شرك فى صالة الوصول مطار الخرطوم

[ود الجردقو]

انا طبعا مامن محبى الذهاب لى مطار الخرطوم وعلاقتى معاهو زى علاقة حبوبتى الله يرحمها بى المكرونة الاسباجيتى لكن قبل فترة اضطرتنى الظروف استقبل زول هناك مشيت وطبعا مسالة التاخير والعطلة دى مسالة عادية بالنسبة لى وفضلت واقف مستنى لحدى ما الركاب بدوا يجوا مارقين من الصالة وهنا لاحظت حاجة لفتت انتباهى الا وهى مجرى صغير زى الخور فى المنحدر البجوا مارين بيهو الواصلين وطبعا الناس دى شايلة شنط فى عربات ومع اول عربية الشنط كلها اتدفقت فى الواطة والناس بتقول ياساتر والمسافر المسكين بدا يلملم فى شنطة وبعد داك اتحرك ويلا عينك ماتشوف الا النور الناس كلها شنطها بتتوقع فى الحتة دى واحد ورا التانى ولقيت ناس مستمتعين بالموضوع وعارفين الشرك دة من زمان المهم من ركاب التلاتة طيارات الوصلت فى تلاتة مسافرين بس عرفوا يتعاملوا مع الحتة دى ودة طبعا اكيد ناتج من واقع خبرتهم فى التعامل مع مطار الخرطوم والحل هو ببساطة انك تلف العربية بتاعتك بتاعت العفش وتجرها وانت راجع ورا وبى كدة تكون حافظت على وقتك وكرامتك وعفشك من الانكشاح قدام الناس انا بس حبيت افيد اخواننا المغتربين بالمعلومة دى وياريت يعمموها على الناس الجايين السودان ونبقى على الاقل افدنا الناس وماتنسوا تكلموا غير السودانيين برضو عشان يعملوا حسابهم لما يجوا البلد الا هل بلغت اللهم فاشهد
وشكرا

[moukhtar]

والله يا ود الجردقو المشكلة الأكبر من كدا انهم بياخدوا رسوم للخدمات من المغادرين وحتى المودعين والعربات الخاشة والمارقة يعني ولا تقول ما مطار اي شي بقروش من الباب لحدي (المراحيض) يعني الماعندو قروووووووووووووش لا يودع لا يقدم لا يسافر ولا حتى يصل المطاااااااار حتى لو كنت سيد عربية وماشي مشوار بتدغع للبوابة والعجب لو امجاد عملوا ليها رسوم وايصال اتخيل ايصالات جوة المطار .
يعني الجاي يشيل شيلتو ويهيء نفسياتو ويشيل معاو ليمونة عشان بطنو جد حتطم من الوضع 0.
بالجد حاجات غريبة وكل يوم الوضع ماشي اغرب وبعد ده يا هو سودان الحبيب والبلد الحنين وانا من اشد العنصريين لأمدر الحنينة امشي واطير بس في امدر.
وتقبل مداخلتي
حبيبو

[ود الجردقو]

مشكوووووووووووووور حبيبنا مختار احييك واحيي جميع ابناء امدر وكويس انك لفت نظرنا لى حكاية الرسوم دى وخصوصا رسوم البوابات ودى بقت عندنا ثقافة تجى تخش اى حتة لازم تدفع فى البوابة حتى المستشفيات تحس انك داخل جنينة حيوانات مع الاعتذار لكل مرضانا واطبائنا

[soliyaa]

حاجة صعبة و الله ........

شكرا على التحذير ي اود الجردقو

[أبعاج]

أصبروا شويه لغاية ما المطار الجديد يفتح !![/size]

[ود الجردقو]

تعرفوا انو المشكلة فى سلوكياتنا احنا يعنى تلقى المبنى افتتحوهو جديد ونضيف بعد شووية عينك ماتشوف الا النور واحد يجدع علبة فاضية التانى يرمى سجارة التالت يجدع سفة الرابع يلقى الواطة وسخانة يشخبط فى الحيط (تذكار من فلان يوم 4/6/2010 ) ومعاهو بيت شعر الخامس يكتب كلمات نابية المبنى تبقى حالتو حالة وانا خايف المطار الجديد يحصل ليهو كدة الموضوع دة داير حملة اعلامية فى التلفزيون بدل البرامج المسيخة ودعايات الطحنية يعملوا حملة دعائية تروج للمحافظة على النظافة بى صورة جميلة والمسالة دايرة ليها ابداع وحبة تفكير

[sunni]

تعرف يا ود الجردقو،، الشرك ده سلاح ذو حدين،،، أذكر في إجازتي الأخيرة، وبالذات يوم 15 أكتوبر 2008 وقبل وقت صلاة المغرب بشوية، كنت في بوابة المطار أنتظر صديق وأخته جايين من السفر لوفاة والدتهم،، وفي نفس الوقت، كان هناك 3 من جنود الأمم المتحدة بزيهم العسكري وظاهر إنهم منتظرين واحد وبشكل رسمي. بعد شوية جا طالع واحد كمان لابس رسمي، ومعاه ترولي من بتاعاة المطار وشايل فيهم كمييييية من الصناديق الحديدية الخضراء (عدة الشغل) والجماعة جروا عليه وبدوا يطلعوا والترولي قدامهم. طبعاً الشرك بتاعك ما قصر معاهم،، وطرااااخ،، الترولي ضرب،، وبدت العلب تسقط منه،، وقاموا هم يتكبكبوا (باين عليم ما كانوا عاوزينها تتفتح قدام الناس)،،، وفي جريهم برضو واحد إتعثر في الترولي وكان ح يقع،، أنا طبعاً بكره الجماعة ديل كره العمى،، قمت قلت وبصوت ما كنت متوقع إنه الجميع ممكن يسمعه،، قلت ليه (إن شاء الله تقع على قدومك تكسروا)،، بس بسبب الصمت الرهيب لأن الناس كانت كلهم ينظروا ليهم بتقزز يظهر إن كل الحضور سمعوا كلمتي،،، إتفاجأت بأن الجميع كللللللللللهم يردوا على،، وكأننا في صلاة
آآآآآآآآآآآآآآآآآآآمييييييييين

[ود الجردقو]

ههههههههههههههه والله بينى وبينك هم فى واحدين منهم بيستاهلوا لكن اغلبهم ماعندهم قضية ناس عاديين مغلوبين على امرهم بس مرتباتهم كويسة

[ابو انفال]

شكرا ليكم وانتم تحكون عن هذا الشرك والكويس انكم نبهتونا جميعا
لكن يوجد بالمطار عدة شروك منها العمال الذين يحملون عنك العربة غصبا عنك
حتى لو رفضت يصر على ان يضع يده حتى لو فى ظهرك وعندما تصل السياره ماعليه الا
ينظر بعين الرحمة يرجو منك ان تعطيه وفى نفس الوقت لايرضى بالبسيط
انا السنه الماضيه سافرت وكنت مصر على ان اخد عفشى بنفسى ولمن وصلت خارج المطار وفى اثناء سلامى مع المستقبلين تقدم اثنان من الشباب واستلما عربة العفش وطالبانى بان ادفع لهما .ماكان من اخوتى المستقلبين قام واعطاهو 10 الف اخدها وراح .كانه نحن جائين موزع الارزاق وزى ماقالوا شايفين القبه قايلين فيها فكى.

[الامير]

مطار الخرطوم ... وما أدراك ما مطار الخرطوم

والله مآآآآآآآسي قاسية ........ وما خفى اعظم
وربنا يصلح الحال.

[misse10]

انتو بتتكلموا عن اي مطار والله انا ماشايف اي مطار في السودان

[سيد البلد]

أنتا ماتستعجل أستني المطار الجديد هههههههههههههههههههههههههههههههههههه

[صلاح يحيى سليمان]

الاخ ود الجردقو....

نتمنى السلوكيات دى مع المطار الجديد تنتهى...

قول يا كريم.....


الشين عندنا كتير ...ومابرانا.....

[رزان]

تعرفوا انو المشكلة فى سلوكياتنا احنا يعنى تلقى المبنى افتتحوهو جديد ونضيف بعد شووية عينك ماتشوف الا النور واحد يجدع علبة فاضية التانى يرمى سجارة التالت يجدع سفة الرابع يلقى الواطة وسخانة يشخبط فى الحيط (تذكار من فلان يوم 4/6/2010 ) ومعاهو بيت شعر الخامس يكتب كلمات نابية المبنى تبقى حالتو حالة وانا خايف المطار الجديد يحصل ليهو كدة الموضوع دة داير حملة اعلامية فى التلفزيون بدل البرامج المسيخة ودعايات الطحنية يعملوا حملة دعائية تروج للمحافظة على النظافة بى صورة جميلة والمسالة دايرة ليها ابداع وحبة تفكير

معاك حق مية المية الحكاية دايرة توعية بل حملة اعلامية منظمة

بس ياحسرة عالااعلامنا الوجودو زى عدمو..الظاهر ماسمعو

بان الاعلام مثل السلطة..وذلك نسبة لتاثيره المباشر علا الناس

[قمر ام درمان]

ياودالجرتقو شكرا على التنبيه .. والسنة دي
انحنا اجلنا الجية للسودان لغاية الشرك اتصلح
ولا اقول ليك خليها لما المطار الجديد يشتغل .

[al_beyankonery]

انتا عارف المغتربي ديل كلهم يعملو اضراب عن السفر للسودان سنه واحده بس عشان الشرك دا
يعملو ليهم الزلط رخام ويفرشو ورد وياسمين

[spygirle]

شكرا اخوي على النصيحة الحلوة

[hattot]

السلام عليكم ورحمة الله وبركاته
شكرا يا ود الجردقو
ولكن الشرك الحقيقي في مطار الخرطوم العمال الذين ينقلون العفش من الطائرة الي داخل المطار فهم يفتقدون الي الامانة وقد تمت سرقتي ثلاث مرات في هذا المطار فنصيحتي لكم اخوتي الحرص باغلاق الشنط وتامينها بشكل جيد لكي لا تفقدوا ممتلكاتكم .