هل اولاد المغتربين حناكيش؟؟؟؟؟ ادونا رأيكم...!!

[رمـــ(الماء)ـــاد]

السلام عليكم ورحمه الله
انا في اعتقادي الشخصي انه الحنكشه ماليها علاقه بالبيئه او انه مغترب ولا غيرو وتعريف الحنكشه في حد ذاتو ناقص لانه اسلوب حياه بالنسبه لناس وتطرف بالنسبه لاخرين حسب طبيعه اي دوله واختلاف عاداتها من الاخرى ..

[مهند داود]

صدقت واني أقول ان السبب في جعلهم هكذا يرجع الى الاباء زلكن اذا اهتمو بالامر بمحمل الجد واصلحو تربيتهم وجعلوهم يعتمدوا على أنفسهم فهذا في صالح كلا الطرفين فان الاعتماد على النفس فضيلة

[الشاعرة]

المغتربين حناكيش؟، والله ياريت!
ليس كل من يرتدي لبسا أنيقا حنكوش أو حنكوشة
وليست كل من طلت أظافرها بالأحمر أو الذهبي حنكوشة
موضوع جميل جدا وشيق، ولهذا لي عودة إن شاء الله، قد لا يعرفني الكثير منكم نظرا لغيابي الطويل جدا ، ولكن لي عودة إن شاء الله ابتداء من هذا الموضوع الشيق!

[ود الاشراف]

السلام عليكم اهلنا الطيبيــــــن

موضوع جذاب و واقعي وخاصه ان المصطلح متداول بكثره بين السودانيين في الجامعات وغيرها .. بتفق مع اللي قالو ان الحنكشه تصرف من بعض الناس العاوزين يغيروا شخصيتهم السودانيه او يتطبعوا بطباع اخري زي البتكلم بالجيم المعطشه يوم ويوم من غير ما يحس يتكلم بالجيم العاديه او من مظاهر اللبس او التصرف مهما كانت .. اما مساله القرف من بعض التصرفات زي ما قلت اختي قمر السودان او من مجرد انطباع عام زي ما قالت اختي بنت ابو ظبي ...
وتجربه حصلت لي اني عايش في السودان لقايه ما خلصت التعليم الابتدائي وسافرت الامارات ومن يومها بقي وصف حنكوش لاصق فيني من غير سبب غير اني جاي من الامارات .. وهسي مشيت ماليزيا الله اعلم حيقولو لي شنو ههههههههه
اتمني ياغير المفهوم ولا تعم الصفه كل من اغترب
ومشكورين علي الطرح الجميل

[ودهبار]

«®°·.¸.•°°·.¸¸.•°°·.¸.•°®»ليـــــــــــة حناكيش ؟؟؟؟؟؟؟؟؟؟؟؟؟ عشان بحضرو نانسي عجرم عادي اي انسان بحب اسمع فنان معين عشان بقول بابا وماما دليل علي الاحترام وغيرها من الاقاويل ماف راجل او ولد حنكوش الراجل الياهو الراجل والولد الياهو الولد «®°·.¸.•°°·.¸¸.•°°·.¸.•°®»

[الأميرالحب]

والله بصراحه اولاد المغتربين ما حناكيش
بث بتحنكشو فينا ساكت وبالذات البنات

[احمد الرحومابى]

والله موضوع جميل ولكن ليس كل اولاد المغتربين حنا كيش ولكن البعض منهم حناكيش (الحناكيش بنسبة 45من100) (وفىواحدين حناكيش فى بعض التصرفات بنسبة 20من100) (والما حناكيش 35من100)
مشكوووووور والله يعطيف الف عافيه
ومع السلام

[ملك الجليد]

أعتقد أنه مصطلح الحناكيش يطلقوا على الناس اللي بتتصنع الحنكشة أوالتي تتباهى بأنها في الغربة وأنها تعيش أحلى عيشة وتأكل أحسن أكل وتلبس أحسن لبس ووووإلخ ..
وتفتخر بأنها تنتمي إلى هوية أخرى غير هويتها الأصلية وتتصبغ بصبغة غريبة عنها أو صبغة لا تناسبها .. ومش بس أولاد المغتربين لكن المشكلة في آباء هؤلاء الحناكيش اللي بكونوا في بعض الأحيان سبب للحنكشة المفتعلة ..
ده رأيي

تحيه طيبة
كلامك منطقي وجميل جدا واتفق معاك تماما في كل ماقلتيه وعايز ابرهن علي سلامتة وجهة نظرك بشي مما حدث سابقا في الواقع فلما بدات حملات صيد الرقيق في غرب افريقيا وترحيلهم قسرا الي امريكا قامت برطانيا بالوقوف ذد تلك الحملات واصرت علي وقف تلك الحملات والسماح بالرجوع لمن يرغب في الرجوع وبعد ذلك رجع عدد قليل منهم الي افريقيا الجدير بالذكرا ن الذين عادو من حملة الاسترقاق بدا يمارسون العنصرية علي اهلهم علي اعتبار انهم عاشو في بلاد العم سام .

[صلاح محجوب عبداللطيف]

جايز لأنهم ما شافوا البشتنة ولا شافوا
الدفارات والشماعة ولا أنتظار المواصلات
هم وين من التفاح والايسكريم المشكل ولبن المراعي والطازج
ألبان سبحان الله مشكلة وماشايفين أي بقرة بتحلب

[هجره]

جايز لأنهم ما شافوا البشتنة ولا شافوا
الدفارات والشماعة ولا أنتظار المواصلات
هم وين من التفاح والايسكريم المشكل ولبن المراعي والطازج
ألبان سبحان الله مشكلة وماشايفين أي بقرة بتحلب

جايييز لييييييييييية







اكيييييييييييييد حناااكيييييش هم اهلم الكبار بجو هنا بقلو انت السخانة دى شنو؟؟؟؟



اتقول نحنا عايشين فى المتجمد الشمالى .

[من الحله جيت]

العيب ليس في الاولاد او البنات العيب علينا الماعرفنا نربي عيالنا اختلاط مع اجناس مختلفه لهجات مختلفه عادات تقاليد اكتساب من كل جهة ونحن ما نحاول نصحح اذا انت قلدت وغيرت لسانك السوداني اول شي واخطر من دا كله عدم زيارة الوطن لسنوات طويلة يعني بعد دا لالوم علي حنكشة العيال والله يرد غربتكم ويحمي عيالنا ويحفظهم

[لورا]

بما اني اناا مغتربة طول عمري اتولدت واتربيت برة السودان وهسي حاليا انا عايشة ف السودان بحكم القراية ف الجامعه وكدة حابة اقوليكم...
انو لو حاولتو تفهمو اولاد المغتربين حتلقوهم ناس لذاذ شديد وقلبهم ابيض .. وكتير منهم ناس فاهمين وزوق واسلوبهم راقي ..
اما حكاية الدلع دا فدي حاجة مابيدهم هم اتربو ف بيئة غير بيئتكم يعني كل ش فيها سهل وموجود وكل طلبتاهم ملباة انا بصراحة بعد شفتو من بعض الطالبات معاي ف الجامعه حسيت انو كلامهم البقولو دا يمكن تصنيفو تحت الحقد الطبقي مااكتر ..
وع فكرة كمان السودانيين اول مايمشو هناك بكونو متخلفين يعني غريبين لانو البيئة والناس غير الي اتعودو عليهم باختصار كل زوول بكون غريب ف البيئة الي مااتربى فيها ...
واولاد المغتربين بصراحة لما يكونو جايين هنا بكونو فرحانيين انو خلاص حنرجع بلدنا ونرتاح من الغربة بس لما يجو هنا بيتفاجئو بالبلد من اقاربهم قبل الغربو لو ماسموعهم كلمة ممتخلفين بحسسوهم بيها دا غير الاستغلال من الناس ...
فيعني هم ببقو حاسين بغربة في بلدان الناس وفي بلدهم وكمان في بلدهم اكتر ..

[النصيح حديدو]

[align=center]أشكرك أخي الغالي دكتور صلاح على هذا الموضوع الجميل
اقول وبالله التوفيق،،
ان اولاد المغتربين مظلومين، فهم جزء من النسيج الاجتماعي السوداني ، رغم الفواصل الجغرافية.. الا انهم قد تشبروا العادات والتقاليد السودانية من اسرتهم المحيطة بهم ومن باقي الاسر السودانية المتواجدة في المهجر.. ولكنهم في نفس الوقت ايضا تشربوا بعض عادات وتقاليد الشعوب المحيطة بهم وهذا شئ طبيعي وكثير من الاسر الواعية قد وظفت هذه الميزات الجديدة واستثمرتها في التربية ، فاقول ان 90% من ابنا ءالمغتربين بخير.. وبعيدين عن الدلع والحنكشة.. وان بدت عليهم مظاهرها الا انها تزول سريعاً فور اندماجهم في الحياة السودانية الكبيرة عند العودة للسودان..
والاختلاف الذي يظهر في السودان بين اولاد الداخل اذا صح القول واولاد الخارج .. هو ان اولاد الخارج يتعاملون بمستوى رفيع من الذوق والترفع عن بعض الامور التي يمارسها اولاد الداخل.. لذا يراهم البعض مختلفين نوعما عنهم .. ويبنوا على هذا الاختلاف وينسجوا حوله كثير من قصص الحنكشة واساطيرها .. التي تحاصر ابنا ءالمغتربين ظلماً وبهتانا..
والنظرة هذه لا يمكن ان تتغير بسهولة ولكن على الاباء المغتربين ان يركزوا على تنشئة ابنائهم التنشئة الدينية الصالحة وان يزودوهم بالمثل والقيم والتقاليد السودانية السمحة والتي سوف تعينهم وتنفعهم في مستقبل ايامهم .. وان اشاء الله القافلة ستسير بعون الله وتوفيقه وتجلي ليالي الغربة وتعود الطيور الى اوكارها..
ودمتم في رعاية الله وحفظه..[/align][/b][/color]

[Toma]

بسم الله الرحمن الرحيم

أولا حابة أشكر أستاذ صلاح على الموضوع الجميل دة، ومداخلتي فيهو إنه عايزة أوضح حاجة، طبعا ما كل مغترب حنكوش وما كل سوداني قاعد في السودان ماحنكوش الصراحة الكلمة دي بتتراوح بين الإتنين يعني مثلا السودانيين المريشين (الأغنياء) القاعدين في السودان بدلعوا عيالهم لدرجة الحنكشة والمياعة والصراحة أنا بشوف كتير يوم أجي السودان وبضايق من الحاجة دي في حين إنه بعض المغتربين عيالهم عاديين جدا ولا كأنهم في بلد غربة تلقى الناس بتنظر ليهم نظرة مخيفة جدا وكأنهم بقولوا انتوا منبوذين ولا انتوا متكبرين والصراحة ماكل المغتربين عندهم روح التكبر والتفاخر بس في ناس مخلوعة من الطلعة برا وماصدقت هجت من البلد دايرين يترفعوا على أهل بلدهم وأنا ضد الحكاية دي وأكرها عمى لأنه ديل ناس عندهم نفسيات البتكبروا ديل فلازم مانحكم على الناس من موقف أو اتنين لازم نشوف الموضوع دة من أكثر من جانب عشان نعرف حقيقة عيال المغتربين .....وتشكر مرة تاانية على الموضوع الأكثر من رائع دة يا أستاذ

[معتبر]

هم ما حناكيش بس الناس بتصفهم بالصفة دي بعضهم يصدقها ويحاول يعيشها
ويقوموا يتصفوا بيها وتنعكس علي الحواليهم ولا بعض البنات خاصة تحب الدلع وتلقي الحكاية ماشة تصبح ليها عادة
انا غايتو بكيفوني مرات

[m2nooo]

هم ما حناكيش بس الناس بتصفهم بالصفة دي بعضهم يصدقها ويحاول يعيشها
ويقوموا يتصفوا بيها وتنعكس علي الحواليهم ولا بعض البنات خاصة تحب الدلع وتلقي الحكاية ماشة تصبح ليها عادة
انا غايتو بكيفوني مرات

فعلا علوش حلو الدلع على البنات لكين ماحلو لما الوحده تصطنع الدلع
ل كين على الاولاد

[عبدالله عوض الكريم احمد]

ياغربة كوني برداً وسلاماً على كل مغترب
الاستاذ صلاح سأل سؤال جميل جداً جداً فلو قلنا هم حناكيش بس نضع في الاعتبار الحنكشه دي مكتسبة ودخيله على مجتمعنا
ولكن لحد الان الاجابات كلها فيها وفيها ؟؟؟
بس قبل ماننخرط في الاجابات نود أن نسأل الاستاذ/ صلاح
ليؤجز لنا في عدة احرف معنى كلمة (( الحنكشه ))
لو تكرم الاستاذ / صلاح
حتى تكون الاجابات مبنيه على اسس سليمه
ولك التحية يا استاذنا الغالي جداً / صلاح

[هدووء انثى]

لا واللهي حرام عليكم ظلمتوهم شديد كسرتو خاطرهم و رحتوهم كدا .. يجماعه كل زول بكيفو فحياتو كل زول عارف طريقو .. ما عليكم بزول ..

[Sahar al.shareef]

الموضوع مررا شدني وتمنيت الاقي احد يعطيني الفرصه عشان اشرح لكم وضعنا نحنا المغتربين ، انا ضد تعبيركم وتعريفكم عننا ، ( حناكيش ، متكبرين ، مصطنعين .. وغيره كثير ) اذا انا قلت ماما او بابا اذا كلامي كان غير سوداني اذا استغربت من شي عرفته او شفته من السودان اذا شكلي او اسلوبي مايدل اني سودانيه ، كل دا ابدا مو معناه اني اتبرأ من اصلي وبلدي ، مو معناه اني مدلعه او حنكوشه ، لا البعض يكون مواليد اي دوله عربيه البعض امه وابوه سنيين ماسافروا بسبب ظروف حكمت عليهم وتاقلموا مع منطقتهم وربوا عيالهم ع نفس البيئه اللي هما فيها ، واحيانا يكون سوداني بس فيه اختلاط جنسيات يمني مصري اي شي والجنسيه الثانيه اتعايش فيها اكثر بشي خارج عن ارادته .
ترى واحنا نحب بلدنا حتى لو ماشفناها بس نسمع شي عنها نحس بحنين مهما كان الانسان مرتاح في اي دوله راحة وطمأنينة بلده غير ،
عشان كذا اتمنى تراعوا ظروف واحاسيس المغتربين ولاتنظروا لهم بنظره دونيه .
في النهايه : انا سودانيه وافتخر ببلدي

[تائب]

الموضوع مررا شدني وتمنيت الاقي احد يعطيني الفرصه عشان اشرح لكم وضعنا نحنا المغتربين ، انا ضد تعبيركم وتعريفكم عننا ، ( حناكيش ، متكبرين ، مصطنعين .. وغيره كثير ) اذا انا قلت ماما او بابا اذا كلامي كان غير سوداني اذا استغربت من شي عرفته او شفته من السودان اذا شكلي او اسلوبي مايدل اني سودانيه ، كل دا ابدا مو معناه اني اتبرأ من اصلي وبلدي ، مو معناه اني مدلعه او حنكوشه ، لا البعض يكون مواليد اي دوله عربيه البعض امه وابوه سنيين ماسافروا بسبب ظروف حكمت عليهم وتاقلموا مع منطقتهم وربوا عيالهم ع نفس البيئه اللي هما فيها ، واحيانا يكون سوداني بس فيه اختلاط جنسيات يمني مصري اي شي والجنسيه الثانيه اتعايش فيها اكثر بشي خارج عن ارادته .
ترى واحنا نحب بلدنا حتى لو ماشفناها بس نسمع شي عنها نحس بحنين مهما كان الانسان مرتاح في اي دوله راحة وطمأنينة بلده غير ،
عشان كذا اتمنى تراعوا ظروف واحاسيس المغتربين ولاتنظروا لهم بنظره دونيه .
في النهايه : انا سودانيه وافتخر ببلدي

بتنا أختنا الغاليهsaher
كلامك حلو جداً وينم على إنسان يعيش أزمه ويعانى من
تهمه الصقت به وهو منها برئ .. والإنسان ابن البيئه
التى يقضى فيها وقتاً أكثر من الوقت الذي يقضيه داخل
البيت ..
والحنكشه سلوك وإستعداد فطري احياناً نجد انسان
عاش عمره كله فى قريه و فى شظف فى فقر وفى
سلوكه العام ناعم مدلع ومرهف أكثر من الذى قضى
حياته فى دعه ..فى دلال ..
وانا مغترب بالسعوديه واسرتى بالسودان لظرفٍ ما
وظروف عملى تتطلب منى ان اخرج للعمل لمراجعة
اعمال الشركه لدى شركات أخري ..وجدت بعض ابناء
السودانين المغتربين اصحاب مراكز ونفوذ ورجل قوي
ومتماسك أكثر منى انا الذي ولدت ودرست وتربيت و
ترعرعت بالسودان ..
ومن البلاهه أن أضحك أو أسخر من إنسان ما بعرف
[البعشوم] لأنه يعرف انه الثعلب .. والإسم الصحيح هو
الذي يعرفه هذا الصبى .. هو الاسم العلمى الذى تعارف
عليه السودانى والبحرينى والمصري ..
فالحنكشه والميوعه سلوك وطباع .. ابناء الغتربين أبعد
ما يكونوا عنها ..أقول قولى هذا وإبنائي وأسرتى يعيشون
فى السودان ..أقول ذلك للحقيقه والتاريخ ..
فالذي يعتقد الحنكشه مرتبطه بنوع الحياة التى يعيشها
الإنسان ..كالأبله الذي يعتقد إن الأصاله وكرم الطباع
مرتبطه بالصحراء والخيمه والجمال ..فالإنسان الجيد
قد نجده بالمدن .. بالفيلا ..والكامري..