جميع المغتربين(( هل لكم نية في العودة الى السودان))؟؟!!

[asool22]

طبعا بس بعد افتتاح مشروع السنط عشان انا نفسي في شقه على النيل انشاء الله

[saro0ona]

أشكركم كثيرا على مروركم ...
واتمنى الله يحقق امانيكم...

والما عايزين يرجعوا ليه كده؟؟:017

[جذاب وما كذاب]

عليك الله العاجبك في البرياني شنو ما عايز ترجع .؟؟؟؟تحياتي لك وا حترامي
***********************************************************************
و الله انا اخر مره رجعت السودان كان قريب عديت هناك اجمل الايام و احلها و جيت تقريبا قبل شهر و الله الواحد بتمني انو ارجع الليله قبل بكره ((( و اريت باكر اكون هسا ))
تحياتي لكم جميعا ......******
و اتمنا انو نتقابل في السودان

نمستيه بادرابي


ما عاجبني ولا شتين وماغصني وهاري فشفاشي

لكن يا بادارابي وحيات النبي احصل المطار بس ويقولوا الحمد علي السلامه
تاني الا يقلعووني قلع

[سيراف]

السؤال ده أصلا ما إتخيل لى قعته مع روحى كده وفكرته في إجابتو

لانو أى أى أى أى

كيف ما أرجع
كيف واحد يرفس السعاده بى رجلو
كيف أفوت فرصة إنى أشوف أولاد و بنات خالاتى و عماتى
كيف ما أكون دايره أشوف أسماء و مؤمن إكبرو
كيف أفوت فصاحة ناس أيه و محمد
كيف أفوت ريحة تراب أرض جدى و النيل البيسقيها




إتخيل لى الجواب وصل

[يوسف حمدالنيل]

الغالية / SAROOna

تحياتي ...


رغم التواريخ والصــور
عايز أصــــل .. فاقد الدليل
أصـــلو المسافات والزمن ...
ما بدلت ريدي الأكـــيد ...
للعفة والطيب الجمال ...
أرض الوطــــــــــــن .

ثقي تماماً أنني أكثر لهفة الأن من كُل مرة بالعودة لأرض الوطن ( السودان ) رغم صعوبة التعايش إلاّ إنني
اعاني وبشدة في غربتي فقريباً سأشد الرحال .

[بت أبوظبي]

والله يا سارونه النيه موجوده .. والأمل معقود للرجوع إلى الوطن الحبيب
الغربه قست علينا كتير .. لكن كتر خيرها برضو ...!

الحقيقه يا سارونا قرار الرجوع صعب ..
لما فيه كثير من التغيرات النفسيه والإجتماعيه والإقتصاديه ...
قول أني برجع السودان جدا ساهل
لكن أن أتعايش مع الوضع الجديد .. هنا الصعوبه .. وهنا القلق بالنسبه لي ..!

لكن ربنا كريم .. كلو بهون من أجل السودان


شكرا حبيبتي

[بت الشماليه^ MisS_GreeN]

اكيييييييييييييييييييد.................. لو عالنيه فهي من ساعه ولدونا وعرفتا بلدي السودان نفسي ارجع ليها



لكن ظروفنا القاسيه كيف بنغيرا....................... العيشه فالسودان صعبه ...""" التقول جربتها""ههههه






عالعموم .. يلا هانت كلها السنه دي واشتت السودان طوااااااااااالي


ت::
دعواتكم يا جماعه............. ثانويه عامه .. احم احم

[راعي الناقه]

قبل ما ارد راجع ولا لا

وقفتني (أشتت السودان طوااااااااااالي)

يا جماعه بالمنطق بتاع بت ابو ظبي
كان رجعنا البكتب في صفحة المغتربين منو؟

هو حلم والانسان ما بعيش بدون حلم

[emadbaan6]

السلام عليكم و رحمة الله و بركاته ، ، ، ،
أولاً : السودان ده بلدنا و نتمني نرجع ليهو ، ، ، لكن . . . . . . . . . . .
ثانياً: الإخوة المتداخلين اسمحوا لي بي كلمة ( و هي كلكم ناس حالمين و رومانسيين بدرجة كبيرة ) السودان لسة بلد بعيد جداً عن ركب الحضارة و ما تفتكروا انه الكام عمارة و لا كام شارع في الخرطوم انه خلاص السودان ده بقة كويس . ابداً السودان ابسط اسباب الحياة و العيش للناس ( مش متوفرة ) للأسف أنها متوفرة و لكن مش لكل الناس ( العيش الكريم ، التعليم ، العلاج ) و انا بقول العيش الكريم مش الرغد. الواحد بس إذا طلع برة الخرطوم جنوباً و عدا جبل اولياء بي عشرين كلم حايشوف كيف الناس بتعاني في الاكل و الشراب و التعليم و كيف الناس بتموت عشان ما لاقية علاج. و الواحد لو طلع من بورتسودان ماشي علي كسلا في طريقه للخرطوم بالبر بشوف مآسي كيف الناس بتشرب موية المطرة و اولادة ما لاقية علاج و لا تعليم. الناس بتشوف الخرطوم و بتفتكر انه السودان كله كدة. ناهيك عن الغلاء ، و الربا ، و الزنا ، و المحن و الفتن . . . . . . . . و الخ
ثالثاً : عاوز واحد يعرف لي الوطن، شنو هو الوطن ؟
رابعاً : الناس الطارية الجية الماسكة شنو ؟ ما ممكن اليوم قبل بكرة ترجع ، لكن لانه عارفين انه العودة فيها مخاطر عشان كدة بفكروا الف مرة قبل ما ياخدوا قرار زي دة.
خامساً: للأسف دي بلدنا اللي انطردنا منها بي سبب لقمة العيش و شردت كثير من شباب السودان في المنافي ما بين اطباء و مهندسين و معلمين و حتي رعاة و مزارعين بحثأ عن العيش الكريم.احنا باختصار الوطن ما ادانا حاجة في حين انه اخد مننا كل حاجة.

[eidbin]

و الله ياخى احنا وصلنا مرحلة ما عرفين ماشين وين
تحياتى

[eidbin]

اخى لم تحدد العودة متى
تحياتى

[emadbaan6]

لما نعرف اجابة لي سؤال شنو هو الوطن نبقي نشوف موضوع الجية

[eidbin]

سلام
دى نظرة شخصية
و الاراء محترمه
و كل منا يحدد ما هو الوطن من زاوية شخصية
قد نتفق و قد نختلف
ويبقى بيننا السودان
حتى ياخى لو مارجعنا خالص سيجمع بيننا السودان
تحياتى

[دلوعة الدوحه]

اكيييييييد عايزين نرجع
ونشوف الاهل باذن الله قريب

[مغرورة بعزتي]

بصراحة مجرد ماننا نفكر بس اننا في يوم ممكن نرجع ونعيش في السودان بنحس بخوف لاننا تقريبا مابنعرف حاجة عن السودان غير انوا اهلنا هناك احنا انولدنا واتربينا واتعلمنا برى في مابنعرف وطن غير الوطن اللي انولدنا فيه

[kashef397]

اللي مابيفكر يرجع في النهاية مصيره يرجع ولو في صندوق(بعد عمر طويل)والبيقول ماعايز يرجع ده كلام زهج ولازعل بس بيكون في دواخله أرق من الغربة وروتينها القاتل ويمني نفسه بقعده عصرية قدام الدكان ولاجلسات التمرين وافراح الحلة البتلم البعيد قبل القريب وللامانة والتاريخ النسيج الاجتماعي الموجود في السودان ماموجود في اي بقعة في العالم.
بس لكن ومااتعسها كلمة لكن فهي عندما تنحشر في نص الكلام بتقلب العسل حنظل ,التزامات المغترب تجاه اهله كل يوم بتزيد زي التقول بتعاكس فيه عشان ماياخد قرار العودة النهايئة وانا من هنا احي الاخوة الشجعان الذين اخذوا قرار العودة الطوعية وانهوا سنين الغربة والعذاب والمعاناه وقالوا معاناه لمعاناه نعاني مع اهلنا في نصهم وعقبالنا نبقي شجعان ونتخذ مثل هذا القرار قبل ان تلفظنا الغربة هياكل بشرية لاتقوي علي شئ وتلفظنا مجتمعاتنا بالبلد لاننا ما ح نقدر نتأقلم عليها بعد سنين الغربة الطويلة
ودالكاشف_أثينا

[kashef397]

بصراحة مجرد ماننا نفكر بس اننا في يوم ممكن نرجع ونعيش في السودان بنحس بخوف لاننا تقريبا مابنعرف حاجة عن السودان غير انوا اهلنا هناك احنا انولدنا واتربينا واتعلمنا برى في مابنعرف وطن غير الوطن اللي انولدنا فيه

انشاء الله القطريين يدوك الجنسية وتلقي ليك واحد قطري يتزوجك بيكون احسن لانو نحن مافي شئ مأخرنا في السودان الا الناس الماعندها انتماء للوطن حتي ولو اسمياً

[kashef397]

لما نعرف اجابة لي سؤال شنو هو الوطن نبقي نشوف موضوع الجية

لماتعرف الاجابة ارجوووووووووووووووووووك عممها عشان في ناس كتيرة ماعارفا مامعني الوطن!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!

[معتز]

شكرا لطرحك لهذا الموضوع الرائع اختى سارونا وانا واحد من الناس عايش خارج السودان من فترة طويلة والله السودان ما غاب عنى لحظة ودايما فى فكرى وفى بالى
وبتمنى من ربنا يرد غربة كل سودانى لانه مصيرنا نعود مهما طالت غربتنا

[منوفلي دوت كوم]

اكيييد الرجوع في البال ونتمني الرجوع اليوم قبل بكره
ماسمعتي
بلادك حلوه ارجع ليها دار الغربه مابترحم

وشكرا علي الموضوع