أصعب 24 ساعه في حياتي

[ibn batoota]

القصه بدات من ميناء زايد في ابوظبي لما ابحرنا قاصدين الهند، شآن تكونو معي في الصوره انا شغال ضابط لاسكي سفن والرحله دي من الاول انا قلبي كان مقبض منها لكن ضغوط المسؤليين اجبرتني اسافر فيها المهم طلعت السفينه ميناء زايد في آمان والرحله تستغرق حوالي إسبوع لغايه ميناء مومباي في الهند بعد حوالي 18 ساعه من الإبحار طلعنا من المياه الإقليميه حقت الإمارات وحاذينا سلسله جبال عمان وبعد ثلاثه ايام من الإبحار طلعنا من الخليج العربي وحاذينا مضيق هرموز بين الخليج وبحر العرب وفجآه جاتنا ليك عاصفه مبالغه فيها والبحر كان طالع اساسا حوالي 7 قدم نسيت اقول ليكم إنو في نشره جويه بتجيني عن طريق الإيميل من الشركه كل 72 ساعه توضح لي سرعه الرياح وإتجاها وآحوال القس في البحر حايطلع كم قدم والمناطق المتآثره بي طلوع البحر يعني weather forcast شامل لي كل حاجه خلال ال 72 ساعه القادمه لكن اول مره إقتنع بي مقوله (كذب المنجمون ولو صدقو) لانو كن عندي في النشره إنو البحر طالع 5 قدم وحايذيد لغايه 7 قدم وبعد داك حايكون ماشي نازل مافي اي حاجه العاصفه الجات دي المهم انا بي دوري مررت النشره لي الكابتين كالعاده ، بس إتفاجنا بي العاصفه والبحر ماشي في ذياده من 7 وصل 15 قدم والدنيا كانت ليل ولسه البحر ذايد يعني الباخره بقت ذي القشه في نص البحر لي درجه الموج بقي يدخل من جهت اليمين في السفينه ويطلع من من الشمال إتخيلوا حتي الكبابي والعده الفي الميس والمطبخ بقت تتكسر وتقع انا بي دوري عملتا alrm إنو السفينه في وضع حرج شويه وكل الناس تلبس life jecket وتتوجه لي محطات النجاه، اكتر حاجه كانت مؤلمه إنو الكابتين المفروض يكون اكتر واحد حريص علي سلامه الناس والسفينه آخد الموضوع مجرد مغامره هو داير يستمتع بيها وذي ماعارفين إنتو الخواجات يموتو في المغامرات المهم قدر ماإتكلمنا معاهو علي اساس نرجع إيران بإعتباره اقرب دوله واقرب ميناء لينا لكن لا حياه لمن تنادي حتي الإتصال بي فرق الإنقاذ الجويه رفض حتي EPIRB رفض نشغلو ده جهاز بيعطي إشارات لي كل البواخر الموجوده حولينا إنو في سفينه في الموقع الفلاني عايزه مساعده طبعا حاتستغربو كيف ممكن تساعدنا في جو ذي ده لانها هي ذاته ممكن تتعرض لي نفس حالتنا؟ اولا نحن سفينتا صغيره والبحر يا ما فيه بواخر اضعاف اضعاف سفينتا وذي البواخر دي الثاثير بكون خفيف عليها واغلبه بواخر جديده ماذي حقتنا من سنه 1963 ماشه في البحر المهم الكبتن داقي جرس ومبسوط سجاره وراء سجاره ونحن خلاص قولنا جاك الموت ياتارك الصلاه لي درجه في ناس إتصلت بي اهله وودعتم، انا وكل المسلمين في الباخره قعدنا في المسجد نقرأ قرآن وندعي ربنا ينجيا نحنا معتكفين في المسجد 22 ساعه لغايه ماربنا إستجاب لي دعانا ودموعنا وهداء البحر شوية وعدينا مرحله الخطر بفضل الله سبحانه وتعالي واول حاجه لما وصلنا الهند نزلنا صليا ركعتيين في جماعه حمدا وشكرا لله. نسيت اذكر ليكم حاحه انا هسي انا بكتب ليكم القصه دي انا في نفس الباخره وبرضو في الهند. بالمناسبه انا مصور جزء من اللحظات دي لكن ماعارف كيف انزلو ليكم كيف في المنتدي.

[osama77]

والله موقفك رهيب عديل لكن تصدق انا كنت أتمنى أكون معاك عشان بحب المغامرة زي الكابتن الخواجي.
شكراً على الموقف

[ibn batoota]

شكرا ياسمسم علي المرور لكن صدقني كنت حاتدق جررررررس طووووويل ذي كده

[بت أبوظبي]

الف حمد الله على السلامه .
والله حكايه ولا في الأفلام !
تايتانك عديل !!

في النهايه ..
تذكرت قوله تعالى ( أمّن يجيب المضطر إذا دعاه ويكشف السوء ) صدق الله العظيم
في انتظار الصور

شكرا

[ibn batoota]

شكرا يابت ابوظبي لكن الصور انا بحاول انزله بس ماظابطه معي لانها تقريبا ذي الفليم الرجاء من الإخوه العندهم خبره الإفاده

[حزن السنين]

و الله الف حمد لله علي السلام و بعدين قالوا العمر ما باذقة و يازول اعمل حسابك شديد
و لو لقيت ليك شغلانا تانية حاول تكون في الارض و لا شنو ..

[ibn batoota]

والله ياحزن السنين ظروف صعبه ومعايش تقليله قول يالطيف وشكرا علي التفاعل

[الدكتوره]

حمدلله على السلامه
وانا مع حزن فى رايه
وياسيدى ربنا يوفقك ويرجعك بالسلامه

[Still I Need U]

[align=center]يا ابن بطوط اول حاجة حمد الله على السلامة ،،
الحاجة التانية اناعارف اكل العيش صعب يا اخوي ،،
لكن الجابرك شنو يا خي على الشغلاية البتجيب قلب بعيد عنك دي ؟
ياخي ربنا يوفقك ويغطي عليك ويحميك لكن زي ما قال ليك حزن
حاول بقدر الأمكان شوف ليك شغلانية تانية
انا لو في محلك على القسم لو ابطل الشغل عديييييييييييييييييييييييل
بقول ليهم ما داير ،،[/align]

[ibn batoota]

والله يا still i need u البحر بي رغم الفيهو ده ارحم كتير من الارض وناسا

[العسوله]

الف حمدلله على السلامة ابن بطوطة
والحمدلله جات سليمة ,,,,, ما تنسى ربنا معاك ان شاء الله
لكن بالجد مهنة خطيرة ومليانة مغامرات يلا احنا دايرين نشوف فيك البطل
تقبل تحياتي

[ibn batoota]

تسلمي ياعسوله وإنشاءالله دي آخر رحله لي في البحر ده آخر قرار إتخذته
وشكرا علي المرور مره تانيه ياعسوله

[شاربة توت ولابسة بوت]

كفاره يا رحالتنا ..
وخطاك الشر والسوء ..
وفي حكايتك تأكيد لقوله تعالى ( ادعوني استجب لكم ) صدق الله العظيم .
وما قصرت وتشكر ..

[صلاح يحيى سليمان]

ابن بطوطة......ياخى انته ما الابطال المجهولين ذى ما بقولوا...!
وبعدين يا جماعة لو ود بطوطه خله البحر والتانين نزلوا كلهم
الارض...اها البصدر لينا قطنا ...بترولنا...وسمسم القضارف
منو؟؟؟؟؟؟؟؟؟؟؟؟؟؟
خلاص نوقف برضو شغل الطيران...ونرك نقعد فى الواطه....!

تحية لكل ابطالنا المجهولين لكل ما يبذلوه من مخاطر.....!
وربنا يحميكم.....!

مع تحياتى

[ibn batoota]

توثه اشكرك علي المرور الدائم.....
وأثني علي كلامك (أدعوني أستجيب لكم) صدق الله العظيم.
تسلمي علي المرور عزيزتي توته....
ولك كل الود

[ibn batoota]

عزيزي ابو راشد..... تحيه من علي البعد وأنت تعطر مرورك دائما بباقات من الورود والرياحين...

والله يا ابوراشد لو السودان متوقف علي نزولي من البحر..... ان مستعد اقعد عمري كلو بين المحيطات والبحار........ وكلو عشان السودان..........

لكن الحال يغني عن السؤال.........

لك كل الود والإحترام

...

[سالى]

ابن بطوطه حمد الله على سلامتك والحمد الله عدت على خير

[بنت سدن دن]

حمد الله على السلامة .
والله دي قصة حقو تنعمل فيلم ههههههههههههههههههههههههههههه.

[سودانية صريحة]

حمدالله على السلامة ياابن بطوطة وأنا بحييك وبحي كل الكانو معاك على جهودهم وصبرهم ، الله يغطيكم

.

[spanisheyes]

انا اتخيلت نفسي بحضر في فيلم والله قصة

مخيفة وربنا ستركم انا بقدر ما بحب البحر بقدر

ما بخاف منو حمدلله علي السلامة ومشكور علي القصة


المشوقة