صعب الزمن ان درت دارت بيك سنين لافحاك في كف القدر فاكاك في وش الرياح ماخداك قصباً بالجبر خاتاك في حضن الضياع خاتفاك من نص البشر وات ماك بشر كيفن تكون متل البشر والكل بيتامر عليك حتى الجمادات والحجر بايعك نهاراً للضلام خاتيك في رف الفجر تلقى الهجير متوسدك جادعك بعيد وقت العصر ترجع توابيت الضلام وقت الفجر واقد جمر تحلف تقول نار المقر صيفك مازي الصيوف نارو بتهب ذي المطر كان المطر بيجيب رزاز مطرك محمل بالجمر بردك مو زي البرود موجه صقيع نص النهار تقلب لهيباً في العصر صعب الزمن ان دار بدور للودار وان دار بيديك القمر مرات يختك في السماء ويديك تاني المنحدر ناس الزمن متعودين زيف المظاهر والدجل كضب العدو .الاحتيال.قصصاً.خرافاتاً.فقر
انا بكرهك
بس بكرهك..!
انا بكره اليوم الصنع قلبا يكورك ويندهك
انا بكره الوطن البلم شرف الغرام المنتهك
من ياتو باب طليت علي ما كنت اصلا بشبهك
انا بكرهك
انا شلت ريدك في القليب وسقيتو من دم العروق
صنقعت دليت النجم دنقرت كبيت نور وشوق
وعصرت موية الانتظار ختيتا في وجع الحروق
وكان النتيجة تبيع هوي هو اريتو كان سويتلو سوق
انا بكرهك
من وين اجيب ليك الدموع
من وين اصنقر حيل كلام كان امنيات قلبو الرجوع
من وين اذا هتك الضلام حيل خيلي القالك شموع
لكني مجبور اطردك واقفل وراك باب الضلوع
شديت رحالاتي ومشيت وكتين هتك حيلك هواي
ارتحت في موجي ورسيت
لا حرك الموج البحر
لا صد فلبي ولا قسيت لكن طلعت خيال عشم
ضمخ رؤى الوجع المميت
انا بكرهك
قدر اشتهاي
انا بكرهك
قدر الغرام الكان زمان كابت مساماتي وهواي
انا بكرهك
قدر اني ما لودت بيك كريات شراييني ودماي
انا بكرهك
قدر اني غنيتك غناي
من وين دخلت علي مدن شاخت من الوجع الاليم
من وين طرقت جدار قلب لقح هوى العشق العقيم
من وين سخت شمسك علي
كانت سماي مليانة غيم
فتق جراحــاتي
فتق جراحاتي وامش
خليني في لهب الجحيم
انا قلت ليك..
انا بكرهك
قدر المواسم الشادة خيل الريد عليك
انا بكرهك
قدر المصائب الحارسة بوابات مجيك
انا بكرهك
نفس المساحة وحجم قلبي الكان تملي بيشتهيك
بقى بكرهك
واتوكل ارحل مني فوت
حرمان علي قلبي الكلام
كان غيرك اجتاحو السكوت
خليهو قلبي الاندفن
تنسج عليه العنكبوت
اوخلي.... من بعدك يموت
الموت اخير......
من اني افضل
في رحابك وفي رجاك
انا كنت لو غاب القمر دائما بضوي
ضلام دناك
وانا كنت لو غيمك رحل
بطلع عشان اسكن سماك
وانا كنت لو بردك نزل
بوقد صوابعي لهب حداك
لكن منو القدر كدا
والله لو انا في محلك
بنسج الشمس احترام
واهديها ليك متمددة
بفتح كراريس الكلام
اختار حروفي واجردا
بنبش قبور المستحيل
كلمات شكر متفردا
لكن خسارة على قلب
حباك بلا ما يعرفك
انعل ابو القلم العلي دفتر غناك دمو انسفك
انعل ابو الشعر الغشاني وغنى فيك والفك
منعول غناي
منعول غناي كان ما امتطيت خيلي وبقيت اتاسفك
بتاسفك وكتين عيوني بسوقن الشوق لي انتظارك
لما ليلي يسوق محاسنو وينهزم عندك نهارك
لما ابكي انهزامي عشان ابارك انتصارك
لما كوكبي ساب مدارو رحل عشان يسكن مدارك
كنت مالي زمان ومالك
لكن وحاتك بكرهك
ندمان
ندمان على عمرا معاك ضيعتو
ضيعتو في غفلة زمن
ندمان علي
دمعا سكبتو على رضاك بلا تمن
انا كنت بحلم في وجودك ينكسر خاطر الشجن
لكن رضاي عليك عشم ابليس قصاد جنة عدن
انا بكرهك
كلما يطول ليلي ويواتيه العذاب
انا بكرهك
كل ما القلم يركب مصاعب الدنيا
يمشي على الكتاب
انا بكرهك
كل ما الفراق كتل مضامين العشق سدالو باب
انا بكرهك
قدر العيون ما تلبس التوب الزراق
تتوضأ موية الانتحاب
انا بكرهك
من كل باب انا بكرهك
واتوكل ارحل من جواي
غلطان اذا قلبك هداك قال ليك حا تفضل غناي
غلطان اذا عقلك رضخ لي ظن يقول انك حداي
والله ما فارق معاي
انا كنت ناوي اجملك
بس كنت ناوي اجملك
وامسك مضامين اللغات
من فيض حروفي اكملك
ترحل علي درب العشم
بي زاد هواي احملك
وكتين اخش قلبك جرا
واقطع قليبي وادملك
ندمان منو
انا غايتو ما ندمان عليك
اتوكل ارحل من جواي عيش العذاب الباقي فيك
ولو قلبك اتجرأ رجع
حقك تلومو علي مجيك
شان قلبي انت مليتو دم
ياخ فلبي انت مليتو دم
ما عادلو باقي يسبو ليك
على كل حال
انا بكرهك
عدد الحصى وعدد الرمال
انا بكرهك
عدد الصواب والاحتمال
انا بكرهك
عدد الحقائق والخيال
انا بكرهك
عد الشنة وعدد الجمال
انا بكرهك
عدد الاجابات والسؤال
انا ابكرهك
عدد الشعر ماسنة سيف الارتجال
انا بكرهك
عدد اللي ممكن والمحال
انا بكرهك
عد ما زمان قت ليك تعال
انا بكرهك
مستورة حالي وراك وفوت
يا دابو ليلك همو طال
مستورة حالي وراك وفوت
يا دابو ليلك همو طال
عاى كل حال
انا بكرهك
سكت جُوّاك صوت الريد وغرقت بيك مراكب الهم وتاهت فيك مدن عشمك وضاعت فيك معاني الذات وما هزَّتني مأساتك وصغرت فيني آهاتك وكبرت فيني ... لا ياك البتنفعني ولا في يوم بتستاهل تكون جنبي ومادايراك عشا البايتات ولا رُكَّازة تسندني ولا بتحميني في النايبات ولا لوليت طفل ما بشبه الشُفَّع بكاهو نحيب ولا ببنيك بيت من قش أساسو لهيب خلاص بعدت مسافاتنا ومحال ألقاك تاني قريب وأنا الفاكراك حبيب بالجد وما قايلاك شبه حبيب والعود البقول لك طق ... أكيد مشقوق ولا بنفع مِرِقْ لي بيت ولا بنفع يشيل راكوبة تشعر فيها تترنَّم تقول دوبيت ما أصلو التسوّي كريت بتلقا العميا في جِلِدا وتتغابى وتقول يا الله شن سوّيت وما لَمّيت علي زولاً بتاوق لي مشاعرو رهاب واتاكي الباب عشان أدخل علي القلب المستَّف ريد ولا حسّيت خيوط ريداً ضعاف بالحيل بنت بيت العناكب في جدار ريدي ونزَّلت البيوت بي لمسة من إيدي ولا حنّيت عليك يا عنكبوت واهم غزلت خيوطك الواهنة وما قوّيت ولا جاني الهداو الله عشان يقنعني بي قولو ولا الإقناع مُمَثَّل فيك عشان تبنيهو صرح الريد مُمَرَّد بي قوارير عشك الزايف ولا سليمان أكان خايف ولا بلقيس مُمَثَّلة فيني شان أدخُل قصُر حُبَّك وأكشف عنُّو ساق ريدي ولا فكَّرت في إنُّو القزاز موية عشان أبحر وأكون عميان وما شايف ولا حُبَّك عصا موسى عشان تلهف مشاعري ومعجزة تسمّيهو ريدك لي ولا فيك الزمن واقف ولا شدَّاد ولد عنتر عشان يدمن عشق عبلة ويقَبّل لي سيوف موتو ولا عبلة البتشبهني ولا بنشبه زمن فيهو الغرام قصَّة وكان فيهو العزول جلاَّد رفع سوطو ولا تقول لي بكون قيسك وليلى تكوني قِدَّامي أجن وأسرح وأسافر فيكي إلهامي وما دايراك تكون لي لحظة أحلامي بقيت كابوس بعكّر صفو أيَّامي ولا بشحد وأمد إيدي عشان تدّيني فتفات وعد عفيف كفّي بيربط لي بطُن حلمو وأتقّلا بي حجر من صد وما محتاجة جَزْر ومَدْ عشان نيلك اعطشني ولو في يوم رضى ودفَّق بزيد بالحيل وأشرب لي جدار صبري واقول بنفد بيوتي كرامة ساسا متين وما بتتهد سعيد في غُربتك عني ... أنا الأسعد تعيس حيران عليك بزعل وما بنساها كلمة وُدْ برسّل ليك خطاب مخصوص ... حروف رحمة عناية المولى تتولاَّك وما منتظرة مِنّاك رد وآخر القول طرف جوابي فيو ملحوظة أقراها منو القال ليك تقاضيني علي تحكُمْ تقيم الحَدْ؟! منو القال ليك إرتدِّيت هو كان آمنت بيك أصلاً عشان أرتد !!!!!!!!
كتبت ليك
لا بيني بينك
ريدة لا قصة غرام
كتبت ليك
اخترت ليك أجمل حروف
وأصدق فواصل نادرة في لغة الكلام
لا قصدي ألهو معاك بي كلمات غنا
لا شعري ليك مرجيحة من شعر الغمام
كتبت ليك والله يا قمر الزمان
عشان جيتي بالزمن المحنة
وشفت في عينيك حس أهلي القدام
كتبت ليك وأنا جاي من زمن الشقى
المرسوم على وش السواقي مظللا
تتمدد الساعات سنين
تتفتح الأحزان غريبة ومذهلة
واشتاق أفتش نسمة في الزمن العذاب
وأيامي من كتر الأسى
كتر العزوف والاغتراب
صارت حروف مترهلة
لحظات كثيفة ومهملة
كتبت ليك .. ..... وقفت ليك
لامن لقيتك جايه في قلب الطريق
ولمحت فيك راحة المشاوير البعيدة
ولفحة النسمة الحنينة الجاية من جوف المضيق
حسيت عجايب الدنيا اتلمت بقت جاياني من عصر سحيق
عينيك حس أطفال بنادو القمرة للغايب يعود
وجبينك الضواي حجل حبوبة في الزمن السعيد
يا قمرة .....شوفي السنسنة الحمرا...
شوفي لي الما جا...
وأنا في قساوة الموحش الزمن المكهرب
بالحريق أنا حيلتي إيه قولي يا قمر الزمان
غير اتكي احلم معاك واحضن أماسي الصحو
والأمل البريق
ترابك والبلد راجيك
سرابك والامانى دليل
سحابك والبرق والناس
غيابك بكى فينا شليل
ايابك فى زمن ود ناس
حلم وطنك صعب بالحيل
تعال كان جفت الاقلام
طشاش صورتك على الايام
تلوح لينا بين زمنين
نصيب عينك من الاحلام
يصيب كل البلد بى عين
ملامحك فى زمانا جاى
هناك واضحة ولابختلفو فيها اتنين
رجوعك فى الخريف فى الصيف
دة هو الخلانا بين رايين
بنترجاك معانا الدين
بنترجاك معانا الطين
ونترجاك عليك اسم الله
قول للماشي ديل جايين
بنترجاك تعال مارق من الاحزان
تعال مارق من الازمان
تعال مارق من الاوزان
تعال مارق من الانسان
تعال فى الحلة شايل سيف
تعال فاضي ومعاك الكيف
تعال ان شاء الله ماتقول كيف
تعال نبض الزمن جواك
خلاص جوانا قرب اقيف
تعال غير ملامح اجيال
تعال لى ها البلد واحفر
معانيك فى التبس والنال
تعال نفض غبار الفال
تعال علمنا او كلمنا عن معنى الشعرفى الحال
عليك مابينا من اشواق
ومن حرقة طيور راجعة لى احضان وطن مشتاق
تقايط ليلنا بى شمسا تخش جوانا بالرقراق
تفتح فى مسام الكون ملامح لى مطر نقناق
يغسل من صباحنا الليل
يطيب جرحنا الحراق
فهل كان التمنى سبيل
وهل يعنى الترابط دم
ضميرنا المات بلا تاريخ
على قبر القصيد بكم
زمانك والمطر ضدين
بنتحدى السحاب مالم
تكون زى مابنكونك خيل
على ايقاع خطاوى النم
نجيك بالسكتين راكزين
معاك جوة الوجع نتلم
بيوتنا الفاتحة جد راجياك
تقيل فوق بيوتنا وكم
معاك لسة الوسيع قدام
سماك يادوبا دار تنجم
مكانك كان هو ضاق بالحيل
بشيل كل الوطن حرم
بشيل كل الوطن حرم
بشيل كل الوطن حرم
بتشرق من شموس ملكال
وتزرع فى الدروب الغيم
تلاقى الصحراء بالمطرة
وتقول لى حلفا كيف الحال
مشيها على الارض تاريخ
حبيبتى الفى السبح منضومة
فى النور العلى المريخ
صباحات مارقة قيرة وسيرة
وصوت اطفال بلاعبو الطيرة
ساعة الدنيا كان بى خيرها
شلعت فى القلوب دارفور
وقامت شايلة نور اجيال
تقابلك ديمة بى عوافى
واجمل من عيونا هى مافى
ومافيش مافى داخل كونا
لمت كل جميل فى الدنيا
تظهر بين هلال وهلال
حبيبتى اللامة طيبة شندى
روعة مدنى والتاكا الوراها تلال
خشت فينى بدرآ هلا
ومن دم الوريد تندلا
تبكى على المداين النايمة
تضحك فى الصقور الحايمة
تطلع من جوابى سؤال
حبيبتى الماحصل لاقيتا
يوم فوق بيتا دست خيتا من جيران
بتسكن فى دواخلى حقيقة
واسع ضيقا ليا رفيقة
بى رغم المآسي طريقة
من احزانى بلت ريقة
اصيلة وريحتا السودان
حبيبتى الشايلة
روعة كسلا منقة كسلا
شاى ناس كسلا
بن ناس كسلا
قومت كسلا
قعدة كسلا
رقدة كسلا
فوق احضان جبال توتيل
حبيبتو الماحصل خلاها
لاكلاها لاملاها
لايوم لان
حبيبتى الجنة فى الازمان
حبيبتى المانطق غناها
تطلع فوق صباح الدنيا
فى النيل الملاقى سماها
فى سورة المسد فى طة
فى مرساها فى معناها
فى جدى الزمان وصاها
من اقصاها لى ادناها
ومن ادناها لى اقصاها
غايبة وفوق دواخلى حضور
ماخط القلم لولاها
كان مات فى طريقى النور
