اديك سر؟...خليك بعـــــــــــــيد

[sweet_saria]

مشتهيه لي مرقة عصر..
لفحة سفنجة وتوب صلاة..
وجرة كحل..
يابت تعالى..ماشه وين ؟
يابت تعالى..طايره وين؟
جــــــــــايه ..جايه..
يما جايه..
و أطير ..جــــــــــــــرى..
الدمعة تسبق خطوتي..
غبيانة دي..جنك بكاء..
أهديك وردة..
مرة حمراء ..مرة بيضاء..ومرة لا..
واديك سر؟ ...خليك بعيد
مشتهيه لي كم قصة احكيهن
وكت القي البنات أتلملمن
أحكى وأزيد..لما الحكى
يوصل مدا
أحكى ويغيرن..وانتشى
أحكى وأعيد...
شي من حقيقة..
ومن خيال كمين و شي
أديك سر؟ ...خليك بعيد
مشتهيه لي صحية دغش ..
والناس نيام
تطل على نسمة خريف
صارا لي منك سلام..
صاراو شــــــــــــــديد..
في حزتا ..تطرب تزغرد..
حلة حلة .. وحارة حارة
وشفع الجيران يمرقو
لابسين جديد..
يمرقو ما يفضل نفر
خالتي سيدة تلقى مريم
يتقالدن ..بعد قطيعه..وحورب عنيد
أديك سر؟ ..خليك بعيد
مشتهيه لي لمة حريم ..وبنات كتاااااااااااار
فى ضل ضحى
راكوبة في بيتنا الكبير الفى الدويم
جبنه و بخور..فنجان يدور
أول بكر ..تانى التنى ..
يابت كفاك
يرمو الودع..
أخدر طوووويل..
يابت وليد الصرة جاك ..
أديك سر؟ .. خليك بعيد
مشتهيه لي حوليه في فسحتنا ديك
حلقة زكر ..الله.. الله حي
يــــــــا الله حي
رايات ورق ..صاجات و طار..
والنوبه ايييييييييييييك
الله ..الله ..
مجانين يا شيخ العرب..مجانين
الله ..الله..
يا شيخنا هووووى.. مجانين..
يا سيدنا البدوي .. مجانين
اجساد تميل.. ارواح تميل
الله .. الله..
وقلوب تميل..
الله ..الله ..
والناس تغـــــــــــــيب..
الله .. الله
يالله صلى على الحبيب
الله ..الله..
القلوب تغرق تذوب..
الله ..الله
ترهف تهش..
والوجوه تصفى و تبش
الله ..الله
في حزتا.. بتخيلك ..
في كل نبضة قلب دق و ارتعش

في كل وش..

في كل شي..
أديك سر؟ .. خليك بعيد
ما تستجيب لى دمعة خاينة .. أتمردت
ما تراعى لي اهااااات وجع .. أتجددت
بس تأكد روحي ترتاح تحتويك و تهدهدك ..
وعيون تساهر تحرسك..
تتوسد الشقاء والسهاد .. بس تسعدك ..
أديك سر؟ ...خليك بعـــــــــــــــــــــيد


منقول

[waya]

جميلة منك ورااااااااااااااااااااااااااااااااااااااااائعة

[المغربى]

اديك سر

منتهى الروعة

[صلاح يحيى سليمان]

العضو الكريم sweet_saria

ارجوا منك مراجعة مداخلة التعديل الاخيرة على المشاركة
والالتزام بما جاء فيها.

وشكرا