العتره

[ابو مصطفى]

العتره
كلمات: خليفه عثمان خليفه

مشيه رشيقه خطوه دقاقه
أبداً ماوقعتي شلاقه
عينيك باب نعاسه متاقه
والسماء والأرض عشاقه
رايداكي الأرض والوقعه
تعبير ليكي عن أشواقه
خوفي عليكي بكره تطيري
لمه تكون سماك مشتاقه

عتبت من وجع تتهادى
في رقه ودلال متناهيه
وعاتبنا الأرض لمناها
وريناها إنها خاتيه
حذرناها ماترميها
فتشي عن وسائل تانيه
تمتمت الأرض محزونه
قالت لي غلبني هوايا
زاد الشوق وقلب قلبي في القلايه
شوق إيه يا أرض جنيتي؟؟
ما يوماتي عليكي ماشه وجايه
وأربعه فوق تلاتين مره
تسجد فوق وشيك صلايه

فندت الأرض أقوالي
بي نفس الوزن والقافيه
اَه أنا من سجوده عليّ
واَه من غيرة المصلايه
كيف تلمس ترابي جبينه
أو زهر الخدود الناديه
وفيها رشاقه ماخلتني
أشعر بيها ماشه وجايه
تلبس لي الكعاب العالي
ماحصل أنغرز في حشايا
سرعه قبل تختو قديمه
ترفعوا للخطيوه الجايه

أرجوك: تمشي مكتوب ريده
لي ست الجمال الأيه
قوليها: الأرض رايداكي
بالبي ما أظنها داريه
حني عليّ حققي لي
مناي ورجايا
تسلمي من زمان الغش
تلاقي وفايا
قلب الريده عندي مداهو
كم قيس إندفن جوايا
حبة ريد وزي ماك دايره
حبي سوايا
باقي المويه والبارد
خساره تخلي في الكبايه
كلما والارض يكفيها
تكشح فوقي فضلة شايا
ضحكتّ عليها قالت لي
دا الإنسان وظلموا معايا
من يادوبه شافعه صغيره
حزّروها بي أوامر ناهيه
ابعدي من التراب ياشافعه
أوعي من عليها تلعبي لاهيه
ناسية الناس إنو أنا أم
عطوفه وحانيه
والإنسان ولد اَدم
واَدم في النهايه جنايه

صبرّت الأرض واسيته
صدّقتك كلامك صاح
إتعكر سماي ناداني
قال ماصاح
البت بتي كانت نجمه
تهدي الراح
تواسي العاشق المجروح
تسامر في البنوموا صباح
قريبه من الأرض ضوّايه
دايماً للبشر ترتاح
وكتين بقت الأرض غابات
والإنسان صبح سفاح
نزلت نجمتي الضوايه
تملأ الدنيا ريد وسماح
وأقسمت الأرض ترعاها
حتى تصوم من الكتاح
وتتوحم عليها المنقه
والأنناسه والتفاح
وتهدي أنفاسه للياسمين
شذى الفواح
ولمه اشتاق
أقالدا بالمطر وإنداح
وأريح باله زين وأرتاح
وماحوى إتفاق بيناتنا
قصة ريده للإصفاح
وأضطرب السما إتعكر
وزمجر وصاح
ودنقرت الأرض خجلانه
تستسمح سماها سماح
قالتلوا العهود مرعيه
وأعتبر السمعتو مزاح
والريد مرتبط بالروح
وللسما تصعد الأرواح