تكاليف الزواج السودانى كااااااملة

[القلب الملك]

العرس التاني بيدفعك اضعاف اضعاف وبتدفع الثمن غالي

ياسلام لو الواحد عندو اربعة الوان واحجام وثقافات مختلفة ،،،

[القلب الملك]

نفس الاسعار + حق الرضويه للاولى

ما يعادل كم يا مون ،،،

[احاسيس]

الزمن دا تتزوج الاولى وتاخد التانية مجانا

هههههههههههه طيب ليه ماتتزوج التانية وتاخد الاولى مجانا

[Batta]

ههههههههههه والله يابطوطة دايرة انزل الجزء التالت من تكاليف الزواج لكن شايفة الناس دى هااارشة رايك شنو ياختى

خلي بنوت المنتدى اليتخارجن اول ولا برفعوا عليك قضية بورة وكدا ويعني

[احاسيس]

ههههههههههههههههه وانا مالى هو انا غبت حاغة من بيتنا

[kaydoo]

ادخل فلم هندي واختف رجلك لميدان التحرير جيب 2 وتعال

لألألألألألألألألألألألألألألأ انا ما عيز من ميدان التحرير انا عايز من الساحة الخضرة .. عشان نمشي علي عفراء مول من هناك علي طول

[kaydoo]

كدى شوف هفصة رايها شنووو؟

هفصة قالت نعقدو بي بلح

[راشد ود نادوس]

سلامى على الحاضر معانا والخالى مكانه
يا بتنا يعنى دراسه الجدوى الإنتى عمايتها دى
مابين 10 مليون و15 مليون يعنى عرس مافى
أقعدى بى بورتك ساكت
لكى منى كل التحايا

[احاسيس]

هههههه يارااشد بورة مجيهة ولا عرس مجهجه

[عبدالله عوض الكريم احمد]

الحمد لله القطر فااااااااااااااااااتنا
وانا بره منكم
ولاتكاليف ولا رغيف
بوره مجيهه كما ورد ذ كره

بقينا كل مانشوف القطر جاي نزوغ منو
مالنا وماعليتااااااااااااااااااااااااا

ودمسكين

[احاسيس]

هههههههه دا نظام الفاتك فوتو ولا شنو ياعبد الله ياسيدى من هنا كل اعضا ء منتدى انا سودانى بندعى ليك انو القطر يكون نسى حاجة فى المحطة و يعمل خط رجعة عشان يشيلك هههههههه
منوور البوست اخوى

[امجدونا]

مافي بالاقساط
بصراحه بوست جميل تسلم الايادي
خلاص نفكر نشتري شوية شوية وبعد كده نشوف العروس

[احاسيس]

والله يا امجدونا الاقساط دى بتدخلات فى حسابات اضعاف دى لانو ماتنسى هامش الربح وكدا


منوور البوست وحياك الله وانت بس قول يارب وكل شى بتسهل العبد فى التفكير والرب فى التدبير ان شالله

[احاسيس]

استراحة من التكاليف الكتيرة دى وعشان الناس الشالت الهم تفرفش شوية بس برضو حتى الفرفشة شاملة العرس وتكاليفو يعنى سيك سيك معلق فيك هههههه

كالعادة وخلافا لكل دول العالم التى تتم فيها مراسم الزواج فى يوم او اثنين وبأقل التكاليف الممكنة نجد ان الزواج السودانى هو عبارة عن مسلسل مكسيكى يستمر لايام وايام يجتمع فيها الاهل والاحباب والجيران وجيران الجيران والاقارب من الدرجة الخمسمائة بعد الالف وينفق فيه اموال طائلة تكفى لبناء مستشفى حديث او فندق 5نجوم او رواتب المعلمين فى احدى المحافظات


تبدأ الحكاية بعد ان تحس بالقلق عندما تجد ان معظم اصدقاءك قد دخلو القفص الذهبى طائعين مختارين_اؤمن تماما بمسألة القفص ولكن لدى تحفظات كثيرة على حكاية ذهبى دى_المهم تحس بالخطر وتأخذك غضبة حمقاء وتناجى نفسك وانت فى حفلة زواج احد الاصدقاء (والله الواحد بعد دا يشوف ليه مرا. معقول هناى الاهبل دا يعرس وانا لسه قاعد براى زى تور الساقية) عندها يستعرض خيالك قائمة طويلة من معارفك البنات ابتداء من ناس نونة زميلتك فى الروضة مرورا بصديقات مرحلة المراهقة الكتار وحتى زميلات الجامعة والشغل وبنات الحلة وبنات الاعمام والاخوال وباقى الاهل ثم وبسرعة تنسى كل اولئك النساء فى حياتك عندما تسترعى انتباهك الحسناء الجالسة فى ركن قصى فى حفل ذات الصديق الاهبل,تحبها من اول نظرة وتراقب حركاتها وسكناتها, تلاحظك هى لكن تعمل ماشايفة وتتلاهى بمكالمة وهمية فى موبايلها وهى ترمقك من طرف خفى كما يفعل الصياد المحترف


المهم تتعارفوا بواحدة من الطرق الكثيرة وجلسة جلستين فى الكافتريا ثم (ياهناى والله انا ماممكن اطلع وانزل معاك كدا ساى, الناس تقول علينا شنو؟ سمعتى حتبوظ) ثم تمسح دمعة وهمية من عينيها فتأخذك الحماسة وتقول (والله ياسوسو_ودا اسم دلع يقبل آلاف الاسماءمنعا للمشاكل_انا ناوى اصل بيتكم بس انتى عارفة الظروف والعرس بيكلف كتير وووووو) فتقاطعك سوسو بحنية ثعلبية وبنعومة الافاعى (انا مادايرة منك شى, انت بس تعال اخطب والعرس يتأجل لحد ماالظروف تتحسن) فتصدق الكلام من عوارتك وتحدد يوم الخطبة وتأخذ ثلة من اهلك وقليل من جيرانك واصدقاءك وتقصد بيت الملاك المختار وتفاجأ انت واهلك بحشد كبير فى بيت العروس وخيمة كبيره امام البيت وصوت المايكرفون يردد (تست تست واحد اتنين تلاتة تست تست) تأخذك الدهشة قبل ان يأخذك ابو العروس جانبا, يعدل عمته التوتل ثم يقول (والله ياولدى انحنا خطوبة ومسخرة ودخلة ومرقة ماعندنا,عشان كدا قررنا نعقد ليكم طوالى والعرس بالراحة) ثم بأبتسامة محذرة (ولا رايك شنو؟) وقبل ان تدلى برأيك غير المعتد به اصلا يكون وكيلك ووكيلها قد اتموا عقد القران فى الخيمة وتحولت انت بقدرة قادر من مشروع خطيب الى زوج-مع وقف التنفيذ-بسرعة البرق ثم يغمرك المعازيم (مبروك ياعريس مبروك ياعريس بيت مال وعيال) وانت كاضم ماقادر ترد وتسمع احدى عمات العروس وهى تقول (شوفوا ياخوانى من الفرحة لمن ماقادر يتكلم) ثم تطلق زغرودة مدوية وهى تبتعد تجتاحك معها رغبة فى لكمها فى فمها لتخرس الى الابد .. فرغم انها صارت شرعا حرمك المصون الا انه يجب عليك ان تقوم بطقوس مهولة ومراسم عرس كامل لأستلامها!!! وعندما تثور على الوضع وتحلف بالطلاق ان تمشى تجرها من شعرها وتجيبا بيتك بدون حفلات او كلام فارغ وتخلص .. تفاجأ بأن المعارضة تأتيك من الداخل أى امك واخواتك (ليه مادايرنا نفرح بيك؟ انحنا اقل من الناس البسوو الاعراس؟ والله لو ماعملت عرس ماعافيين منك؟ عليك الله عاين دا, داير الجارات ياكلن وشنا؟) فترضخ للأمر الواقع وتبيع قطعة ارض ورثتها عن جدك الرابع عشر وترهن بيت ابوك وتبيع الكمبيوتر والموبايل وتزوغ ببعض الصناديق ثم تستلف من 10-15صديق كدا واخيرا واخيرا جدا تجد نفسك حالق جديد ولابس بدلة سودا-لون الحداد!!!- متأبط شرا هو عروسك المصونة والتى جاءتك فى هيئة فيل صغير بعد ان نجحت وصفات التسمين التى قامت بها العمات والخالات وبعض الصديقات الخبيرات, تأتيك متدحرجة فى فستان ابيض-لون الفرح!!! -فتجلسا تحت بقعة ضوء مزخرفة عليها كرسيان تعرف بالكوشة- والتى لاول مرة تدرك معناها- الجميع فى الحفل فى رقص هستيرى والفنان يصدح بسعادة غير مبررة (شن بتقولوا فى الفرح البعذب سيده والريد البضيع زولوا!!) فتلمس الاغنية فيك اوتارا حساسة وتكاد تطفر الدموع من عيونك, وتجول عيناك على الحضور السعيد وتتوقف عيونك على آخر العزاب من اصدقاءك وهو يرنو اليك بحسد تارة وتجول عيناه بين الحسناوات تاره اخرى وتكاد تقرأ افكاره وهو يفكر (هسى فلان الاهبل دا عرس وانا قاعد براى زى تور الساقية؟) فتكاد تصرخ فيه محذرا ولكن صوتا خبيثا فى داخلك يهمس بمكر وحقد (وانا مالى, هو أنا فى زول حذرنى؟)؟

[المسيرية]

وبع علي طفشتو الرجال خلاص بورنا بورنا اها نعمل شنو تاني ,,,,,,,,,,,,,,, اسمعوا طلامي دا كلام ساي يعني ماحاصل

[kaydoo]

والله يا احاسيس حيرتينا وعملتي لينا حساسية مع العرس ذاتو ..

[الدهمشي]

[Batta]

تكوني يا حسوسة كاتبة (موش كتاب)من ورانا؟مشكلتي بعيش معاك الدور على طول ودي موهبة فيك

طيب الاستراحة الجاية جيبي لينا وجهة نظر الصياد,هي قصدي العروس.

وانتي هس خليتي اللعب ع المكشوف تاني هس كيف نقنع فلان داك,مادايرة منك شي خطوبة بس؟

[احاسيس]

والله يا احاسيس حيرتينا وعملتي لينا حساسية مع العرس ذاتو ..

ههههههه طيب اوصف ليك دواء رهيييب للحساسية اسموantstine
ياخوانا بطلو جرسة والله الموضوع دا ماصعب بس كلها 20 مليون بسسسسسسسسس

[احاسيس]

لو مابكيتك سنة وخليتك باقى العمر تتشهى فوق الهنا انا مابكون انا
دا لسان حال العرس القال كدا ما انا هههههههه
والله كان بكيتو وكان ابيتو مافايتاكم التكاليف دى اخير اكسب زمنك وابدا لم القروش