مقتطفات من ... ألفية الزواج العرفي أم الشرعي ؟؟؟

[الطاهر التاي]

الزواج الشرعي ..... أم الزواج العرفي ...؟؟
أولا .... مقدمات

يا بت الرجال ............. بالله ..... لا تتغري
ورا معسول الكلام ............. بالله لا تنجري
وبالنضم المنغم ....... باكر..... كتير تنضري
والمزروع في الحشا ميـن بـكره ليهو يضري
وباللبس الـقـبـيـح ...... يـا بنيه ..... لا تتعري
والبنت الأديبه... كيف .... لي شرفها تعري
وتمشي .... ورا الحبيب ..... مفتونة لا تـدري
وتندمي .... في الأخيروكتير... كتير تنضري

يا بنت الرجال ....... الما بعرفو ..... الشينه
كيف ..... تبهدليهم ..... وتجيبي ليهم .. شينه
وخلاص .. ضاع شرف ما كنت والله أمينه
وأمك ....... يا العويره .... أمك ... المسكينه
من الحريم تتضارى .. وحيده عايشه حزينه
وشوفي كيف بي سببك أمــك حـبيسه رهينه

زوجك ... يا الهميله ...... بالله وين عنوانو
وين بيتو .... وين صيتو .. وين .... ديوانو
وين أمو ...... وين أبوهو ..... وين اخوانو
وين دربو ....... وين أهلو .... وين جيرانو
وليه ما كلم ابوكي ..... ليه ... يا حلوه خانو
وجاكي .. براكي انتي ... جمَل كلامو ولانو
وبعد الضياع مين يسأل عنك وعن عـنوانو
وغيرك ياما كتير ..... خابو .. وكمان هانو
وكتير .. ياما ضاعو بالعرفي... كم كم هانو

يا بنت الرجال .. درب الضياع.. مــعــروف
ويا بت الرجال .. درب الزواج .. مـوصوف
ومن زمنا قديم ..... الزيجه ...... بالمكشوف
ودرب العفه ... ظاهر.. ما دايرلو ابدا شوف
ومافي شي دسوهو .... كل شي .... مكشوف
ولازم يكون زوجك زول دين حيا ومعروف
وخلي بالك اوعه ..... من الندم .... والخوف
ولو عشنا ياما نشوف وياما وياما ... نشوف

يا بنت الرجال ...... لا تأمني ....... الأيام
لا تعيشي كتير.... أوهام هوى ..... وغرام
وتعيشي مع الغريب.. في كوم من الأحلام
وباكر بس .... يسيبك .. في ظلمة الإظلام
بعد ما يقضي وطرو ..... يخليكي للأوهام
ولو عاش سنين وياكي ... في مخدع الآثام
باكر .. يمشي.. يسيبك حطام ... في حطام
وتبقى سيرتك والله .... في وسائل الإعلام
ومين يقبل أم ... وود سفاح ........ وحرام
وبنت الرجال والعز .... كيفن كتير تنضام
بعد النور والهنا ..... كيفن تعيش في ظلام
ده حرام ... يا خله وحرام كمان... وحـرام

يا أهل البنات ....... باركو الزواج السـاهل
بالمهر القليل ... لي شاب .... كريما فاضل
وكمان ساعدوهم ..... لا تجيبو انتو مشاكل
وباكر يسعدوكم ....... يجيبو غيث ومناهل
بدل ما يمشو للعرفي ويكون زواجهم باطل
والدنيا تولع نار..... والكل يشوف الحاصل

يا بنت الحلال ... لا تبقي جاهله... عويـره
ومعسول الكلام ... يجر هلاك .. وجريـره
ولحظات السعاده ... في العرفي ديمه قـليله
والزواج في السر .. دايما عواقبو خـطيـره
لا فيهو ناس حضرت بجموع كثيره غفيره
لا فيهو زفه وفرحه لا فيهو لمه ... وسيـره

يا أهل البنات ....... بالله ........ يا غافلين
ويا اخوان البنات ....وكلكم ....... فاهمين
كيفن البنيه تضيع ..... وانتو .... ما دارين
وكيفن شرفها يداس .... وانتو ما عارفين
وين النخوة ..... وين ... الرجولة ... وين
ويوم يقع البلا ...... تكونو .... زهجـانين
تتنكد ... حياتكم .... وتبقو ....... بطالـين
وتضيع البنيه .. وتاني ..... البجيها.. مين
وفي الحله.. ياما تكونو.. تكونو معزولين
وتتساءل ألوف.. ديل كانو كيف عايشين
وتمشي المذلة تدور سـنين كمان وسـنين
اصحو ... يا اخوان .... اصحو يا نايمين



ثانيا .... في الزواج الشرعي

يتلمو الرجال .. جالسين .. صفوف وصفوف
وأهل الشاب والبنيه قاعدين كتوف في كتوف
مافي دخيل وحاسد ..... او زول كتير ملقوف
والمأذون يجي .... يكتبلو .... أغلى.. حروف
والحله كلها تشهد ..... ويبقى الزواج معروف
وبالتمر والحلوى ......... أخو عريسنا يطوف
ونسمع الزغريد .... وكمان.. رقيص ودفوف
وكلو زول ..... فرحان .. كتير ..... وشغوف
والعريس .. يتبسم ... وهناك .. امو .. تشوف
وأبوهو.. جاب المال ... ما طلبو منو.. ألوف
والعقد .. خلاص تمً .. وباقي الشباب ملهوف
وتمنو السعاده .... بدرب عديل .... معروف
ما طريق الضياع .... الكلو هم ... وكسوف

كان ياما كان في هذا الزمن وغابر الأزمان
الزواج الشرعي... فرحه ولمَه لكافة الحبان
وكبار الأهل .. والحله.. هناك... في الديوان
وكل الشباب جالسين.... وكافة .... الجيران
مبسوطين كتير... فرحانين كمان.... وكمان
والفرحه .... يا اخوان .... في كافة السودان
وفي عزه وشرف ..... وجه السعاده ... بان
وزفوها البنيه ... وعريسه .... كان فرحان
ومشت ... البنيه لبيته .... الحلوه ذات الشان
بعد ما غنو ليها كتير.... أعذب ..... الألحان
وكانت ذكرى جميله ..... جميله... يا اخوان
وكلو شابه تمنت ... عرسا بـديـع ..... فـنان
تشوفو كل الحله ..... ويبقى الجميع فـرحان
وبعد الفرح واللمه... عاش الجميع في امـان
عاش الجميع في سعاده وثبتت ....... اركان
مافيش هناك مذله ..... ومافيش هناك هوان
ومافيش هناك كذوب ومافيش هـناك خـوَان
ومافيش هناك لعوب ومافيش كمان خذلان
.........................................
.........................................
.......................................
وتثاءبت حورية ... وغفى الزمان فرحان
وبعد شهور عاشوها .. كان عندهم تيمان
والفرحه جاتنا تغني .... تلف على الحبان

ثالثا ..... الزواج العرفي

في الزواج العرفي ... شوفو البنيه وحيده
من بعيد جابوها .. أسروها.. زي الصيدة
معاها بنت .. بنتين في عزله قاسيه شديده
والزوج المخادع .. جاب الورق وفصيده
قام في مكر ودهاء ... أكاذيبو تاني يعيده

الزول المخادع ..... جاب الورق والشله
وفي وكرا بعيد ...... خارج نطاق الحله
وبدون فرح ....... وبدموع كتيره وذلـه
شهد الشاهدان ... وضحكا .. بدون عله
ومن بين الجميع .. شيطان كبيرا .. طلَ
قال يا سلام يا شباب جيبو الشراب يلا
وذبحوها البنيه .. ضاع الشرف يا خله
خدعوها البنيه ...... هدو البيوت يا خله
ضاعت يا سلام ... بنتا غريرة .. يا خله
ضاع الشرف ياناس....يا كل اهل الحله
بالله مين غلطان ...... ووين تكون العلة

ثم ماذا ... ؟

بعد كم شهر ... بان في حشاها ........ جـنـيـن
وصار يومه كلو عذاب.. صار... بكاها أنـيـن
وبقت الفضيحه فضيحه ليها الجميع عـارفـين
وزي نار الهشيم .... عمت شمال ..... ويمين
وهرب حبيب القلب ... خلاها ..... يا سامعين
وضاعت خلاص يا ناس وبقت من الضايعين
ولو قتلت جناها ... النار ... هناك .... لي مـين
ولو رضت بخزاها .... مين يرضى بالخـاينين
وتاني وين بس تمشي ... بعد الخراب والشـين
.......................................................
............................
يا اخوتي يا كرام ............ يا ساده يا فاهمين
ما شفتو كيف العرفي ...... ضيع بنات وبنين
ويا ربي استر شبابنا من هذا الوبى ...... آمين
ويا ربي ... حصنهم .... بالعفاف ..... والدين
ويبقو دايما .... دايما .... يا ربي .. مستورين
واسعدهم يا ربي .... ويبقو ناس ...... زينين
وهنيهم .... ياربـي ..... بالعـديل ..... والـزين

[ويبقــى الأمــل]

الله يعطيك العافيه

\\\\\\\\\\\\\\\\\\\

كلمات في غاية الرووووعه


\\\\\\\\\\\\\\\\

الله للا يحرمنا من جديدك


\\\\\\\\\\\\\\\
تحـــــــــــــــــــــــــ ويبقــى الأمــل ــــــــــــــــــاتي

[الطاهر التاي]

شكرا
ويبقى الأمل
وأرجو أن يسهم هذا الجهد المتواضع في توعية الشباب من الجنسين
بمزالق ومخاطر الزواج العرفي .

محبتي ..... وكل الود

[waya]

تسلم يا رآقي على الكلمات الحلوة والمعبرة

وفي انتظار الجديد

وخليك مواصل

تشكراتي

[الطاهر التاي]

Waya
أشكرك أيها المشرف النشط عاى المرور والإشادة
سائلا المولى العلي القدير أن يحفظ شبابنا من شرور
هذا الزمن العجيب ؟؟؟؟

مع محبتي .... وكل الود

[محمدجدو]

مشكور الاستاذ الطاهر التاى
على هذا الرصف الجميل
وحيقة ما قلت الا الصواب

[أبو أحمد]

كلام جميل خالص خالص و الله

[الطاهر التاي]

عزوز
ابو احمد
شكرا يا شباب على المروروالتعليقات الجميلة
وربنا يقدرنا على رضاكم .

مع محبتي ...... وكل الود