حتبقى جديد

[معتصم حامد عبدالرحيم]

[align=center]أؤكد ليك حتبقى جديد
لقيت زولي ..
القبيل الكان ..
ما يا هو ..
بعد ما مشيت سنيني غريب ..
رحلت بعيد بدون رجعة ..
وحيد محتار ..
بدون ما أحس ..
كياني كيان ..
صباحي صباح ..
مساي مكسور ..
حزين شاكي ..
يجيني الليل أنوم باكي ..
وأقوم من نومي مليان هم ..
أقول بكره الزمن يضحك ..
وما يضحك ..
يمد في لسانو سخرية ..
ورغم الحالة والأحوال ..
عزمت عديل وصممت ..
أفتش ليكا يا زولي ..
أفتش فيكا عن ذاتي ..
أفتش فيكا ..
تاريخي اللي راح مني ..
وعن ميلاد فقدتو زمان ..
عن إنساني اللي ضاع مني ..
قمت الليله قابلتو وما عرفتو ..
ضحك في وشي أدهشتو ..
سألتو حقيقة ..
باستغراب سكن خاطري ..
مين إنت ..
وإنت منو ..
قال لي خلاص نسيت يا زول ..
حليلك يا زمن أول ..
حليلو الكان حبيبنا يا ناس ..
بيداوي الجرح والإحساس ..
نسيت نفسك ..
نسيت إسمك ..
نسيت وطنك ..
تاريخك وعنوانك ..
حتهرب وين ..
طول ما إنت ساكن فيك ..
أظنك لسه ماك عارف ..
أنا الزول الفقدتو زمان وما لاقيه ..
أنا الروح البتسكن فيك ..
يوم قبلت خاليني ..
تركت وراكا فيك كم زول ..
ورحت بعيد ..
بعيد جداً وما عدت ..
فضلت أطوف ديار وديار ..
وأسأل عنك الناس البعرفوكا ..
وأسأل عنك الأيام ..
وعن شهراً وراهو شهر ..
سنين ولت ..
وما لاقيك ..
ولما قنعت قبلت ..
حزين مكسور ..
لقيتك إنت يا زولي ..
الزمان سافر ..
وضاع في عتمة الغربة ..
لا خبراً تجيبو إنت ..
لا زولاً يقول لاقاك ..
لا إحساس يقول مالك ..
خليت الخلوق إنت ..
بكيت القلوب إنت ..
بعد ودعت قبلت ..
عيون أمك ..
دموع كابات ..
زي شلال ..
موادعاك للحسن وحسين ..
نادهالك كريم إنت ..
ترجع ليها سالم وزين ..
أما أبوك ..
وأخوانك ..
كل ما يمر عليهم يوم ..
خيالك ما بيفارقهم ..
أخوك يضحك ويتذكر ..
ألعابكم وقفشاتكم ..
أفراحكم وأحزانكم ..
زي أطفال صغار يا دوب ..
وإخواتك يغنن لك ..
عريسنا هناك ..
عديلنا الزين ..
يجينا تمام ..
وعمران جيب ..
ينسينا العذاب الكان ..
يقلب البيت غنا وأفراح ..
لكن آآه ..
لكن آآآخ ..
ووا أسفي ..
إنت هناك نسيت الناس ..
ووا أسفاي كمان تاني ..
لما رجعت ماك إنت ..
وماك زولنا الزمان سافر ..
وودعناه لي الله ..
رجعت صحي ..
وما في خلاف ..
لكن قولي كيف إنت ..
وكت راجع ..
ضهر محني ..
شعر شايب ..
عيون زايغه ..
وحيل مهدود ..
وشيش مرسوم ..
بذل الغربة والوحدة ..
صورة تخالف ..
الصورة الزمان كانت ..
بكينا كتير وأتعبرنا ..
في زولنا الرجع سنوات ..
شبابك وين ..
لمعة عينك الحلوة ..
ضحكاتك ترن في البيت ..
نبرة صوتك العالية ..
نشوفك جاي نتطمن ..
خطواتك تدب في البيت ..
تقول أسدين ..
جيتنا الليلة ماك إنت ..
وماك زولنا الزمان سافر ..
ولمان شفت تأثيرنا وتأثرنا ..
بكيت إنت ..
شرق حلقك من الدمعة ..
إلا أقولك آآ زولي ..
مفيش فايدة ..
فات زمن البكا وعدى ..
وكل الراح ما همية يا زولي ..
طول ما جيتا بيناتنا ..
ياك زولنا وحبيبنا كمان ..
حنبقالك دفاك الراح ..
سنين وسنين ..
نديك الأمل تاني ..
طول ما إنت بيناتنا ..
حترجع تاني زي أول ..
حبيبنا الكان ..
وروحنا كمان ..
شيل من بالك الكان داك ..
وأرجع زولنا ..
أبقى جديد ..
وحتبقى جديد ..
بإذن الواحد القهار ..
حتبقى جديد ..
نعاهدك جد ..
أيد في أيد ..
حتبقى جديد ..
طول ما إنت في وطنك ..
وسط ناسك وخلانك ..
حتبقى جديد[/align]..

[ود الزوحي]

كلامك حير الكلمة .. وجدد دموع ناسا تفتش على الغربة ..

معتصم .. أجمل القصائد هي التي تعبر عن واقع الحال .. وانت جبت القصيد ..

تحياتي يا رائع وخليك مواصل ..


تقبل وجود توقيعي بهذه الصفحة !!

وان شا الله تبقى ديمه جديد

[معتصم حامد عبدالرحيم]

كلامك حير الكلمة .. وجدد دموع ناسا تفتش على الغربة ..

معتصم .. أجمل القصائد هي التي تعبر عن واقع الحال .. وانت جبت القصيد ..

تحياتي يا رائع وخليك مواصل ..


تقبل وجود توقيعي بهذه الصفحة !!

وان شا الله تبقى ديمه جديد

مؤكد سعيد بمرورك الرائع ..
وربنا يقدرني وكلي جديد ..
وكل الجنبي يبقوا جداد (مش دجاج يعني) !!! ..