منوعات شعرية

[امال الناس]

يابوى سلام


ما شفت يا ابوي حال الخلوق
يا يابا عاااااااااادي الناس تسافر
لا وداع لا حن وشوق
يا يابا عادي الناس تلهلب في المزامير الحروق
وببيعو في السوق العروض
ببيعو في السوق العروض
حتى المشاعر ليها سوق

[امال الناس]

يا ابوي سلام
يا ابوي دحين ارقد قفا
صح يا ابوي الناس هناك ممزوجة بي طيبة و وفا
و بالحن و بي معنى الأمان والريدة ديمة مسرفة

[امال الناس]

لكن تعال شوف المدن
معجونة بي طينة التحضر
وفيها حبة عجرفة
والناس ملخبطة بالجفا
ومكتومة لا بتدور تجيك
لا دايرة منك معرفة

[امال الناس]

ودة كلللو هيين يا ابوي
بس يا عزيزي المشكلة
والمعجزة
في البندر آ يابا الحبيب
قايلين علينا
اهل العوض ..
استغفر الله العظيم

[امال الناس]

...

ياهو العوض
سيد الرجال ال ما بخلي اللوم قفا
ياهو العوض دخري الحريم
سكينو ساللها للضبح
وايديهو لي كرم الخلق
يا حلة ديمة مكفكفة
يا الدمعة في خد الخلق
نزلت بلا ما يكفكفا
...
يا ابوي سلام

[امال الناس]

جيتك براي

جيتك براي
خاطراً موشّـــــح بالشحوب
وعـــــداً مـــــزازيهو الدوَار
جيتك براي
لـــمن قِست كـــــل الدروب
صيف المحطــــــــــات الغبار

[امال الناس]

جيتك براي
لمن هدم عزمي الغــــــروب
وارهقني ليل الإنتظــــــــــار
جيتك براي
جيتك مهاجر من صَحَـــــاي
من دمّي من همّي وعـــناي

[امال الناس]

جيتك براي
من نبضي من إيقاع خُطــاي
من إنتماي لي فيض أســاي
جيتك براي
قيسابي من تمـــر الهَــبوب
قبضـة حصى وفيضان ودار

[امال الناس]

جيتك براي
ميلادي من رِحم الهـــروب
شهقة خُطى وبعض انكســار
جيتك براي
واا شوقي لي همساً طروب
مرتع صِبا ونسمــة نهـــــار
جيتك براي ....

[امال الناس]

كُنا ؛ وما كان ، كان!!

كُنا ؛ وما كان ، كان!!

أبوبكر يوسف إبراهيم

17/8/1974

كـنا.. وأصـبحنا .. فـلا جـدوى مِن ذكـرنا للحـب والنجــوى

ما كـان كـان .. ولـن يُغَيـّرهُ فيـض مـن العبرات والشـكـوى

وعتابـنا مـا عـاد ينفعـــنا .. مهــما تسلــــسل لـيـــناً رخـــوا

أيـامنا ذبلـت نضارتـها وغــدت حــكايا حـــبنا .. لغـــــــــوا

والـذكريــات تمــرُ فـي كســـلٍ وكأنـها مخلوقـــــــةً ســــهوا

تمضـي بلا شـيٍ يخالجـــني لــو طــاف بـي.. فلربـما عــفوا

مـا عُـدتِ أغنيــةً علــــى شـــفتي ما عدتِ لحنـاً نــاعماً حـلوا

مـا عـاد وجهُك مشـرقاً نضــراً يوحي إلى الشــعر والشـدوا

لا شـيء في الأحداقِ يجذبني لا حب.. لا إيمان.. لا سـلـوى

أنــا لا أرى فـيها سـوى حُــفرٍ مطموسة الجــدران والمــأوى

والخصـلة السـوداء ما بقـيت فـوق الجــبين تُظــللُ الصـَحْوَا

عبثـاً .. دموعـك لـن تُغَيــرُني لا تقــدر الدنـيا ولا تقـــــوى

لا أستطيع رجـوع مـا قطعــت قدمـاي .. إني أسرقُ الخطوا

أنـتِ انتهـيتِ لـديّ مـن زمـنٍ مـذ رُحْـتِ تحتــرفين ما أهـوى

مـا بــيننا فـرقـدٌ يُبــاعِدُنـَا .. كـالفـرقِ بيـنَ الشـركِ والتقـــوى

لا تـأملي فـي الـوهم واصطبري قـد تعثريـن غـداً عـلى مـثوى

فالـوجـد مـات ونــاره خمدت وبرئـتُ مـنه.. ولـم يعـد شــجوا

وإذا بحـثِ اليـوم لـن تجـدي حــباً ..فقــد أشــبعته محـــــــــواً

[امال الناس]

نضال

ولا تهتم يا يابا
ولا يهمك كتير يابا
بناكلها كسرة بي موية
وبنحمد ربنا الجابا
وهي ذاتها كتيرة أصلاً جات
قبيلي ولا حلمنابا

[امال الناس]

ولا تهتم يا يابا
ولا يهمك كتير يابا
بناكلها كسرة بي موية
وبنحمد ربنا الجابة
وهي ذاتة كتيرة أصلاً جات
ذاااتو كتيرة أصلاً جات
قبيلي ولا حلمنابا

[امال الناس]

وما دام العيش في ما بنجوع
ودي المقسومة نرضابا
وسعاد والله في جمبك
جرعة الموية نهنابا
ودحين لا تزعل آ يابا

[امال الناس]

بتتذكر زمان يابا
بنتقلقل من البندر
عشان في الحلة نقضي العيد
ونفرح يابا حد الفرحة ما تلحق
دروبا تصيد
ونتوكل على الحلة

[امال الناس]

ونسافر في طريقا بعيد
وناصل مهرجان أعياد
وحس الفرحة صوتها يزيد
ونلقى الحلة راجية نجي
سرامس الشاي
قعاد الضل

[امال الناس]

فرح حبوبة بالجية
وبدخلوا ناس وبمرقوا ناس
كتار بالحيل وما شوية
وترضي منو وتخلي منو
ودة يقول ليك تعال لا جاي
ودة يقول ليك تعال لا جاي

[امال الناس]

هدة الويكاب
ودي أم تكشو
وهدي الكسرة
وهدي الشية
وهنا الحروم
ونسة البن
رمي الودعات
بنية الصرة والويحيد
وأجبدي عليكي دي الشية
وتحتار إنت تاكل كيف

[امال الناس]

قبيل جوك سبعة نفس الحال
وقدامك كتار آ يابا
مرضاتم دروبها طوال
ويبقى الحال هو ياهو الحال
شجرة الضل .. وريحة الفل
ويبقى الكل أهل طيبين
بسترو الحال

[امال الناس]

أكان بق الزمن نيران
وتقابة الفكي أمحمد
ضيوف الخلوة والحيران
وصوتك يابا لامن تقرأ لما ترتل القرءآن
وكضاب البقول بحبس دموعو حداك
ملان شيطان

[امال الناس]

صباح العيد يجو الشفع
ونحنا الدهشة ما خالانا
نفهم حاجة حتى الآن
بسوقونا الصلاة ونمرق
نبارك العيد على الجيران
تصحح إنت معلوماتنا
ديل أهلنا ما جيران