مكتبة الشاعرة أسماء الجنيد

[بعد الزمن]

عديلة و زين




يا ود مساحات البلد ..

مفروش ارض معروش سحاب..

مبلول مطر راوى الجرف..

كاسر السراب..

معقود جواك اخضر رضاب..

مزروع مجدع فى التراب..

نواره تفتح كل باب..

مليانه بى دغش الرزاز..

رويانه بى نفس العزاز..

ممطوره بالبلد الهشاب..

طارح الحنين عبر السنين..

وارث الدوايه مع الكتاب..

مشتول مكشح فى الدروب..

ممزوج مدمدم بالضباب..

مدفون جوار عمق الفرح..

مبسوط محكر فى الهضاب..

*****

يا ود مساحات الاهل..

مرشوش عطر مربوط هلال..

جرتق موشح بالبرش....

مرصوص سبح حزمة جمال..

سايقنو لى ست الحسن ..

مليانه حنه وكوم خصال ..

ديسا مكحل بالسواد ..

خدا مورد بالدلال ..

مسكونة بى ضحكة صغار..

منسوجة بى صافى الزلال ..

معروفه بى خاطر الكبار ..

مرسومة فى واحة ظلا ل ..

سمحة و عديلة و زين ..

عزة قبيلة و فا لـ ....

[بعد الزمن]

ما تتخبأ





ما تتضارا

امرق بره

اكسر حاجز الصمت الحرا..

وكورك فينا.مليون مره.

بى الصاراهو دواخلك..

جوه... وبره

على النبره وشيل العبره

انفض غبار السمح الجوه ..

وازرع فرحك فينا وما تتضارا..

تكبر شدره .. تطرح ثمره

تشيل اليابس ..

تطفى الجمره

****

شتت لونك فى لوحات الزمن الاغبر ..

لون بيه الفاضل منو..

يمكن يكبر ويمكن يظهر ..

وتانى نجيبو نلون صورته وامكن يبهر ..

لامن طيفك يظهر وينضر..

يشيل الحزن الساكن دارنا

وليه يكسر ....

وانضم تانى الفرح الاخضر

لحن نغم الشجن الباكى ..

دندن نغمو الفيك متحكر

وما تتضارا

امرق بره

اكسر حاجز الصمت الحرا

وكورك فينا مليون مره

[بعد الزمن]

ترتاره ترتاره فى الحله والحاره ..

صوتك الرنان فى ترابنا طمباره ..

وراكى كوم شفع تشابا تتجارا ..

فرحانه بيك ديمه كانه طياره ..

قضيتى كم مرسال لى يمه والجاره ..

ما بتخذلى الاطفال ما بتصدمى الماره..

تقيفى لو فى الحا ل لا اماره لا شاره ..

بترولك افراحهم وانفاسهم ا لحاره ..

كم شلتى فى طيك اخبارك الساره..

معروفه بى جودك ما بتعرفى الضاره ..

متجمعين حولك صغارنا فى داره..

لامه ذكراهم فى ليلنا ونهارا ..

معروفه فى كل دار من كسلا لى بارا ..

موزونه من يومك ما خابره شتاره..

لا دراسه لا مرسوم.. طابعنو فى وزاره..

تتقبلى المشوار لو جيتى فى زياره..

تتبسمى وتجرى تقضيه نواره

تعودى لى دارك لو تهتى محتاره

لا خرطه فى دربك لا جواز.. ولا سفاره..

ولوفه معروفه فى فريقنا كيف باره ..

ترتاره ترتاره ..

حديده معكوفه وسلكه فرفاره ..

لا كلفه فى صناعتك لا هم ولا خساره ..

مجهودك الجبار كانه سياره ..

قراشك النيمه لا اوضه لا عماره..

ترتاره ترتاره حنينه من يومك

فى دنيا وداره ..

[بعد الزمن]

غبشه


السمحه وارده على البحر

شايله الصفيحه على الصفيحه

وتوبا بالواطه بيجر..

تتناطا من بين الغنيمات المبطحه فى الدريب

وتناحى فى الديك المجفلا غادى كر..

تزازى جاى .. ومره جاى

وتنهر الكلب البهوهو خايفه وتقول ليه جر..

*****

رفيقاتا القبيل سبقنها فاتنها

ما لاقيه واحده تآنسا وتبقالا فى الحالتين وزر..

فطومه مره تمد .. ومره تجك ..

وتتعتر تقشقش فى العرق والدنيا حر..

قديمات الحمام اتغبرن .. والشبشب المهرود

يبرطش فى التراب جاراه فوق كرعيها جر..

****

احى انا .. نفسى انقطع..

تنهيده تمرق من رويحة السمحه

زى فصين درر ..

****

لمن لفت نص الطريق ..لاقت رفيقاتا القبيل

رجعن خلاص من البحر..

يتهامسن .. و يتضاحكن ..

نظراتن الشمتانه تكوى السمحه..

زى كى الجمر..

وقفت ... وبى نظرة عتب ..

انا ما رفيقتكن .. نسيتن اللمه فى ضل الشدر ؟

اتلملمت لفحت طرف توبا وجرت..

ما عاينت قداما.. فجأة اتعترت فوق الحجر..

****

السمحه مى شبه التعب والبهدله ..

لكن ظروفا القاسيه اقوى من الدهر..

فطومه ديمه شايله شغل البيت..

لا يوم شكت لا اتململت .. واياما فى الدنيا بتمر..

*****

وكتين دنت سمحتنا من طرف البحر..

رمت الصفيحه وكوعت ايدينا فى نص الضهر..

ملت الصفيحه .. اتنهدت ..

لوت الوقايه بى ضجر ..

وهطت الصفيحه.. ورجعت تجرر فى الخطى..

والمويه من خرمين تسيل فوقا وتخر..

***

وصلت خلاص آخر المطاف.. والفيها كملت

من مشيوير الورود ساعة العصر...

تكت الصفيحة تكبها فوق الزوير..

البالى من زمن الجدود مال واتنخر...

فلتت ادياتا الصغار من الوهن ..والمويه سالت..

تحت كرعيها زى جدول عبر..

اتزحلقت .. اتمايلت .. وقعت تراح ..

فى لحظه كانت سابحه فى بركة مطر..

اتاوهت .. اتوجعت .. اتندمت 00 اتحسرت

والدمع من عينيها طفر..

اتحكرت فوق طينا داك .. تندب الحظ

المعتر ليها دوم طول العمر..

تندب الحظ المعتر ليها دوم طول العمر

[بعد الزمن]

صرخة حق لكجبار


اصل الوجعه هم كفار

القتل العمد مع الاصرار

دسو رؤسهم طلقوا عيار

ريحة الغدر الفيها الضار

طعم الظلم والظالم فار

صاري الخوف فى كفو شعار

عارف ناسو لفيف اشرار

فيه الخائن والجبار

وفيه الحاقد والثرثار

لفحوا الضى العالى فنار

دفنوا البسمه هدموا جدار

كسروا رقاب اسيادا جسار

لا بيهابوا الضربة ولا الاضرار

سدوا الفرقة وزالوا دمار

شدوا ضهورهم للاعمار

دفروا الضيم مسحوهو غبار

روهو ترابك دم اطهار

دفنوا شهيدا كان مغوار

معز والصادق يا ستار

وشيخ الدين الفج النار

صغيرنا فقيرى مع الابرار

يا كجبار ...

انتى الهيبه وهم العار

انتى كرامة وهم فجار

لن نحتار ...

ولن نختار

غير الضربة الفيها الثار

ولن نتوارى خلف ستار

لن نتخاذل ولن نحتار

نرفع صوتنا عالى جهار

يا كجبار ..

انتى جدودنا الديمه كبار

انتى جذورنا انتى وقار

انتى الجيل الربى صغار

انتى المرأة الحاضنة الدار

انتى شموخنا والثوار

انتى تراثنا والاحرار

انتى حضارة غناك مسدار

انتى النيل الشال اسرار

انتى خدارنا والنوار

انتى نخيلنا الكلو نضار

بيه عريسنا اتجرتق وسار

يا كجبار

لسه عيونا حارسة ديار

ولسه قلوبنا مولعه نار

فينا الشرف الغطى بحار

وفينا الوهب الروح للجار

فينا وفينا كم اخيار

لن نبكيك ..

ولن نرثيك ..

ولن نحتار

لن نوفيك غير الثأر

لن نتخاذل ولن نحتار

ولن نختار غير الثأر

[بعد الزمن]

رحيل


مشيت بعيد من جنبنا ..

رحلت وراك

كل الدروب والامكنه

بارياك تفتش للحنان..

الكان معاك ساكن هنا

وللبسيمات المفرهده فى الديار..

اريجها عبق سوسنه

بى ضل كلامك يا ملك ..

يا زول مجرتق مننا

شلناك وديع متل الرضيع

ضلل بهاك يا ضلنا .

منانا نلقاك من زمان

قبال ميعاد بى كم سنه

شلناك وشاح فى كل صباح

شفناك عريس بى قلبنا..

لميت معاك كل الفرح

حتى الحرف رفرف دنا

رتل غناك المن صفاك

كل المشاعر المحزنه

عب النغم جدول طرب

شتل الحنين ساحات منا

لون بساط الكون خدار

فرهد جوار النيل سنا

ذكراك صبحت تنتظر

غنوات نشيلا ندندنا

نشوفا صورتك تبتسم

نرسم خطوط بى دمنا

لوحة وفا تفضل تعيد

ايامنا قربك يا جنا

ايامنا قربك يا جنا

[بعد الزمن]

عزة ترابك



بريدك . بريدك بعزك

واقبل .. اقبل ترابك ..

ترابك محنة.. حنانك رحيقك

رحيقك شبابك ...

شبابك شهامة.. شهامتك كرامة..

كرامتك عزيزة .. عزة ترابك ..

تسافر . تهاجر ..تودع سحابك ..

سحابك مطيرة ..تخدر تعطر هضابك ..

عيونك جروفك.. عيالك قطوفك ..

تردد هتافك . تسالم كفوفك ..

حروفك معانى ..كلامك سيوفك ..

تحارب تدافع.. تنظم صفوفك ...

شيابك تراثك . تقود لى دفوفك ..

نساءك مهيره.. اصيلة وكريمه ..

تحاضن تقالد.. تشرف ضيوفك ..

افراحك حريرة.. حنة وضريرة ..

تلملم شتاتك.. يرجع يشوفك ...

احزانك قصيدة.. حنينه وحزينة ..

تناجى المشاعر.. تولع فى جوفك ..

تنادى ولادك .. بناتك رجالك ...

تخاطب خيالنا.. نغير نبدا ظروفك ..

اسمك بطاقة.. كبيرة وعريضة ..

تزين صدورنا.. تعجب البشوفك ...

بريدك .. بريدك .. بعزك ....

واقبل..قبل.. ترابك ....

[بعد الزمن]

الهم جفل


عتمة الليل الطويل…

الهم جفل ..

كايس الدليل..

وا لخوف ر كع

سارج ضهور النيل صهيل

صوتا غريق.. ما بنسمع

ناغم طيور وقت المقيل

رقراق غشيم شب و طلع

ضرضر نهاراتنا القبيل

رمضا دفر لا بنوطى لا بنجمع

عب البكانات السبيل

طعما كتر لا بنشرب لا بنبلع

طال الشديرات النخيل

يتم عصيفيرا وقع

شرد جهال تحت الضليل

وجع الفريق جوه الضلع

ودر حجيواتنا الشليل

شلهت صغير يا دوب رضع

شتت بلود شد الرحيل

سفرا غريب ما بنجمع

زرع الفراق هجرا طويل

لا بنطرح لا بنقلع

ما بنحسب شهرو الدخيل

ما بنكسر زمنو الفجع

ما بنجمع شوقو البهيل

ما بنستر صوتو الفزع

وما بنستر صوتو الفزع

[بعد الزمن]

قدح العيد



يصابح وشك الدنيا..

وصباحى معاك نغم صوتك ..

يرتل زى وليد خلوه ..

محكر فيك فى جوفك..

بسيمتو تهش تفرحنا..

تمتع ديمه بى شوفك..

تقشقش دمعتى ا لحارة ..

شعر كلماتو بى حروفك..

قصص مرويه بى شوقنا..

خيوط الوانها من طيفك..

تقرب فى مسافا تنا ..

نهار قعداتو فى جروفك..

مياهو الجاريه من نيلنا..

حصن حارساهو بى سيوفك..

يصابح وشك الدنيا ...

وصباحى معاك نغم صوتك..

يداعب زى حجول طفلة ...

تبرعم ورده لى قطوفك ..

تهم فرحانه لى جيتك ..

تحن مشتاقه لى كفوفك ..

فروع متكيه خجلانه..

تقالد ديمه فى قيوفك ..

غيوم مطوية تتقدل ..

ترف نديانه لخريفك..

يصابح وشك الدنيا..

وصباحى معاك نغم صوتك..

[بعد الزمن]

يا منصرا فى بطن الواطه

كايسه المهله ..

ويا منفدعه فى رمض الرمله

حارسه النخله..

ترمى الضل البارى الغيمه..

وتسقى الشتله الراجيه نسيمه..

تلولى الرطب الضاحك ديمه..

يغازل القيف دوباى ترنيمه..

تقالدى الزير التحت النيمه

يناغم الغائب وايدو كريمه

وتشفى النفس الديمه سقيمه

يا منفرا …

حيلك ساند ساق القمحه

وخاتف لونك بريق اللوحه

لافحه حنين اشواق منشرحه

فارده جمالك موج فى طرحه

يا منجدعه…

لمى كبارك ولولى صغارك

بارى النيل اسقيه خدارك

شدى الوتر الغنى شعارك

ضوى الليل النصو نهارك

بردى جوف الفات من دارك

بين البين والريد مقدارك

لمى الفضل انفضى غبارك

ردى الدين لى روحك وجارك

من الضيم والوجع البارك

شيلى الشين للنهبوا خيارك

حررى صوتك فجى مسارك

ضمى صفوفك اطلقى عيارك

بين البين والحق الزارك

بين جمرين حرقوه نوارك

ورغم البين بنشوفو نضارك

فى كل جبين يلالى فنارك

بين لحظه وحين نجنيها ثمارك

باخلاص ويقين نصون اسرارك

شوق وحنين نضمو قرارك

عديلة وزين نجيك و نبارك

عديلة وزين بالفرحه نشارك

[بعد الزمن]

يصابح وشك الدنيا..

وصباحى معاك نغم صوتك ..

يرتل زى وليد خلوه ..

محكر فيك فى جوفك..

بسيمتو تهش تفرحنا..

تمتع ديمه بى شوفك..

تقشقش دمعتى ا لحارة ..

شعر كلماتو بى حروفك..

قصص مرويه بى شوقنا..

خيوط الوانها من طيفك..

تقرب فى مسافا تنا ..

نهار قعداتو فى جروفك..

مياهو الجاريه من نيلنا..

حصن حارساهو بى سيوفك..

يصابح وشك الدنيا ...

وصباحى معاك نغم صوتك..

يداعب زى حجول طفلة ...

تبرعم ورده لى قطوفك ..

تهم فرحانه لى جيتك ..

تحن مشتاقه لى كفوفك ..

فروع متكيه خجلانه..

تقالد ديمه فى قيوفك ..

غيوم مطوية تتقدل ..

ترف نديانه لخريفك..

يصابح وشك الدنيا..

وصباحى معاك نغم صوتك..

[بعد الزمن]

سلام من البلد



سلام..

اغرف من بحر الكلام ..

اغلا الحروف انسج سلام...

فى ثوب موشح بالمحنه والوئام....

واقلع من قيف الجرف شتلات غرام ...

اجدع فى الثوب القبيل ...

ارسم طيور.. فوق الغمام ...

حاضنه الحنين .. حاضنه الوله ..

شوق وابتسام ...

وارسل تحايا معبقه بالمشاعر والهيام ...

مليانه بى ريق الاهل..

نفس الاهل بتقول كلام ....وتقول سلام

من الشرق... اهل الدرق ..

شوقا الف .. طبعا ولف..

مرحب دبايوا يا كرام ..

من الغرب اهل الطرب

اهلا حبابكم باحترام ...

من الشمال صفق الشدر ...

صوت الوتر... ريحة التمر..

تقلد تطايب فى انسجام ...

ومن الجنوب نغما طروب..

سكسك يكشكش فى فرح ...

يجرى ويجوب..

كل الشوارع والدروب ...

و يقول سلام بدل الحروب ...

ومن البطانه الداره بالضرع الحلوب

بيتين شعر تصدح تدوب ...

جنيات تدوبى .. تسرح.. تنم

ترسم جمال ساعة الغروب

واقيف هناك وسط الاهل ..

و ريحة البخور.. اكتب سطور ..

تعبر جبال تعبر بحور ..

تحمل تحايا من شهور زى دهور ...

من قلبا سعيد مليان سرور ..

مليان حبور...

لى ناس عزاز قلوبا نور ..

ووجوها نور ...

ضيا متل بدر البدور...

ولهيجا زى نفس الزهور ...

اتمنى من ربى الشكور ...

يصل السلام مرسال محبه ..

ولى الاحبه ..الف ورده ...

و زحمة من باقات عطور ...

ا لف ورده وزحمة من باقات عطور ..

[بعد الزمن]

لقياء


يوم لاقيتك .. شلت كلامك

وكيف صريتك..

اتراجعت .. دفنت حنانى

وجيت لفيتك ..

قصة طويله .. لونها بدايتك

واتمليتك ..

فرشت كلامى ..جمب مخلايتك

واترجيتك ..

تنشر منو.. وتملا عبايتك ..

واتحديتك ..

انو كلامك نصو حكايتك

شارب منك ..ولاقى عنايتك

واتعديتك

مشيت الخطوه اسابق جيتك

واتحاشيتك

عرفت الخوف الباعد بيتك

وجيت ناديتك

اتراجعت ابارى دريبك

وتانى رجيتك

واستنيتك اقرا حكايتك

وما مليتك

اتربعت طبقت وصايتك

واتوصيتك

اطوى الحجوه الفيها كنايتك

وكم لوليتك

اغنى حجاك الزرعو سقايتك

واتحجيتك

واتحجيتك ..

[بعد الزمن]

بت بلدى


يا نوارة الشدرة الطارحه البكره ...

يا مرسومه بقندول عيش ...

ورزازة مطره ...

يا شموخ النخله وطعم الثمره ...

يا بت بلدى ...

روعة بسمة ولون السمره ...

جمال تاجوج يا اصل الفكره ...

لوزة قطنة وريحة زهرة ...

نيلك طرحه وضلك سدره ...

قوامك بانا وشك قمره ...

عيونك ضفه .. سر النظره ...

قليب اطفال بساطه وفطرة ...

شايله دلالك من الخضره ...

يقالد ديسك نخيل التمره ...

يا بت بلدى ...

رنة صوتك سحر النبره ...

خصالك سمحه

وسيرتك عطره ..

كريمه فى دارك ..

بشوشه وديعه ..

وخاتيه البطره ...

سبحان الخالق رب القدره ..

ودعتك الله وابقى عشره

[بعد الزمن]

رسالة غرام

انا ما حبيتك .. لكنى عشقتك ...

واتمنيتك ...

بى ريشة قلبى .. رسمتك...

وفى الاعماق ختيتك ...

بحنانى الفايض.. برضى شملتك ...

ما خليتك ...

واتخيلتك .. فى بستـان ....

انى زرعتك ...

بى دمى رويتك ...

وكيف راعيتـك ...

لما قطفتك ..

اتحسستك .. وريحة عطرك ...

نرجس نور .. ساحة بيتك ....

ويوم لاقيتك ..

لامست سحابة عرشك ...

واتنهدت عشان حسيتك ...

كتمت الاهه .. وراها التانيه ...

اتوهمت كمان ناديتك ...

كتبتك احلا قصائد ريد ...

كم لحنتك .. وكم غنيتك ....

وتانى بديتك .. وجيت تميتك ...

لما حفظتك واتوشحتك ...

واتغطتيتك ...

ومن خوفى عليك ...

قريت حصنتك ...

وبى رمشى هناك ضاريتك ...

واتوسلتك .. واترجيـتك ..

تعرف انى عشقتك ما حبيتك ..

والله عشقتك ..ما حبيتك

[بعد الزمن]

إتدللى



فجى الدرب

واتمهلى

ضمى المسافات القبيل

ماتبخلى

صرى الحنين شوق السنين

واتخيلى

ريدنا ا للطال عمق الخيال

واتاملى

لوحة حنان مسقيه من جواك خصال

ما تخجلى

اتلفحى طرف البحرتوب الجمال

واتجملى

ورشى الخدارخد النهار

واتدللى

شرى الفرح الوان قزح

وكملى

ساحة نداك بى لون سماك

واتقدلى

لمينا فى ابعاد هواك

واتحملى

عمق السهاد المن رجاك

واشتلى

جرفين صبر طول الدهر

وكحلى

من عينيك ظلال نورالديار

وكللى

الكون نضار بى بسمتك

واتشكلى

[بعد الزمن]

هموم مهاجر

سلام يا اهلنا الطيبين ..

الشوق محنه ..

والريد قطوف..

والود خدار...

مهما غلبتنا الظروف ..وبعدتنا المسافات..

وجودكم فى البال والخاطر بتحدى كل الظروف

وبقرب كل المسافات..

التحيه ضفاف رويانه متلكم بالمحبه ..

عذرا للغياب المابالخاطر ..

واليكم هموم مهاجر ..

ربنا يخفف الهموم ..ويرد المظلوم

ويرجعنا للوطن الحنون..

***هموم مهاجر***

قدر الهم الطولو صفوف

وقدر الجوع الضرب الجوف

وقدر الخوف الطالنا سقوف

وقدر الكي البى المخلوف

وفيك يا الضلمه المابنشوف

شحدت المولى الفوقنا بشوف

يزيل الغمه تلالي حروف

تضوي قميره وتجلى سيوف

تشيل الرقبة الطايله كفوف

سندت حيلها على المضيوف

و قلبت آية المعروف

بدل الكرم الفوقنا بطوف

بدل اللبن الزبدو ولوف..

وبدل العيش الطعموشغوف

وبدل الخَدر ضهرو قيوف

وبدل الشتل النخله جروف

جاب الطعمو مرارة..

وما موصوف..

وجاب الربحو خسارة..

وكيف معيو ف

وجاب الشين العندو بشارة..

وكيف مخيوف

وولع منو شراره

تحرق الجوف..

حتى حريرنا الناعم..

بدلو صوف

وشمس صباحنا..

صبحت عميا وما بتشوف

وبدل القمر العاشقو لهوف

طل سمانا كلو خسوف

كلو خسوف ....

[بعد الزمن]

لحظة شجن



رجفة قلم ..لحظات شجن

انات دواخل ترتجى..

نفحات عبيرا مختزن

رفات مشاعر تنتحب ..

مركونه فى عمق الزمن..

تعبير انامل بالرسم

لوحات تضم سهد الوطن..

وجع المسافات فى الدرب

متكيه فى حيل الحزن..

رعشة قلب عايش هناك

ودران بتاوق فى البدن

زحمة احاسيس تبتهل

ناجت غرام مليان فتن

****

والنيل يقاوم فى الجزر

امواج تصارع فى القدر

يمكن يضاحك ضى قمر..

ويمكن يغازل غيم عبر ..

حتى القمر ما بنتظر..

مرات يطل وهجو البسر

مرات يسل سيف الصخر

ذرات شعاع تكوى الفجر

تلسع طيور فوق الشدر

رجفات نجوم وكتين تمر

تدفر حنين ضامى البدر..

والا البسيمات الفى الثغر

محبوسه فى فاها البكر

راجيه الصباح الكان بهر

لمتين يطل لون المطر

ولمتين يفوح نفس الزهر

ويرجع يخط قلما يتيما

انكسـر

[بعد الزمن]

اهل القبيلة


الصندل المكنون

جرتق الفرسان

الخرزه والكمون

من عين حسود انسان

راكوبه وسبيل

تيبار سقى العطشان

بروشنا مفروشه

لقراية القرآن

الحلقه مزروبه

صفوف من الحيران

اللمه فى حوشنا

تطمن الضهبان

الخلوه معروفه

و الرايه فى الديوان

نارنا موصوفه

بتوج مع الآ ذان

الناقه مضبوحه

والناقصه بالتيران ..

الكسره مردومه

وملاحنا بالقيزان

الجد البطايب

ركازة الحبان

عصايتو معكوفه

لمباتو بالقيطان

ايدو مخلوفه

للشوره والاحسان

قلبو الحنين

بياضو زى دبلان

الغره فى جبينو

للتوبه والغفران

الجبنه وبخورا

تكيه للضيفان

مراحنا السعيه

عشانا و الجيران

عشرتنا الولوفه

خوتنا زى تيمان

[بت السرف]

برافـــــــــــــــوووو بعـــــــــــــــــــــــــدو..

بالجد روعة وتعجبنى روائع الرائعة اسماء بالذات عروس النيل

ربنا يسعدك ياغالى زى مااسعدتنا بهذه الدرر.