غيمة وصحرا للشاعر اسامة تاج السر

[مي نور]

مسافر وزادي لمسة شوق
وبسمة فال و حنية
فرح رفرف جناح آمال
مجرتق بي غنا الأطفال
وصوت أنشودة دينية
وصوت عصفور
بداعب النسمة في حضن الصباحية
مسافر، وانت فيني مسافرة
فاردة البسمة في سفن الأماني شراع
بخاف الريح
تمد ألحانا تعزف للوداع غنوات
تغير روعة الايقاع
ويبقى وداع
ودار وضياع
وتترامى المسافة سنين
ويبقى لقانا زي حلم السراب خداع
مسافر، وانت فيني مسافرة
زي ناي الأمل بتغني للأفراح
بتيرب ليك فيني الشوق
بقيت أنا في هواك فلاح
وحبك زي جرح في الروح
مسافر وبالعذاب نتاح
وكت غنت على فرع الهموم قمرية لابسة الطوق
تهب لهب الحنين جواي
وتجرح في الحشا المحروق
بشر أحزاني في جنحيها
والقى جناحا أقصر من حنيني البيا
مابسترلو عورة شوق
فيا قمرية غني ولايهمك شي
وياما كم حزين غنى
ودمع أحزانو مالي وشي
تعالي أشيل معاك حزنك
فياما شلت حزني معاي
وكت كنت العذاب بمشي
مسافر ، وانت فيني مسافرة
زي الغيمة في صحرا
غيمة حنينة ، لكن ما بتبل الشوق
دا جوف الرملة زي جمرة
تعالي على مهل وادلي
انزلي فيني كالمطرة
وكت برقك شلع جوايا
واتكرفت من عبق الدعش حنك
رجيتك بي أمل بسام
وأرعد شوقي ،
بتق زهر آمالي القريب منك
لقيت الريح تلاوي الغيم
تسوقك مني
غصبا عني
كان زهرات هواي يا روحي راجينك
فيا غيمات
عليكن الله ماشفتوها
تقدل بالفرح والفال
ويانجمات
هي فوقكن ضمة ما مرت ؟
ولا مدت عليكن في الهجيرة ظلال
هي أصلو حنيييييينة
ماظنيت تمر من دون تسر البال
دا حتى الطير بيستناها لما تمر
عشان تديهو من لمسة حنانا حنان
وحتى الزهر بستناها لما تمر
تبللو تبقى ليهو أمان
وبستناك بي كل الحنان والحب
عشان بالجد معاك بحس حياتي
واني جد انسان
وكت طليتي في ليل العذاب والهم
واتقاسمت حزني معاي
ومني جريتي مجرى الدم
بقت كل الحياة أفراح
فمرحب بيك
خلاك الذم