هـل فسـدت أخلاقنــا؟؟؟

[عاشقة الرومانسية]

كتير من المفاهيم أتغيرت في الزمن ده ،
واصبح الكذب (شفتنه) واللعب بمشاعرالناس(حنك) ،
واعراض الناس ونسة (جبنة) في البيوت،
اللبس على الطريقة الغربية (إستايل) ،
وتناول المخدرات (البنقو) عنوان للرجولة ،
الصاحب والصديق الوفي (فارة) ،
والبياكل أموال الناس بالباطل (مرطب) ،
السرقة (شرف) ، (والحرامي) يمشي بين الناس وكانه عمر بن الخطاب كرم الله وجهه وفي المناسبات يقول ليك فلان جاء الغربية أنو فلان ده حرامي وبسرق أموال الناس ،
وتتكلم في الحكومة يقول ليك ديل حرامية (لكن لو جو غيرهم بسرقوا أكتر منهم ) الشكية لي الله لا قيم ولا أخلاق ودين يحاكهم ،
إذا سرق المسكين الما لاقي لقمة العيش يحاكم وفق القانون ،
أما إذا سرق أهل الطاعة والولاء يقولوا ليك (الزول ده مش معانا .. دي غلطة بسيطة .. لي قدام بتصلح) ،
إذا داير تتوظف في الحكومة إذا ما عندك واو ما بتتوظف (واو = واسطة).
أجيال كتير أتربت على الكلام ده 20 سنة كافية أنها تدمر شعوب وأخلاقها ،
والأجيال دي حتشيب على المفاهيم دي ، فهل نقول على الدنيا السلام أم نغيير ما بي أنفسنا ومن حولنا ،

يا شباب ::
السوداني يعرف بأخلاقه (زمان) ، الكلام ده ممكن تشوفوا بره السودان ،
أم الآن بقا مافي فرق بين السوداني والمصري ووووو... الخ .

فقدنا مايميزنا كشعب أصيل وفقدنا الإحترام بيننا قبل الآخرين ..

الكلام ليس على مجال التعميم فما زالت الفرصة موجودة
والعشم أكبر في أن نغيير ونعيد للشخصية السودانية هيبتها ..
نعيب زماننا والعيب فينا
وما لزماننا عيب سوانا
والسلام ........