يوميات سائق أمجاد ( 1 )

[عبدالغني خلف الله]

بسم الله الرحمن الرحيم
يوميات سائق أمجاد (1 )
عبدالغني خلف الله
أصبحنا وأصبح الملك لله ..شربت الشاي والقهوة وتوجهت في طريقي نحو السوق العربي باكراً علي غير العادة حتي أعوض خسارة فقداني للموبايل الذي سرقه مني زبون علي طريقة السينما ..جاء حاملاً حقيبة ثقيلة وطلب مني أن أنقله مشوار ..وبعد الإتفاق علي ( القواله ) ..فتحت الباب الخلفي لأدخل حقيبته تلك وعندما عدت له وجدته قد اختفي ومعه الموبايل خاصتنا والذي كنت أضعه علي ( الطبلون ) ..وما أحزنني أنه ضحك عليّ وحرمني من وسيلة التواصل مع زبائني ..وكلفني مشوار لتسليم الشنطه للشرطه وعندما فتحوها وجدناها مليانه حجاره ..الشاويش قال لي ربنا يعوضك .. بعد أن علم بالقصه ..عدت أدراجي للموقف وما أن توقفت حتي تقدم نحوي إثنان من الشباب ..مرحبا .. ممكن تودينا مشوار( الكلاكله ؟) ..ممكن طبعاً ..بكم المشوار ؟ ..مائة ألف جنيه ..كم ؟!! ..مائة ألف جنيه ..يازول إنت ماك براك ؟ ..يا شباب بين سيد البضاعه والمشتري ..يفتح الله ويستر الله .. ما قلنا حاجه لكن نحن ماشين الكلاكله وليس كلكول ..والله يا شباب أنا كلمتي واحده ..سيبك منو ده واحد جبان هكذا وصفني أحدهم لرفيقه ..ومن ثمّ إنصرفا ..تقدم نحوي بعد حوالي نصف ساعة انتظار شخص وزوجته فيما يبدو ..يا أسطي ممكن تودينا ( سوبا ؟ ) ..ممكن طبعاً.. بكم المشوار ؟ ..مائة ألف جنيه ..يازول إنت بتهظر ؟ ..لا بهظر ولا حاجه ..التفت نحو زوجته وهمس في وجهها ..سيبك منو ..ده واحد جبان ..فكرت في تناول شيء من الكافتيريا القريبة من الموقف في هذا البرد القارص ..فتقدم نحوي رجل في العقد السادس من العمر ..يحمل ربطة كبيرة من الكتب ..يا إبني ..يا إبني ..ممكن توديني معرض الكتاب في بري ..؟ ..ممكن طبعاً بس في الأول أفطر وأجيك ..والمشوار بكم ؟ ..خليهو علي النيه ..خلاص أنا ذاتي عاوز أفطر ..يلاك ..لكن ما تدخل الكتب في الأول ..يا أستاذ ما تخاف عليها ..عمرك شفت ليك زول سرق كتاب أو كسر مكتبه ؟ ..تعال ..تعال ..أؤكد ليك أنها لو قعدت سنه ما في زول يهبشها ..وفي الكافتيريا دردشنا أثناء تناول الساندوتشات ..سألته عن سبب ذهابه لمعرض الكتاب ..والله يا إبني طبعت الكتاب ده قبل خمسه سنين ما بعت منو غير خمسه نسخ بس ..كتابك ده بتحدث عن شنو يا عم ؟ ..الكتاب عنوانو ( هموم العصر الحديث ) ..وبتحدث عن الصراع بين الإنسان والحضاره في إطار المنظومة الجديدة للقيم المجتمعية السائدة بعد ظهور العولمه والحداثه ..طبعاً ما فهمت أي حاجه وقلت ليهو والله ده كلام كويس ..ربنا يوفقك ..وعندما عدنا للعربة وجدنا ربطة الكتب سليمة لم يلمسها أحد ..قلت ليهو ..جاك كلامي ..الكتب زي ما هي ..ما في زول شال منها حاجه ..هسع لو ربطة أحذيه كان اتسرقت ..غضب من كلامي هذا وقال لي في انفعال ظاهر ..كيف تتجرأ وتقارن الكتب بالأحذيه ..هذه إهانه للمعرفة ..طيبت خاطرو وحملته حتي المعرض ..منحني خمسة ألف جنيه وهو يعتذر ..شكرته ..وأمام بوابة المعرض ركب معي شخصان طلبا مني أن آخذهم مشوار لغاية الحتانه ..الشخص الأكبر سناً تبدو عليه سيماء الأهمية ..والشخص الثاني أصغر سناً ما أن تحركنا حتي ( شبكو ليك) سعادتك .. سعادتك ..بدون ذكر الإسم وهو يرد عيهو يا جنابو عمر ..الموضوع في منتهي البساطه ..ديوان الحسبه والمظالم وضع الأمور في نصابها الصحيح ..ما سمعت الأستاذ عباس النور المحامي قال شنو ..؟ ..أبداً ما سمعت قال شنو سعادتكك ..قال يا سيدي ..ناس الخدمه المدنية ستصدر قرارات بالنسبه ليهم بداية العام الجديد عباره عن معالجات لكل الضرر الذي لحق بهم ..أما ناس القوات النظامية فدول ..مسئولية وزارة الدفاع والداخليه لأنو موقفهم حساس شويه ووزاراتهم أدري بما يتوجب عمله ..المهم وصلتهم حتي الحتانة ..وسعادتك وجنابك نازله ( هبطرش ) ..وبعد حليفه استمرت لربع ساعه حسم الزول الكبير سعادتو الموضوع بعبارة .. يا نقيب خليك منضبط ومن ثمّ نقدني مبلغاً لا بأس به من المال عوضني خسارة مشوار صاحبنا بتاع الكتب .وحتي جديد اللقاء مع يوميات جديده أترككم في رعاية الله وحفظه .

[بعد الزمن]

[align=center]ههههههههههههههههههه
يوم شاق بس احداثوو رغم قساوتها
بس طريفة وتبين لينا ثقافة المجتمع السائده
كفارة ل موبايلك ركبك ماسورة كبيرة
ههههههه
بس منوو االدفع قرووش الفطور انت ولا عمنا سيد الكتب
تقول لي لو جزم بلقى مكانها بارد دليل ع مادية المجتمع

ما قلت لينا جنابو ولا سعاتووووو كسرك ب كم ..........؟؟
شكرا ليك
ع نافذة جميلة تصور لنا معاناة طبقة مهمة لها دورها الاجتماعي والاقتصادي فى المجتمع
تقبل مروري[/align][/size]

[الزهرة البيضاء]

موضوع جميل جدا وهزا من واقع الحياه ولكن سرقه الموبايل شكله خلت خشمك ملح ملح هههها ههها

[عبدالغني خلف الله]

أشكرك بعد الزمن ..طبعاً أنا دفعت حق الفطور ..انتظروني في مشاهداتي في أروقةالحياة اليومية للناس ..سعادتو نفحني بخمسين ألف ....هذا مع تحياتي .

[عبدالغني خلف الله]

أشكرك وعاطر الحتايا لك الزهرة البيضاء ولكل فرد بها المنتدي المتألق .

[The Sniper]

سرد جميل للمواقف

و فعلا هو الواقع السوداني



تقبل مروري

[عبدالغني خلف الله]

شكراً يا قناص وأرجوأن تصحبني في بقية المشاوير فقد حجزن لك المقغد الأمامي قريباً مني ..مع كل الود