تامل الراسل قبل الفتح

[العمرابى]

إلى حضرة / ................
المحترم ،،،
إحيكم بتحية الإسلام الخالدة ألا وهي السلام عليكم ورحمة الله تعالى وبركاته .
أما بعد ..
كيف حالكم وأحوالكم في هذه المدة الطويلة التي لم نراكم فيها ، عسى أن تكونوا بخير وصحة جيدة كما نحن الحمد لله على ما يرام ، وإذا دار محور سؤالكم عنا فنحن بخير ولا ينقصنا شئ سوى عدم مشاهدتكم الغالية التي نتمناها على الدوام . راجياً من المولى عز وجل أن يصلكم سفيري هذا ويجدكم كما يتمناه لكم القلب من دوام الصحة والعافية ، وتسبحون في بحور السعادة والرفاهية التامة .
وصلنا عزيز خطابكم وعليه نشكركم جزيل الشكر ونرجو منكم دوام المراسلة ، ومن الأخبار .. الاسبوع الفات كان عرس حسن محمد علي وبرضو حسن عثمان جابو ليه ولد سماه أحمد وفدوى بت خالتي عاشة خطبوها ، وحاج عبد الله أتوفى قبل أسبويعن البركة فينا وفيكم ، ومن هنا تقبل تحيات الأهل جميعاً بدون فرز الوالد والوالدة والاخوان بكرى وعلي وخالد وعصام وعمر والاخوات سهى وسمية وسحر كلهم يسلموا عليك وعماتي وخالاتي واولادهم كلهم بيسألوا منك ويسلموا عليك وحبوبة برضو قالت لي ( وقّف سلامتي ) وقالت ليك . وكل ناس الحلة والجيران بيسلموا عليك ، وبلغ تحياتي لكل الأخوان المعاك .
وما تقطع الجوابات كل ما تلقى زول جاي رسل لينا ، وجواباتك الفاتت كلها انا محتفظ بيها كل مرة ألقى نفسي فاضي برجع بقراهم .
ملحوظة :
خلاص إنتهينا من حش التمر والبركاوي جاب كويس لكن الجاو السنة دي كان كعب ، نبيع وللا نخليهو شوية ؟؟ وانا بقول أحسن نخليهو لأنو السعر نازل الأيام دي . رسل لينا المصاريف لأنو المدارس بتفتح بعد شهر . عايزين لبس المدرسة والكراسات والأقلام وكمان ما تنسى رسل السكر .
ولا أريد أن أطيل عليك أضع قلمي مستأذناً وغير مستغني وإلي اللقاء في رسالة قادمة بإذن الله تعالى .
مخلصكم / ...........
بالله كل واحد يقرأ الرسالة دي يورينا آخر مرة جاتو رسالة زي كدا متين ؟ . وفي ناس أكيد أصلا ما بكونو شافو الحاجات دي ناس عصر التقنية والإتصالات والانترنت . وأهم حاجة يكون مكتوب على الظرف o:k وتحت الإسم مباشرة عبارة( يجده بخير ،، ) وتامل الراسل قبل الفتح
وتاني نرجع نقول يا حليل أيام زمان ،،،

[jasmina]

هههههههههه انا ماحصل جاتني رساله زي دي بس لقيت مماثل ليها كثير في اوراق الوالد القديمه لما كنا بنفرزها سوا

بس..رسلت تحياتي في شريط كاست لناس السودان .... بالجد كان شعور جميل لما تسمع صوت احبابك الي يبعدو اميال عنك بعد طول غياب

ومايجي اي زول من مواليد الف وتسعميه و ....... يقول ماشفتها .....العذر لمواليد ال2000 بس

[العمرابى]

هههههههههه انا ماحصل جاتني رساله زي دي بس لقيت مماثل ليها كثير في اوراق الوالد القديمه لما كنا بنفرزها سوا

بس..رسلت تحياتي في شريط كاست لناس السودان .... بالجد كان شعور جميل لما تسمع صوت احبابك الي يبعدو اميال عنك بعد طول غياب

ومايجي اي زول من مواليد الف وتسعميه و ....... يقول ماشفتها .....العذر لمواليد ال2000 بس

اشكرك على المرور
امانا ماكان زمن زين

[بت السرف]

والله رجغتنى لايام ...كنت لسة فى الاساس ..
والحبوبات الــ فى العائلة كلهن يرسلن لى مخصوص عشان اكتب ليهم الرسائل لاولادهم المغتربيين ..
وكانت بتجينى دائما الهدايا ... عشان خطى السمح... الله يرحم من توفين منهن..

[صلاح ابو اواب]

والله يالعمرابي فعلا ده كان الزمن الجميل زمن الاصاله والحنيه وزمن كان السودان بخيرو لكن العولمه هدمت كل ماهو جميل وطاعم طعم كلام حبوباتنا البتمسك الجواب الجاي من ولدها تشمشم فيهو اليوم كلو عشان فيهو ريحة ولدها كما يخيل لها وفي النهايه نقول ياحليل ايام زمان وناس زمان

[dream-lady]

الماضي الجميل لايعود !!

[العمرابى]

والله رجغتنى لايام ...كنت لسة فى الاساس ..
والحبوبات الــ فى العائلة كلهن يرسلن لى مخصوص عشان اكتب ليهم الرسائل لاولادهم المغتربيين ..
وكانت بتجينى دائما الهدايا ... عشان خطى السمح... الله يرحم من توفين منهن..

التحية لك
والله خبر عرفناك من ناس الاساس كمان
ربنا يرحم الجميع
خطك قالو كان يقروه بدون نضارة
قلتى لى كان بقولن ليكى وقفى سلامى سمح
والله زمن كان

[العمرابى]

والله يالعمرابي فعلا ده كان الزمن الجميل زمن الاصاله والحنيه وزمن كان السودان بخيرو لكن العولمه هدمت كل ماهو جميل وطاعم طعم كلام حبوباتنا البتمسك الجواب الجاي من ولدها تشمشم فيهو اليوم كلو عشان فيهو ريحة ولدها كما يخيل لها وفي النهايه نقول ياحليل ايام زمان وناس زمان

يديك العافية واشكرك على المرور ابو اواب
ياحليل زمن الجواب يوصل بعد 3 شهور ده اذا لقيت فيه تاريخ
وياحليل زمن يجو يباركو ليك وصول الجواب زاتو ( سمعنا قالوا جاكم جواب من محمد )
اى والله يسلم عليكم كلكم بدون فرز
تحياتى

[العمرابى]

الماضي الجميل لايعود !!

اشكرك على المرور
يجب ان لاننساه وهو تراث من الماضى

[العمرابى]

من طرائف الخطابات عندى عمى صعب كدى
كان يقول لينا اقروا من حد مرسول لكم كذا وكذا مع باص خليل

[العمرابى]

مافى حد رسلو ليه خطاب قريب

[شذي زهر]

مافى حد رسلو ليه خطاب قريب

هههههههههه
معقوله دي

[شذي زهر]

هههههههههه انا ماحصل جاتني رساله زي دي بس لقيت مماثل ليها كثير في اوراق الوالد القديمه لما كنا بنفرزها سوا

بس..رسلت تحياتي في شريط كاست لناس السودان .... بالجد كان شعور جميل لما تسمع صوت احبابك الي يبعدو اميال عنك بعد طول غياب

ومايجي اي زول من مواليد الف وتسعميه و ....... يقول ماشفتها .....العذر لمواليد ال2000 بس

علي اساس انك مواليد 2000

مواليد 1985
تسجيل الشرايط
ولكن.........1997
التلفونات دخلت كل بيوت الخرطوم
وعلي مااظن من الزمن داك حكايه الجوابات دي انتهت

[شذي زهر]

حابه احكي ليكم طرفه عن الجوابات دي

زمان ونحنا كلنا كنا ساكنين في بيت جدي في منطقه كوبر
وكانت خالتي مقيمه في دبي
وكان مره رسلت جواب
وكان عندي بت خالتي اكبر مني
وكانت.ذي حكايه بت السرف بنادوها تقرا الجواب
مره من المرات كانت موجوده وحده من حبوباتي (خاله امي)من البلد(جبل ام علي)وللاسف خالتي نست تنزل اسمها ضمن المرسله ليهم السلام
قامت حبوبتي(ام امي) نبهت بت خالتي ...لمن تجي في حته سلمو لي علي فلان وفلان
لاذم تقول اسم حبوبتها الموجوده دي واسم بناتها واولادها بالواحد.......عشان ماتزعل
وطبعا نحنا الحكايه عجبتنا شديد وكنا بنضحك فيها
ولغايه الليله متذكراها



وحبوباتي

ربنا يرحمهم

[العمرابى]

حابه احكي ليكم طرفه عن الجوابات دي

زمان ونحنا كلنا كنا ساكنين في بيت جدي في منطقه كوبر
وكانت خالتي مقيمه في دبي
وكان مره رسلت جواب
وكان عندي بت خالتي اكبر مني
وكانت.ذي حكايه بت السرف بنادوها تقرا الجواب
مره من المرات كانت موجوده وحده من حبوباتي (خاله امي)من البلد(جبل ام علي)وللاسف خالتي نست تنزل اسمها ضمن المرسله ليهم السلام
قامت حبوبتي(ام امي) نبهت بت خالتي ...لمن تجي في حته سلمو لي علي فلان وفلان
لاذم تقول اسم حبوبتها الموجوده دي واسم بناتها واولادها بالواحد.......عشان ماتزعل
وطبعا نحنا الحكايه عجبتنا شديد وكنا بنضحك فيها
ولغايه الليله متذكراها



وحبوباتي

ربنا يرحمهم

لك التحية هى
واشكرك على المشاركة الحلوة
عندنا حاجة فى الحلة كان محل تسمع ليها جواب يكتبوة تقول ليهم وقفو سلامى ( يعنى اعملو سلامى ياهى)
اللهم تقبل حبوبات يا سودانية
المهم ترضوهم بى السلام