات خاصة تقرض الشباب مبالغ لكى يعملو مشروع ويسددو كما يحدث فى اوروبا وحتى فى مصر كاقرب مثال فالشاب السودانى لا يستطيع الزواج الا بعد مايحس انو القطر قرب يفوتو علشان كدة ارتفعت نسبة العنوزة بالنسبة للشباب والشابات ياجماعة الموضوع خطير ولازم نشوف شبابنا اغلبيتهم بيهاجرو وبتستفيد منهم الدول الاخرى فى جميع المجالات ونقول بلدنا ليه بتمشى فى التطور البطىء جدا جدا ليه مصر ودول الخليج اللى كنا احسن منهم الان هم احسن مننا واتمنى انو مايطلع لى واحد ويقول انحنا احسن منهم لانو كدا انحنا بناقض فى نفسنا بنكذب على روحنا والله المستعان .