هل اولاد المغتربين حناكيش؟؟؟؟؟ ادونا رأيكم...!!

[النورس المهاجر]

اشكرك كتير أستاذ صلاح على هذا الطرح حتى تتصحح مفاهيم الناس ( المتهم والحنكوش)
الحنكشة طباع وتربية وعادة وإدعاء :
طباع // من تربى على مستوى معيشي معين داخل أو خارج البلاد يرى ما دونه بنظرة دون ويبدأ في التعامل والتعبير لعكس ما يعيشه لذا يسمى التصرف أو صاحبه ( حنكشه أو حنكوش)
تربيه // ما يعرف بالدلع ( للأسف تجد من يسمى نفسه بالمسى) وأعتذر ؛ مستوى معيشي ذيادة بل فيه تعالي على الغير __ ما انتم فيه من نعمة يجب شكرها بالتواضع ومراحمة المساكين بعدم الدلع امامهم أقل شيء .
إدعاء// يفرح من وصم بالمدلع لذا تجد الكثيريين من يتمنى أن يكون من هؤلاء لذا يعمل على اكتسبها حتى ولو هو لا يشبههم لا مال ولا خلقه ولا أخلاق _ تظاهر ومظهرية .
*اما العادة // الوسط الذي عاش فيه أو الدولة أو الحي ( ما ممكن يكون في حنكوش من الحي ... ) ــ واكثر ما يوصف بهذه الصفة أو يتمنوا أن يوصفوا بها أولاد المغتربين ... ليه ؟؟ لان هناك غييييييير!!!
بس في سؤال ؟؟ هل الحال في الغربة يدوم أو بالاصح هل لا عودة للوطن الخرب الترب ؟؟؟ لالوب بلدنا ولا تمر الناس !! من تواضع لله رفعه وزاده .
مهما كان حال أهلنا الطيييبين غير حال أهل الخارج برضو أحسن وافضل وممكن نصل لما وصلوا إليه ( انظروا لحال السودان 1955 وحاله 2010) اكيد غير.
اوصي الجميع // لا داعي للحنكشه والترفع على الناس !!! ممكن الانسان يعيش حياة راقية داخل أو خارج البلاد بس بدون تجريح للاخريين وبدون تعالي واعرف من زالت عنه النعمه واصبحت عليه نغمه وجاءته الطامة بمرض أو كشف عرض بسسب الحنكشه .

[ودالبوني]

بسم الله الرحمن الرحيم
اولاد المغتربين حناكيش والسبب كله من الاب والام هم اللعلموهم عويج الخشم ونطق الكلمات اللينة والمشكلة الاكبر في ناس مشلهتين ومبشتنيين عاملين فيها حناكيش معدنها مسيح شعر سااااكت قلنا اولاد المغتربين بحقهم لكن ديل

[طبزة]

مدأخل .............


في المجتمعات الطبقه دون الاخيرة

ابتكرة تلك الطبقه علم الحنكشه وبدات في تعليم بعض من مئن يخول عليهم انطباع الحنكشة

من عوامل الحنكشة الاساسية ...

1: يظهر الخوف بعدد طروق

1: يكثر من رمش العيون
2: يرتجف بشده
3: يحتمي باقرب شخص يكون من حولة


2: لغت الكلام

1: يجب على الحنكوش التحدث بحرف (ث)
2: يجب على الحنكوش مد وجر الكلمات
3: واهم ما في زلك لغت الاشارة (الوصف بالايادي )

3: انوع الطعام

1 : الحنكوش لا ياكل من المطاعم المكشوفه علي الطرق

2: لا يشرب من ماء السبيل

3: ليس لهو حسنه في اطعام الاطفال المشردين


.....................اجابيات الحنكوش ...................

يبتعد الحنكوش من اي اسباب تفتح باب للمشاجره إلا مع نفس الفصيلة ...

لا يرفع يدهى ليطرب ولكن يتشاجر بمشاعره المرهفه يبوح بغضبه المبود في الدواخل

الحنكوش لا يوجه الغضب كثراً في حياة ...

افكار الفلسفه عند الحنكوش :...

كما اعتادت العائلات المتحنكشة في فلسفة الحناكيش ...

بان كل لحظة غضب او زعل توادي إلي خطوة نحو الشيخوخه :..

[mazza mohammed]

thanks for thewounderfull subject

[ابوالتوم]

thanks for thewounderfull subject

السلام عليكم جيناكم رحبوا بينا لودايرين لومادايرين على كيفكم ،الموضوع المطروح مش متعلق باولاد المغتربين وبس لا ،ده بقى سلوك ليه وجود بأغلب الجامعات نتاج طبيعى لثقافة الفضائيات المبنية على الحريات،يعنى سلوك كان مستهجن فى يوم من الايام أما الان كل زول مشغول بنفسواحناكيش ماحناكيش ذولا شغال بيهم مافى ،السؤال ليه إنتوا مصرين للإغتراب ده، الاسباب مازالت؟؟؟ تجوا تعيشوا معانا فى الحلوة والمرة،والله نحن مشتاقين ليكم حناكيش غيروا تعالوا،نبنى حياة نابعة من مثلنا وقيمنا ولارأيك شنوا يابتاع المانيا ،حقيقة ناقصنا أمور يمكن تتموا لينا........

[الدغري]

والله الحناكيش في السودان أكثر من الحناكيش في أولا د المغتربين ........... بيكون هناك بعضهم تأثر بالمحيط الذي حوله ........... ولا يعرف شيئ عن عادات السودان وأهله ........... وهذا راجع لأسرته

[سرالحب]

بصراحة انا رحت السودان واتهموني كثيربالحنكشة بس والله انا طبعي كذا حساسة دلوعة وبصراحة طبعهم يفرض عليهم رايهم هذا لانهم اسلوبهم غير حتى كلامهم غير مثلا انا ما متعودا اشوف حشرات واخااااااااااف منها اذكر لمن شفت وزغ قمت ازعق وخفت والله بنات خالي مسكوهه لي لحد ماجيت السعودية وكل موقف قالوا دي حنكوشة في النهاية هو مصطلح مابستظرفه ابدا في ناس يتصنعه الحنكشة او بمعنه اصح الدلع الزايد والله هوماحاجة سمحه عشان اتصنعه وبعدين المغترب عيشته واكله واسلوبة غييييييييير من الي عايشين في السودان هذا كل الي في الموضوع وشكرا على الطرح الجميل

[مجنونه بس تجنن]

والله كتير من الناس بتهمو المغتربين بل حنكشه لكن ما المغتربين بس حنكوشين فى طلاب وطلبات الجامعه وغيرهم من النلس وسببه الوسط الى عايشين فيه وحسب معاملة الام والاب لو كترو فى تدليعم يتحملو كلام النلس على عيالم وشكرا على الموضوع الجميل

[قلبي العنيد]

حنكوش دي الصراحه ما لاقي ليها تعريف انا زاتي و وقت تعرفو ادوني خبر

بس النصيحه انو اولاد المغتربين حناكيش ليه
اخو فاضل قبلي قال انهم ما بطلعو من البيت الا من خميس لي خميس دا اساس اذا طلعو تاني حاجه القدوه عندهم فالبيت الام الاب الاخ او الاخت الكبار كل واحد عاوج لسانو وهاك يا نضمي قدام الولد (قال ليهو انا مصاحب علي عليوه و اشرف كخه حا اطلع ايه يعني طيار) اظن البين القوسين واضح
غير كدا ما عندهم انتماء لي وطنهم اذا كانو بسافرو فالسنه او فالسنتين او ال3 سنوات مره وكلها كم شهر والبقول انو ولدو او بتو عايزين امشو السودان حبا ليهو اسمح لي اقول ليهو انت بتغش في روحك زي المسجون وقت يفرجو عنو بسوي اي شي وتعال قول ليهو حا ارجعك السجن مره تاني

وبحاول ارجع

[عم عبدالرحيم]

لنغير السوال اولاد الناس المامغتربين مافى منهم حناكيش اكيد فى لازم الورد تكون فيو شوكه و اولاد المغتربين ماكلهم حناكيش لكن فى منهم حناكيش

[المـاني]

بصراحة أنا كنت حنكوش بس قبل 13 سنة
يحليلا الحنكشة هسي عايمين في المونة ونشتر بالطوب
ونصيحتي للحناكيش الدنيا يوم ليك ويومين عليك

[geno]

سلام عليكم
لاااااااااااااااااااااااااااااااااااااااااااااي
حناكيش كلهم حتي المامغتربين فيهم الحنكشه

[اجمل احساس]

السلام عليكم ,,صراحه موضوعكم شيق صراحه م حناكيش بس ظروف السودان تجبرهم على كدا لان في حاجات في السودان عمرهم م شافوها دي تجبرهم على الدلع وصراحه في ناس من مواليد السودان مدلعين اكثر من المغتربين
م عارفه الفكره دي ح يشلوها من راسهم متى الله يعينا بس هههههه

[الزهرة البيضاء]

السلام عليكم انشا اللة طيبين احب ان اضيف للموضوع بتاع اولاد المغتربين واللة هم ما حناكيش بس بتحنكشو لان الاصل فى الحنكشة الحياة المترفةوما شايفة لي مغترب عايش لية حياة مترفة كلهم مقرطنها يعنى قراصة بى ملاح ويكة وفتة عدس وعفش من الحراج

[مرسال الشوق]

حناكيش وقاعدين كنب .....

من وجهة نظري ان اولاد المغتربين هم اكثر فئة من البشر ضايعين ليه ...
لان الحياة التي عاشوها كلها حياة مغلقة وفي اطار محصور تلفزيون وفضاءات وبلي استيشن وحاجات تانية كتيرة وليس لديهم اي خلفية في الحياة الخارجية ولايدرون كيف اصلا الحياة ماشة ... حتي ان بعضهم اي الاولاد بالخصوص اصبحوا كالبنات ولاتجد عندهم الشجاعة الادبية الكافية لمواجهة اي انسان ... وهذا الكلام عن تجربة رائيتها شخصيا في كثير من الاسر الموجودة هنا في المملكة ... يعني بالواضح كدا تلقي الولد عمرو تجاوز العشرين وماقادر انت تفهم منو اي حاجة جالس كنب سااااكت وتتحسر كثيرا علي هذا الحال في حين انو اولادنا بالسودان تلقي الواحد عمرو مايتعدي الرابعة بالله يمنطق الحجر ويديك كلام انت زااااتك تشك في نفسك انك قاعد مع شخص صغير ... وقد قمت بزيارة لاحدي العوائل بالمملكة فجلست مع احد ابنائيها قليلا اتجازب اطراف الحديث لقيت نفسي بتكلم برااااي وولدنا القاعد جنبي لاحياة لمن تنادي ... طرحت عليه سؤال بسيط انت ماشي السودان بتين قال لي انا مامشي السودان .. ليه ... قال لي السودان مافيهو اكل ولا بيبسي تخيلوا معاي هذا الرد المنطقي .. والله انا بعد ردو دا رفضت اتكلم معاه ثانية ... دا همو كلو في بطنو افتكر ماحينفع السودان بي حاجة وهذا كلو من البيئه التي نشأ فيها ..
عشان كدا اولاد المغتربين انا شخصيا بحن علي حالهم كثير وياريت كل اسرة تلحق حال ا ولادها وترجع بهم الي وطننا الحبيب حتي يكونو لهم شخصيات لها وزن وثقل في المجتمع

.

[مان المان]

الكلام مضحك جدا.....
في البداية لازم نسأل نفسنا سؤال اي مغتربين ؟؟؟ واي حناكيش؟؟؟
انا اعرف الكثير من المغتربيين لايملكون مايسد الرمق ولاقطعة ارض صغيرة في ارض المليون ميل مربع....
دعكم من الحنكشة جانبا....
هل تعلمون ان الكثير من المغتربين لايجدون ثمن تذكرة العودة لاسرهم للزيارة المؤقتة اوالنهائية....
هذا ترف حديث....
الفاتحة...

[ابواروى]

الاستاذ الفاضل والاخوة المشاركين
لكم التحية والتقدير وانتم تخوضون وتبحرُ في دياجر ومرافى المواضيع لتُنيرو عقولنا وتفضحو عيوب لا تنتمي لثقافتنا السودانية الرائعةوالتي نفتخر بها جميعا والدليل اسم منتدانا الرائع هذا والذي اتمني ان تحتضنوني بينكم ولكم الود..
لقد بحثت وتقصيت عن معني كلمة حنكوش وحناكيش لم اجد لها معني في اللغة فهي كلمة دخيلة مثل ما وصفت به .
انا اولادي كلهم مولوديين بالسعودية ولا احب ان يكونو من زمرة الحناكيش ,وعشان كدة كل سنتين اعمل المستحيل عشان يسافروا السودان ويكونو قريبين من ثقافتهم...وهم الان والحمدلله معتزون بانهم سودانين.

[الوحداني]

السلام عليكم ورحمة الله

بصراحة كدا ومن وجهة نظر واحد مغترب جا السودان::
دي حاجة ما بتقدر تعممها على كل اولاد المغتربين لانو في بعضهم حناكيش بالجد
لكن في ناس تانيين وديل الاغلبية <حسب ما انا شايف> ما ليهم في الحنكشة

وبعدين زي ما قالوا في بعض التعليقات الفوق ^ : انو الحنكشة في الجامعة ما حاجة للمغتربين بس
بالعكس يمكن الحناكيش الشهادة سودانية اكتر منهم ش ع (<<زي ما بيقولو لينا-_-)

بس في النهاية انت كعضو جديد في المجتمع السوداني بتتعب كتير عشان تقنع الناس يشيلو الفكرة دي عنك
أو أحسن من كدا .... ما تشتغل بيهم وهم براهم بيشيلوها

[Mr.MiSterious]

السلام عليكم انشا اللة طيبين احب ان اضيف للموضوع بتاع اولاد المغتربين واللة هم ما حناكيش بس بتحنكشو لان الاصل فى الحنكشة الحياة المترفةوما شايفة لي مغترب عايش لية حياة مترفة كلهم مقرطنها يعنى قراصة بى ملاح ويكة وفتة عدس وعفش من الحراج

أحلى رد قريتو اليلة هههههههه عفش من الحراج بي إستكر إيكيا
طالباني ضحكة زي الضحكتها دي

[الدهمشي]

اولا كيفك ياابو صلاح :::
بدون مانقعد نفسر الكلمة ومدلولاتها وماهية. المعنى بالنسبة واضح وبصراااحة انا بقول ايوه يختلف الولد العايش فى السودان من العايش خارج السودان المسألة ملاحظة فى تصرفاتهم مانقش نفسنا ساكت ولكم العتبى