سنه كامله عشان اختبار

[ابو زيد المشيّخي]

السلام عليكم ورحمة الله وبركاته
دي اول مشركه لي في هذا المنتدي العظيم و بسم الله ابدا في قص قصتي
السنه الماضية كانت اخر سنة لي في الثانوية انا كنت طالب (مغترب) في خلا (ريف) المملكة (العربية) السعودية حيث ما في الا مدرسة واحدة وانا الطالب السوداني الوحيد في المدرسه كلها معاي مصري و اردني (وديل قريت معاهم تالتة ثانوي بس)
انا كنت طالب مجتهد والحمد الله
اختبرت القدرات في نص السنه وده بفضل الله ثم المصري المعاي وجبت نسبة كويسة والحمد لله يلا جينا لنهاية العام طبعا المطلوب للشهادة العربية قدرات وتحصيلي وانا اختبرت قدرات بس . القدرات مطلوب للسودانيين و المصريين والسعوديين بس والتحصيلي مطلوب للسودانيين و السعوديين و المشكلة اني اعتمدت على المصري فهو ما مطلوب عليه تحصيلي فانا قلت في نفسي اذا نحن ما مطلوب علينا تحصيلي
بعد فترة سالت المصري قلت : هل انتو مطلوب عليكم تحصيلي ؟ قالي : لا . وما عندك فكرة عن السودانيين ؟
قالي: ماعرفش . قلت له : اذا حامشي اسجل للتحصيلي قالي : تسجل فين !!!! زمن التسجيل انتهى انا بديت اخاف (لاحظو القدرات ممكن تختبرو في تانيه و تالتة ثانوي مرتين في السنة والتحصيلى مرة واحدة في تالتة ثانوي وفي نهاية السنة !!!! )
طبعا عشت في حالة لا يعلم بيها الا الله وكل يوم افتح موقع التسجيل و لا يوجد اختبار تحصيلى
وقبل ما اسافر للوطن الحبيب بيوم وجدت اختبار تحصيلى استثنائي ولكن وين !!! الرياض العاصمة التي تبعد عني 450 كيلو والاختبار صباحي فقط وانا مسافر بكرة فرحة ما تمت و خليتو
سافرت الى احضان الوطن الحبيب وعملت اجراءات التقديم ومشيت اقدم للجامعة فاتني التقديم الاول و جينا للتقديم التاني
في نهار رمضان .الصف طويل و سخانة طبعا انا بحكم اتربيت او اغتربت في (خلا ) ماحسيت بالحر
واثناء انا واقف في الصف واحد من اخوانا (شهادة سودانية ) متجرس من الحر : يالله !!!!!!!
والله سخانة ياخ ما يختو مروحة . انا قلت في نفسي المفروض انا اقول الكلام ده ولا انته !!!
ومشى الصف ولما قربت للشباك قفلو قالو خلاص بكرة تعالو من بدري انا لله وانا اليه راجعون
ورجعت البيت وجيت اليوم التاني والحمدلله وصلت الشباك و قدمت الاستمارة و ماشين تمام
لحدي ما طلعت والحمدلله قلت في نفسي الظاهر التحصيلي (او من سيربح المليون )ما مطلوب
بعد العيد طلعت النتايج يلا نشوف قبلوني في شنو اول حاجة طلع لي اسم الطالب اسم بت و الجامعه و التخصص ما كتبتو في الاستمارة اتاكدت من رقم الطالب نفس الرقم سمح الحاصل شنو ؟؟ مشيت الى مركز التقديم
وشرحت المشكلة قالي : اديني الرقم اديتو كتبو في الكمبيوتر ما مذكر المكتوب في الشاشه لاكن بمعنى
اني ماقدمت نهائي المهم قالي اذا تمشي لي فلان. مشيت لفلان شرحت المشكله سالني عندك شهادة ثانوية ؟
قلت عندي .عندك قدرات؟ عندي . عندك تحصيلي ؟ قلت لا. قالي لازم يكون عندك تحصيلي للتقديم .هنا كانت الصدمة الحقيقية يا زول انت متاكد من الكلام ده .لااااااازم . طبعا رجعت مع اهلي في (خلا) السعودية
والان انا قاعد انتظر نهاية السنة للتحصيلي شفتو الجهجهه كيف حاضيع سنة كاملة وزيادة عشان انا مغترب في (خلا) السعودية واني كنت الطالب السوداني الوحيد في المدرسة بل الاجنبي الوحيد طوال سنين عمري لحدي اخر سنة ولاكن قدر الله وما شاء فعل ومعليش للاطالة ولكن (المغسة ) جبرتني
رايكم شنو؟

[ناري عسل]

ربنا يعينك ويسهل ليك دي اول حاجة بقولة ليك ..
ومافي حل غير تصبر علي السنه صعبة ومغصة ورفع ضغط لكن مافي يدك اي حاجة وان شاء الله تتوفق السنه الجاية ونسيت اقول ليك بعد دا كلوو يقولو ليك ارفع راسك انت سوداني ارفعووو ساي يازوول هههههههههههههههههههه

[The Sniper]

ربنا يعوضك كل خير علي السنة الضاعت منك اخوي

و اتمني ليك التوفيق ان شاء الله



دمت بخير