تعرف يا حبيب
فتران من دونك اكون وحدي
و اظنّك برضو بتلمحني
حين اشرح لليل ساعاتي
بحتاج ادّفق في وريدك
ارويلك وكتك بهديلي
بحتاج اتنفّس ترتيلك
للزمن الفيهو بناديلك
بحتاج يا حبيب اقعد جمبك
و اضمك واحكيلك عنّك
اقليلك احساسي و تشرب
من قهوة قلب بغنّيلك
يتكيّف لونك و ترسمني
في بالك و اشتاقلك اكتر
[grade="00008b ff6347 008000 4b0082"]يا شايلة همك مرتين
ومشيّلاني الهم معاك
مترقّبة الزمن البعيد
لامن زمن يومك نساك
ونساني برضو اليوم معاك
يا... خايفة من بكره البجيك
لامن ظلام الهم غشاك
وغشاني برضو الهم معاك
تعبت رؤاك مدّ البصر
ما تريّحي الشوف من (هناك)
وهناك رؤاك لمّن تصل
تكمل عليك بهجة رؤاك
يا زولة كبّت مويتا
شافت سراب كضّاب هناك
عطّشتي روحك مرتين
سقتينا لي سكّة هلاك
يا واقفة أبعد مني وأقرب للقليب
أنا لسّه منكوب في رجاك[/grade]
هبّشت جيوبي فقدتك
ونقرت الباب
اتفضل شكراً ما لقيتك
عاينت فى نفسى
كنت مخبأة بين القلب و غشاء التامور
يا ود من نور
معقول خاصية الطين تظهر فى شكل علاقتنا
لكني بحبك طين أو نور
فى أى مرّكب و أى خليط ...
غريبة الزهرة ما جفّت
ثمار اللقيا تتلفّت
سألت عليك عيون الغيم
بكت و دموعها ما كفّت
مشاويرك بتتحسّر
خطاك مفقودة فى الزمن البنادى عليك
يفتّش عن مواعيد ليك
بتثبت إنو فى جوّاك
عيون من طيبة تتفجّر
لأنك زى سحاب ماطر
أبداك من وين
أبداك منى ولاَ منك أبتديك محل محل
من ياتو منفذ ادخلك
وكل المنافذ فيك
سداها النحل
من ياتو شارع أوصلك
وكل الدروب معطونة لى آخر الوحل
أستبيح كل الحواجز وأدخلك
من بين مسامك .. أدخلك
من أىَ قاسم مشترك
وشبه التشابه .. أدخلك
ونتلاقى نهرين من تسامى وإشتها
وأبداك من حيث إنتهت عندك
خواتم الإنتهاء
سلام ما سلموا العبّاد أواخر الليل قليبن حاس
سلام والفيها شن بوفيها وإنت حجابي والوسواس
سلام ما خشَّ خيط النور على إبر النهار ومقاس
مشاعر قلبي عند زرزور يلاوي الريح بلا أنفاس
يلم الصور يسوِّي قصور وما من خرطة ما من ساس ،،
يسايسوا الريح ، يساومو صريح ، مع إنو جريح ،وما ينساس
سلامات يا أحنّ الناس
أقابلك في زمن أجمل
زمن في الريده ما محدود
أشيلك في خواطر الشوق
وفي وتر الهوى المشدود
الاقيك نغمه حامله الريد
أغنيــــــــلك
أتمتم بي حروف اسمك
زي طفلا صغير مولود
أناديـــــــلك
أشابيــــــــلك
اتمدد على ساعديك
بين إيديك أنام عمراً يطول جواي
معاك جواك أكون موجود
ولو يوم مر غير رؤياك
يكون من عمري مامعدود
اقيف مشدوه أسأل عنك النسمة
اظل بي بسمتك موعود
اقابلك إنت يوم باكر
ويوم باكر بلاقي بعيد
