أسامح وأنا المجروح

[احمرعين]

أسامح وانا المجروح
أضاري العبرة بالبسمة
أمازح في الأسي الجوّايْ

أقول للآهة يا نسمة
يصابح جرحي أحلي مُنايْ
أنسي أساي..
ألوّن قيف الحزن رسمة

لو كنت زي الغير
وما كنت العزيز وأسمي
لوما قلبي عندك أسير
وريدك فيني صار بصمة
ماكان وراك أفنيت
غالي العمر حسْرات
وماكان وراك أمضيت
في منفي الألم سنوات

تباجح بي إنّك حنين بكّايْ
وعمر الدمعة مالاقت
في عينيك أبدْ ترحاب
متين طرفك زرف دمعة
ومتين قلبك
كفّر عن غروره وتاب !؟
متين ضوّيت للأمل شمعة
طريت نحن في زمان أحباب !؟

بكتب ليك
وماباقي غير ساعات
في عمري الخلاص ولّي
كمّلتو وراك آهات
وحاتك ما بدّلتَ ريدك يوم
ولا زالف قلبي من مدارك فات

خائف يباغتك ليل
عليك تتواصي نجماتو
وتلقي من ضميرك ويل
لما تطول حساباتو
خائف عليك ترجع
وما تلقي غير تذكار
كاتبو قليب بي أنّاتو

وبرضي أسامح وانا المجروح
أضاري العبرة بي البسمة
أمازح في الأسي الجوّايْ
أقول للآهة يا نسمة

[أم عسجد]

ملييييييييييييييييييييييييييش :D
اغلطو انتو يااحباب نجيكم نحنا بالاعزار
وضرب الحبيب زى اكل الزبيب :D

[مدثر موسى]

اسامح كيف وانا المجروح
وجرح الريدة ما ببرى
ولما ادور ارضى عليك
تموت الكلمة بالعبرة
وكل ما تبدى لى آمال
تموت من تانى بالمرة
وارجع تانى للآهات
اساهر الليل مع القمرة

[نهر المحبه]

ياسلام
بالجد قصيده رائعه
وده حال المحبين
مهما كان مجروح
في لحظه بيسامح
وبينسى كل الجروح
وببسمه كل الالم بيروح

[احمرعين]

ملييييييييييييييييييييييييييش :d
اغلطو انتو يااحباب نجيكم نحنا بالاعزار
وضرب الحبيب زى اكل الزبيب :d

أهلا ً بيك مون ومشكور علي المرور...تسلم

[احمرعين]

اسامح كيف وانا المجروح
وجرح الريدة ما ببرى
ولما ادور ارضى عليك
تموت الكلمة بالعبرة
وكل ما تبدى لى آمال
تموت من تانى بالمرة
وارجع تانى للآهات
اساهر الليل مع القمرة

أهلا مدثر ومرورك مقدّر..شكرا ليك

[احمرعين]

ياسلام
بالجد قصيده رائعه
وده حال المحبين
مهما كان مجروح
في لحظه بيسامح
وبينسى كل الجروح
وببسمه كل الالم بيروح

يامراحب نهر المحبة

اسعدني حضورك الراقي وتسلم دائما

كل الشكر واجمل المني