[grade="00008b ff6347 008000 4b0082"]ياساتر علي ياخلا من نار المعطر توبا
ايام معاك ياحليلا حبي بالجمال موهوبه
عنوان الجمال ست ريدي شمس مابقت لغروبا
في ذاتك عجز تعبيري عن وصفك وجدت صعوبه[/grade]
ورينى شن طعم الدروس مادام بكانا مشى قطر
وكيف ذاتا ترتاح النفوس تقبل قرايتاً فى سفر
يايمه حان الإمتحان من وقتو بس فاضل شهر
ما اظنى من جور الزمان انجح واجيب ليكم نمر
كيف ذاتى يا نبع الحنان انجح من آلام السهر
عمرك سمعتيلك جبان خاض المعارك وانتصر
زينوبة كل ما افتح كتاب القاك فى أول سطر
القى الجداول والصحاب القى الجناين والتمر
فى الحصة عقلى أنا قام سدر يمه المدرس لو فكر
كان بلقى قاعد فوق ككر فى الدونكي لسع ما فطر
يسمع كليمة يا عشاي وأغلى الحكم عند الضجر
أنا قلبى كلو عليك جناى وقلب جناى على حجر
والله موش لو كان نهر لو كالنى بسيطان بقر
مادام عقيل الجن سدر ما اظنو من عندك حضر
بذاتو ابوى تلقاهو قام فاتح كتابو مع الفجر
يقرأ ويرتل فى كلام ما بفهمو الناس الكفر
زينوبة كر من حالى كر قاعد لى فوق نيران جمر
غربة وكمان حالاً فقر عذبنى قبل أصل القبر
الشوق متل شوك الكتر طعن الجسم لمن خدر
والله لو ما بنقبل ما كان بفارقك بى شبر
زينوبة دنيا الإغتراب خلتنى زي ورق الشدر
اتحت من عدم الشراب عم الأراضى وانتشر
الغربة اصلو طعيمها مر لكنى بقعد بالجبر
لمن سنين الهم تمر يا ربى الهمنى الصبر
يا خالة :
ما تقولى لى دخل البطون
والفى البطون ما بتمرق
يا خالة شيليها الظنون
والله مابينكن فرق
ما زى بعض لوبي الجروف
قوليها لو كان تنطق
خالتى المجنح ما بيطير
واللاحقه ايدك بتلحق
وين انتى شفتيلك بعير
معقول محكم وينطلق
يا خالة كيف اصبح غريب
وأنا روحى من روحك خلق
والله أقرب من قريب
والغنوة معوان للخلق
ما شفتى ناسا حالها كيف
قلب الجبل ليهن برق
كم ليلة ما غمدو الطريف
سدت دموعن فى الحلق
يتباكو ما شفتى النحيب
ساعتو البيبدا من القلب
آه وآشريري على الغريب
اليومى دمعو بينسكب تلقيهو يرفع الليدين
لافوق يلاهى وينضرب
يا الله يرجع لا متين قلباً معذب ومغترب
طعم الدروس يا يمه ليك
لى كل مهاجر ومغترب
ضاق الكؤوس المرة ديك
وآه من حناضلاً تنشرب
مش كل ما لاح صباح
يتماروا ناسك فى الدرب
الجاي وارد واب ملاح
يا بت ترب زولاً تلب
يبقى الغنا السلوى الملاذ
للقلبو فى الساساق غلب
لو صدق المطر الحراز
ما كان من الأشواق تعب
انتى اللسان الماب يقع
فى زلة لا يوم ينزلق
فيض الحنان المن نبع
لا قل لا يوم نتمحق
جاهو الجنوب سابق الشمال
جاهو المشحتف فى الشرق
جاهوالغرب شادى الرحال
شيل يا غمام منو وأسق
يا الله شدة ماك رحيم
أديتنى أُمين تنسبق
لى ضمى بالحضن القديم
الدافى شوق وعشق وعشق .[/frame]
[grade="00008b ff6347 008000 4b0082"]عجبني اسمك يا أجمل مراتع التنو
لون العنب الصافي داخل دنو
عيون المها سمح البنات عشقنو
أم ضفايرا تـيل بنوتنا ما شافنوا[/grade]
