الزواج العرفي .. يا شباب ( من ألفية الزواج الغرفي )

[الطاهر التاي]

يا بت الرجال ............. بالله ..... لا تتغري
ورا معسول الكلام ............. بالله لا تنجري
وبالنضم المنغم ....... باكر..... كتير تنضري
والمزروع في الحشا ميـن بـكره ليهو يضري
وباللبس الـقـبـيـح ...... يـا بنيه ..... لا تتعري
والبنت الأديبه... كيف .... لي شرفها تعري
وتمشي .... ورا الحبيب ..... مفتونة لا تـدري
وتندمي .... في الأخيروكتير... كتير تنضري

يا بنت الرجال ....... الما بعرفو ..... الشينه
كيف ..... تبهدليهم ..... وتجيبي ليهم .. شينه
وخلاص .. ضاع شرف ما كنت والله أمينه
وأمك ....... يا العويره .... أمك ... المسكينه
من الحريم تتضارى .. وحيده عايشه حزينه
وشوفي كيف بي سببك أمــك حـبيسه رهينه

زوجك ... يا الهميله ...... بالله وين عنوانو
وين بيتو .... وين صيتو .. وين .... ديوانو
وين أمو ...... وين أبوهو ..... وين اخوانو
وين دربو ....... وين أهلو .... وين جيرانو
وليه ما كلم ابوكي ..... ليه ... يا حلوه خانو
وجاكي .. براكي انتي ... جمَل كلامو ولانو
وبعد الضياع مين يسأل عنك وعن عـنوانو
وغيرك ياما كتير ..... خابو .. وكمان هانو
وكتير .. ياما ضاعو بالعرفي... كم كم هانو

يا بنت الرجال .. درب الضياع.. مــعــروف
ويا بت الرجال .. درب الزواج .. مـوصوف
ومن زمنا قديم ..... الزيجه ...... بالمكشوف
ودرب العفه ... ظاهر.. ما دايرلو ابدا شوف
ومافي شي دسوهو .... كل شي .... مكشوف
ولازم يكون زوجك زول دين حيا ومعروف
وخلي بالك اوعه ..... من الندم .... والخوف
ولو عشنا ياما نشوف وياما وياما ... نشوف

يا بنت الرجال ...... لا تأمني ....... الأيام
لا تعيشي كتير.... أوهام هوى ..... وغرام
وتعيشي مع الغريب.. في كوم من الأحلام
وباكر بس .... يسيبك .. في ظلمة الإظلام
بعد ما يقضي وطرو ..... يخليكي للأوهام
ولو عاش سنين وياكي ... في مخدع الآثام
باكر .. يمشي.. يسيبك حطام ... في حطام
وتبقى سيرتك والله .... في وسائل الإعلام
ومين يقبل أم ... وود سفاح ........ وحرام
وبنت الرجال والعز .... كيفن كتير تنضام
بعد النور والهنا ..... كيفن تعيش في ظلام
ده حرام ... يا خله وحرام كمان... وحـرام

يا أهل البنات ....... باركو الزواج السـاهل
بالمهر القليل ... لي شاب .... كريما فاضل
وكمان ساعدوهم ..... لا تجيبو انتو مشاكل
وباكر يسعدوكم ....... يجيبو غيث ومناهل
بدل ما يمشو للعرفي ويكون زواجهم باطل
والدنيا تولع نار..... والكل يشوف الحاصل

يا بنت الحلال ... لا تبقي جاهله... عويـره
ومعسول الكلام ... يجر هلاك .. وجريـره
ولحظات السعاده ... في العرفي ديمه قـليله
والزواج في السر .. دايما عواقبو خـطيـره
لا فيهو ناس حضرت بجموع كثيره غفيره
لا فيهو زفه وفرحه لا فيهو لمه ... وسيـره

يا أهل البنات ....... بالله ........ يا غافلين
ويا اخوان البنات ....وكلكم ....... فاهمين
كيفن البنيه تضيع ..... وانتو .... ما دارين
وكيفن شرفها يداس .... وانتو ما عارفين
وين النخوة ..... وين ... الرجولة ... وين
ويوم يقع البلا ...... تكونو .... زهجـانين
تتنكد ... حياتكم .... وتبقو ....... بطالـين
وتضيع البنيه .. وتاني ..... البجيها.. مين
وفي الحله.. ياما تكونو.. تكونو معزولين
وتتساءل ألوف.. ديل كانو كيف عايشين
وتمشي المذلة تدور سـنين كمان وسـنين
اصحو ... يا اخوان .... اصحو يا نايمين

[محمدالرشيدمحمداحمد]

احيك علي هذه المساهمة الهادفة ...
احيك وانت تسخر قلمك لمعالجة مشاكل المجتمع,,,,
لك التقدير وتقبل مروري

[دعاش كردفان]

[align=center]عمنا الفاضل والكريم الطاهر
لك التحيه على كل كلمه قلتها وربنا يخليك
ويديمك فى منتدانا وبرحب بيك كثير
فى منتدى انا سودانى وربنا يكتر من امثالك
ودمت بكل الود
ابنتك دعاااااااااااااااااااااااااااااش[/align][/size]

[سحر محمد]

اخي الطاهر تحياتى لك على كل كلمة كتبتها

لك الشكر على كلماتك الرائعة

ودائما فى ابداع

ويكثر من امثالك

تقبل تحياتى اخي

[الطاهر التاي]

محمد
دعاش
سحر
اشكركم على المرور والاشادة بشخصي الضعيف آملا أن أتمكن
من المشاركة معكم في هذا المنتدى الرائع بما يكون في مستوى المننتدى


مع محبتي ..... وكل الود

[the magic]

مشكور على الرائعة ومزيدا من التقدم

[الطاهر التاي]

The magic

وأنت كذلك مشكور على مثابرتك في الرد عاى قصلئدي
المتواضعة التي أنزلها في هذا المنتدى الجميل.
آملا أن أحظى برضاكم وتقديم ما يفيد ... بهذا الجهد المتواضع .

مع محبتي .... وكل الود

[احسان]

[grade="00BFFF 4169E1 0000FF"]يا الله عليك بصراحة

نصيحة ولا اروع وطريقتك خطيرة

القصيدة جميلة شديد دايما مبدع انت

بنستني الجديد كمان وكمان

تحياتــــــــــــــي[/grade]

[احساس الكون]

والله والله فى قمة الروائع يا اخى وبارك الله فيك

[الطاهر التاي]

احسلن
مشرفتنا الرائعة... حضورا وبيان
وألقا جياش ......... وشذى وسنان
أشكرك على المرور ...وأنا سعيد بتواجدي معكم في هذا المنتدى الجميل

مع محبتي ..... وكل الود

[الطاهر التاي]

احساس الكون

شكرا يا حساس يا رائع ... وده كله من ذوقك ,,, وشفافيتك .
أشكرك .
مع محبتي ..... وكل الود

[الشاعر]

لا فض فوك ياخ

[الطاهر التاي]

الشاعر
لك محبتي .... وامنياتي الطيبة وعيد مبارك وسعيد
وأشكرك على المرور

مع محبتي ..... وكل الود

[أبو أحمد]

والله كلامك مليان شديد.

[الطاهر التاي]

ابو أجمد

شكرا يا صديق الحرف .... ولك ودي ..

وكل محبتيى