هل السودانيين كسلانيين فعلاً؟

[ابو محمداحمد]

:يراها البعض دعايه ويراها اخرون اساءه سمعه ويرى فريق انها نتيجه لبطئ الحركه.
كذلك هنالك راي عدم سرعة رده الفعل لدى البعض.
ويصف جماعه ان هذا الوصف نسبه لعدم المبالاه والاكتراث.
رايك يهمنا من اجل الفائده
ومرحب بالمشاركه.

[ابن عوف]

يديك العافية

هى ف البدء دعاية طلعها فينا الاخوة المصرين بسبب الغيرة خاصة ف الخليج

وكل شخص بينظر لها من ناحية بعضهم يسمع ان السودان به اراضى صالحة للزراعة وما قادرين يزرعوها دى واحدة

والبعض الاخر ومن السودانيين طبق المثل دا يعنى هنا عندنا فى السعودية بقولك سودانى عندو ولده فى المدرسة باقى عليه الزمن شوية ويطلع الاب الله يديه العافية يقولو متسند على عامود النور ونايم حضرته ستغل الزمن فى شوية نومة بس ما عارف الكلام دا صحيح ولا غلط
اما عندك اللامبالة حدث ولا حرج
ربما نكون كسلاننين من نظرهم من عدة اسباب ومع ذلك انظر الى ادارة الاعمال والمناصب التى يستغلها السودانيين اذا اين الكسل هل بتتأخر من عملك بساعتين او نص يوم بتتغيب من العمل كثير اسئلة اسئلها نفسك وترى مين الكسلان
ما اظن اننا كسلانيين طالما اننا بنادى عملنا على احسن وجه وملتزمين بالمواعيد

اتمنى ان الا اكون اطلت

مع كل الود

[ابو محمداحمد]

الاخ الفاضل ود ابنعوف
يديك الف عافيه على وجهه النظر
اتفق معاك انو المنافسه بين الجنسيات جزء من السبب
بس نحنا حقيقه عندنا مشكله مع الدقه في المواعيد والزمن
الواحد لما يكلف بمهمه لازم يأديها بسرعه ولما تسأل واحد ليه ماعملت الشغله دي بيقول ليك الدنيا طايره
بكره او بعدين بعملا قد يكون هوشايف من جهته فقط لكن الشغله بترتب عليها شغلات تانيه وتأخير
اما بالنسبه للاحتجاج بالوظائف الاداريه والكفاءات شيء نسبي ذي الاخوان في البيت بختلفو عن بعض.
لك الود اخي على المرور والمشاركه.

[قمورة الامورة]

المعروووووف عنكم كسووووولييين.....

بس انااااا اقوووووووول غييير هذا الكلااام..
كل اللي تعاملت معاهم نشيييطين ويكملون شغلهم عدل

بس م اعرف الخليييجيين لييييش يقولوووو كذاا عنكم..

انتوووو شعب والنعم فيييكم
واتمنى ازور السودان ف اقرب وقت...

[GentleMan]

المعروووووف عنكم كسووووولييين.....

بس انااااا اقوووووووول غييير هذا الكلااام..
كل اللي تعاملت معاهم نشيييطين ويكملون شغلهم عدل

بس م اعرف الخليييجيين لييييش يقولوووو كذاا عنكم..

انتوووو شعب والنعم فيييكم
واتمنى ازور السودان ف اقرب وقت...

مرحب بالامورة في دارك وبلدك التاني السودان
وشكرا علي الكلام الجميل في حقنا
نفهم من كده انو الاخت عمانية وللا ايش ..الهرجة تحت الدرجة

[ابو محمداحمد]

الاخت قمورة الامورة لك الود والتحية على الكلمات الطيبة ودا من اصلك
ان شاء الله يكون السودانيين كلهم عند حسن ظنك
اسمحي لي بتوضيح بعض النقاط :
الطيبه والعفويه في التعامل وقله الاحتكاك بالنشاط والجنسيات الاخرى اسباب في هذا الانطباع بالاضافه الى شي هام وهو التخصصيه اغلب السودانيين ياتوا للخليج ليشغلوا وظائف ليس لهم خبره كافيه فيها بالتالي يكون ذلك خصما على سرعه الاداء بخلاف المؤهلين والمتخصصين
وبنرحب بك في بلدك الثاني السودان بحفاوة وكرم وشهامة اهله.
ودمتي.

[ابو محمداحمد]

الاخ النقناق مشكور على التعليق
والله يديك العافيه ياخوي
ومنتظرين رايك ومشاركاتك
وتقبل سلامي.

[مبارك حسن]

[نـــــــــــــــــــــــــــــــــــــــــــــــــــــــــــــــــــــــــــــــــهاركم سعيد
والله ظاهره الكسل موجوده فينا والواحد ما بعاين لقدام
همو الوضع الحالي وبس
ودي مشكله يجب حلها بالمناقشه مش اعدوها عيب

[احاسيس]

طرح رائع اخى ابو محمد
والله انا بشوف انو هو الموضوع ما كسل بالمعنى الواضح وانما هو عدم اهتمام وعدم اكتراث سواء بالزمن او بالشى المعني ومن شي على شى شاب عليه يعنى عندنا مثلا فى المناهج التربوية ما فى اهتمام بغرس التفكير الصحيح واستغلال الوقت فى كل ماهو مفيد والحث على العمل والاجتهاد والاصرار على النجاح كل الحاجات دى لمن نقوم بيها من صغار اكيد فى الكبر ما حنواجه الكسل والفشل لانه النشاط حيكون مزوع جوانا بالفطرة
تقبل مرورى اخى واسفة اذا اطلت عليكم

[ابو محمداحمد]

اخي مبارك لك الود مشكور على المرور
مسأله الطموح شي مهم ولازم تكون في وسائل جيده للوصول للهدف
كمان الواحد يكون فاهم انو تتعب عشان ترتاح مش العكس
الثقافه عموما شي مهم والواحد بكتسب من خبرات ونقاش الاخرين.

[ابو محمداحمد]

الفاضله احاسيس
كلامك في محله دي الحاجه البنبحث عنها فعلاً اذا الواحد من البدايه نشأ على احترام الزمن والانجاز السريع من خلال الطرق العلميه والمناهج التربويه بجانب التاثير الايجابي للبيت اكيد مفاهيم كتيره حاتتغير.
مشكوووه على الافاده والمرور الرائع

[عدولة]

اجل في بلدنا كسلانين تلقي صاحب الدكان في عز النهار كان قلت سلام عليكم يقولك اها داير شنو وزي النكتة البتقول سال المذيع شخص سودانى لما تصحي من النوم تعمل شنو قال برتاح شوية
اما في الغربة يضرب بهم المثل في النشاط ولو ربع البنشتغلو هنا بنشتغلو في بلدنا كان وصلنا القمر
اما لية الكسل داخل البلاد لا ادرى يمكن للعايد البسيط ويمكن ويمكن.................................

[GentleMan]

الاخ النقناق مشكور على التعليق
والله يديك العافيه ياخوي
ومنتظرين رايك ومشاركاتك
وتقبل سلامي.

الاخ ابومحمد سلامات
الف مرحب بيك في دارك منتديات انا سوداني
وانشاء الله موعودين بجديدك الرائع
الدار دارك خش لقدام
واكرر شكري الجزيل لك ودمت بخير عزيزي

[sami abass]

السلام عليكم
شكرا علي طرح هذا الموضوع المحيرفعلا
هل نحن كسالا ام فنوعين
انا شخصيا عندما اسال اقول اننا قنوعين
مش ذي بعض الاجناس شغالين حتي في الاعياد والاجازات
السوداني في الغربة تجده حتي لو كان يعمل لي حسابه الخاص يحترم مواعيد اغلاق محله لللحاق بالشلة وقضاء الوقت في الونسة والتسلية
ويديكم العافية

[ابو محمداحمد]

الاخ عدوله الله يديك الف عافيه نحنا فعلاً متأثرين بالجو العام والموضوع يحتاج معالجه من البدايه
الطفل تديهو مرسال وتشجعو يرجع سريع واي حاجه يعملا تنبه للزمن تلقائياً الحاجه دي تتربا فيهو
الاخ النقناق شكراً للترحيب ان شاء الله نفيد ونستفيد.
اخوي سامي انت وضعت الكيه في الجرح(قنوعيين) فعلاً نحنا كدا وطموحنا بسيط وغير منظميين وعامل الزمن عدنا ماليهو قيمه خالص وبنعمل دايما في الزمن الضائع لاحظ في الاعياد ناس البيت يوم الوقفه صاحيين حتى صباح العيد تجهيز ونظام في البييت لشغلات ممكن تخلص من مده
دي وجهة نظر ممكن نتفق ونختلف عليها المهم نعرف نحنا شنو؟

[عسوولة الرياض]

[align=center]

والله انا بكل صدق وامانة لم اسمع عن السوانيين مثل
هذا المثل ؟؟؟
ابدا واعرف كثير من السودنيين شغالين عند اقاربي ولااسمع عنهم
الكسل ابدا وابوي يحب شغلهم اكثر من غيرهم ؟؟؟
لسرعة واخلاصهم في العمل وحسن عشرتهم مع الناس


وكان على الكسل فهو في كل مكان موجود سوداني وغيرة ؟؟؟

تحياتي

[/align]

[ابو محمداحمد]

تسلمي عسوووله الرياض
ربي مايخيب ظنكم فينا
نحن هنا لتصحيح المفهوم المغلوط وتشجيع المتميزين
كلامك وسام نعتز فيه
حقيقه سعدت بمشاركاتك
لك كل الود

[هجره]

السلام عليكم ورحمة الله وبركاته

يشعر الشخص احيانا بالكسل إذا تجتاحها رغبة بعدم القيام
بأي شيء ويشرح الطب الكسل بأنه حالة من الخمول
وعدم الرغبة في حركة وقد ينشأ نتيجة الضعوط النفسية
والعصبية مع تراكم المسؤليات وتنوع الاهتمامات وقد
أشادت الأبحاث الميدانية إلى ازدياد احتمالات إصابة النساءبداء
الكسل أكثر من الرجال.

النصائح المفيدة لمن أصيبت بالكسل:
1-وضع خطة اسبوعية أو يومية لإنجاز الأمور الاساسية.

2-عدم أستقبال انهار الجديد باعتباره كابوس ثقيل
وليكن شعارك هو الأمل والتفاؤل.

3- التاكد ولاصرار على تحقيق المزيد من النجاح في
الاعمال والمعاملات.

4- معرفة أن الكسل يودي لعواقب وخيمة كضيقة الصدر
والقلق والاكتئاب و العمل والانتاج يزيد النشاط والحيوية.

5-الاستعاذة من الكسل) اللهم إني أعوذ بك من العجز والكسل والجبن والبخل والهرم والدين وغلبة الرجال )
وأعوذ بك من عذاب القبر ومن فتنة المحيا والممات.

[ابو محمداحمد]

الاخت دكتوره هاجر (بفتح الجيم) الله يديك الف عافيه على الروشته
بس رقم 2 ماواضحه ياريت توضحيها.
مشكوره على المعلومات القيمه لك التحيه.