لمـــا يتفتح قِليبك
للهوى يخضر ويزهر
يبقى موسم
وتمـــلا جــيبك فى
الدرت والبيت تعمر
يبقى موسم
ولو تصلى الصبح حاضر
وفى نوافل الليل تكتر
يبقى موسم
ولو تبلغ عن رسولـــك
آيــة تُنْـِذر أو تبشـــــر
يبقى موسم
ولو تُجيب دعوة مُنادى
وتبــقى أول مــن يـُـَبدِرْ
يبقى موسم
ولسه نحكى شوية تانى
عن مواسمنا العجيبة
مرة تتباعد خُطاها
ومرة تتقارب قريبة
ولو يزورك زول ما عادى
اصلو ما اتعود زيارتك
من بعيد جاييك خبرو
أو هو ود بلدك وحارتك
أدهشك معسول كلامو
وختَ نفسو رهن اشارتك
افتضح نقدك عيونو
واصلو ما تجرأ يغالطك
خلى بالك من عيالك
ومن رجالك ومن امارتك
صرت موسم ...ليهو موسم
جاى طمعان فى سفارتك
جاى طمعان فى أمارتك
ونعجة حمرية وأصيلة
للمراعي كتير نجود
ونُكسب الراعي الوسيلة
والطرق نرصف نعبد
تسعد الدار والعِويلة
وكل فريق فرحان يزغرد
والدخن آفاتو نطرد
خوفنا من جوعاً يُضَوِِر
الفقر والخوف يهدد
وبالعطش الصيف يكدر
والمدارس حالْ يسهِد
يفشِــى أُمــية ويعكِــــر
ولسه حبوبة ابتولِد
من حِبيلا منو البحرر
داية من طرف المدينة
بموسا مرحب لو تقرر
يا صدى الكلمة الأمينة
الرسايل ذيعا مرر
وصف الناس الحزينة
للملأ أعلن وشهِر
فى البلد حالتنا شينة
ولسه راجين الببشر
وصحة مننا ليها طُولة
لو تجى أمبِسرع تبدر
حتى شفخانات خجولة
ما لقت دكتور يعسكر
والقِريطيس ونار أُم فولة
أو مِحيجِم دمو يدشُر
أو قرض وادى (أُم تُقُولة )
للملاريا سريع يأشر
يالهشابك ضاع اوانطة
والجراد فى دخنك يتلف
فات زمان المُستى ولى
وفى الجُرُن مدقاقة تنتف
لِمُو قشك بيتك أبنى
سِدو قوم للغربة شرِف
أو لاى مدينة سافر
بالشوارع حوم ولفلف
موية بيع أو اى حاجة
ومافى عايد حاجة تقرِف
وكشة ما تسيبك فى حالك
والزمن آمالك يجرِف
وأرضك البور صيدا يعوى
والطيور زاهيات ترفرفْ
وكم ممول اسمو بيكَ
ماشى لى غيرك يسلفْ
ويعتذر ليك يشكى حالو
انو اتعسر وبنزفْ
ومن مهامو يشدَ أزرك
ليك ينمى وحالك يسعِفْ
يا مُزارع إنتَ قيمتك
فى بلادك حقو تعرفْ
والبتاجر بيك ويربح
يملا فى خزنو ويستفْ
ويلتقيك بى كلمة جافة
تفنى آمالك تعجرفْ
ما تسيب الحال فى حالو
أكشفوا وبنشاطو عرِفْ
وما تفوِض زول باسمك
الا زولاً ليكَ ينصفْ
عالى كعبك فى الثقافة
وبرضو يوم الحوبة فارس
انتخب سجل ورشح
حقك الدستورى مارس
هم مواطنك شيلو هِمة
وسوى للتأمين مدارس
شرطى حقيت الخلافة
والقوانين ليها دارس
البلد دولابا يعمل
والسلام راعيهو حارس
ايوه بكتب يا عزيزة
مرة للوالده البعيدة
وللصِحاب مرات برسل
كل يوم اشواق جديدة
وكل معارفى بخصهم
بالخطابات العديدة
وبرضى بكتب يا عزيزة
لكل طيبة سبانى ريدة
ولو بعيش ايام جديدة
لسه حا كتب للبريدة
ولو صارت الكلمات عنيدة
مامهم تطلع قصيدة
اى حاجة تكون شهيدة
انى ساهرت وكتبت
وفى هوى المريودة ذبت
وذكرى للتاريخ عملت
وعلى جدار الليل نقشت
أسمها واسمى ورسمت
هل بتكتب ؟
أيوه بكتب وانتى برضك
لوفى يوم جاتك رسالة
طويلة من انسان بحبك
شمعة ساهر يحكى ليكى
كيف حياتو ملاها شخصك
الامل عاد بيكى اخضر
والعمر ازدان وازهر
وكل شى فى حياتو نور
مش حتكتبى ياعزيزة
لا .......... بربك
الحبيب مستنى ردك
ايوه اكتبى انتى برضك
لى قريب او زول بحبك
فى البعاد اضناه حبك
راجى تصلو رسالة منك
فيها اى صغيرة عنك
ارتعاشاتك وظنك
اكتبى واعزفى لحنك
أملى كاسو وبرضو دنك
وغنى يا محبوبتو اصدحى
......... ورى فنك
مش حبيبك مش بريدك
اكتبى واختصرى اسمك
بكرة توصلو الرسالة
وفيها كم يتجلى رسمك
شبعت بلاد فاطنة الحبيبة
ايه تسوى مع ام عويدات
الطويرة يناس عجيبة
شايلة فى عويدها الجنيات
جاية واعدادها الرهيبة
مسخت درت البنيات
كل قندول عيش تجيبا
فى الارض سرعة وحبيبات
شفت فى قعر القِصَيبة
لمة من زُغُب الطِويرات
وشن تسوى يافاطنة انتى
غير ما تخشعى بالضراعات
وتسوقى حبوبتك وامك
اسرتك كل الوليدات
والدلاليك والصفايح
كركبوها وعلو صيحات
يمكن الآفات تغادر
والدخن يعملو شعقات
يمكن الطير المهاجر
يشبع ويسافر ذرافات
بعدما نكد درتكم
وهاجم البلدات جماعات
وعمت الاحزان قرانا
وشتت فاطنة الدميعات
لازم يتجدد أسانا ؟!
الله يخزيك يا ام عويدات
يا قلبى الحزين يا
قلب الحسرة والآهات
شُوف الغربة كيف
اللحظة زى سنوات
ومن عينيا سايلة
دموعى يوت كابات
وصابات فى ارض
ما بتفهم الدمعات
صبر ايوب بسيط
انا صبرى زاد حبات
طعم الغربة مر
دا طعامى فى الوجبات
سموم الغربة حار
واناشوقى للنسمات
عيون الغربة باكية
فى بلدى العيون ضاحكات
كمان فى الغربة
مافى العمة والجدات
ياما شوقى طال
للنمة فى الحفلات
لما الليل يفوت
وتكمل اللعبات
يقوموا شباب وشيب
يتبارو فى النمات
حلقة فن اصيل
مليانة ابداعات
تُراث بلدى الاصيلة
اصيل فى كل زمان
وطيف بلدى الحبيبة
معاى فى كل مكان
وحبها بين ضلوعى
مولع النيران
ونبراسى البضوى
دريبى والربان
وفرحى النادر المخلوط
مع الاشجان
حب بلدى الكبير
نيرانوا وجواجات
وفى بعادى الاليم
جوايا انذارات
ياقدرى المرير
حب الوطن لمبات
تضوى ظلام غريب
تدى الامل دفعات
أم قطم محلاها جاربى
لكن الاجمل قنيصا
لاها فى النُبال بتمسك
لا بتموت ابدا رخيصة
للكلاب دايما تفتر
ونادراً ما تردى مِيسا
وديمة للقناص تودر
والدريب ممتع قصيصا
ولما تنتق صوت عياطنا
ونحنا فى البورة العويصة
التقول فى مُصيبة جاتنا
ونحنا واردين هردبيسا
لاصبيرة تموت فى هُرب
ولا زبادة الريح فطيسة
انتى لو فاز بيكِ احدب
شهّد الناس فى رقيصا
يا الوراك زعلت خالى
وام عيالى كمان نفيسة
خالى قال طالبنى سرحة
شاف بقيراتو الحبيسة
ام عيالى تقول ضبحت
حلوبةفى شان بس قنيصة
شعب ملهم شعب واعى
وفى الحضارات صِيُتو ذايع
كل خير الدنيا عندو
وعلم الناس الروايع
والضعيف دايما بسندو
شعب مالك امرو رايع
يدهشك حسن التعامل
وفى الكرم ما صدَّ جايع
التطور فيهو ساعى
والتراحم عندو شايع
وليهو راعى حكيم وواعى
فى رعيتو لربو طايع
سد منيع ضد التآمر
وللفجور سدًّ الذرائع
وما قبل قيصر شريعة
الله سطر لو الشرايع
النسيم في الشوق يزيدنا كـل مـا ادانـا طـلَّ
في لهيب أشواق بعاني قلبي آه يا روحـي مـلَّ
الجسيم بالطيب يجينا فوقوا لابسة حرير وحلـه
أصلوا كان البينا حاصل مـن غيابـك ليـس إلا
لي ديارنا الليلة جيتي وبيكي ينسى الدار مذلـة
ويوم وداعك تانى برجع يشهد الأحزان مـن الله
[color=
ـــــــــــــــــــــــــــــــــــــــــــــــــــــــــ
الضراع
الله يخضر ضراعك ويديك السعد الزين
قول آآمين
كلما هبت هبيب الحنين قلبى استغل
كتر الشوق نبضو زادو مية لو بحسب اقل
كل مغيرب دمعى نازل جايى من سوق ولا حِلة
كل حروف الحب رويتا ومافى حرفا شوقى بلّ
ليه غيابك لسه سارى قومى راجيك عودى يلا
وسُبُلْ التزاوج سهِلا
وطُرق التراحم مهلا
وطنك معافى من البلا
،،،،،،،،،،،،،،،،،،،،،،،
للنهضة طاقتك وفرا
وسفاسف القول اجهلا
الأُمة راجياك تحملا
فوق للثريا توصلا
تاهت وانتَ البوصلة
موصولة بيك رحم وصِلة
ارعاها اكفى المسألة
عايش هموما واسألا
وجاوبها كل الاسئلة
،،،،،،،،،،،،،،،،،،،،،،،،،،
أجلس تلاميذ الفصول
وخريج يحول
على حالو حول
آمالو بلفاها الذبول
وظِف ربيبات الحجول
العِفة بالحوجة بتزول!!
والعصمة ما فاتت رسول !!
،،،،،،،،،،،،،،،،،،،،،،
جهز مُعينات الفصول
خلى الخريف وكتين يدور
نرجاهو بى فرحة وسرور
شِدنا المجارى بنينا خور
و شبكة مياهنا الفيها قول
غيرها من جيد العصور
،،،،،،،،،،،،،،،،،،،،،،،،
نوِّرنا .. نورت العُقول
حسِن مُعينات الدخول
مَكنْ المصانع يوم يدور
خيراتنا ما بتستثنى زول
سودانا فيهو الخير مهول
النيل بفيض بسقى الحقول
ومطرنا ساقينا وهطول
،،،،،،،،،،،،،،،،،،،،،،،،،،
شيل الزراعة معاكَ همْ
واديها من فكرك سهم
شجرة هشابك قدرا
التمرة حسن صدرا
والترعة ارجع احفرا
ابنى المشاريع خضرا
وحواشة القطن ازهرا
و جهِز بنوكك حضرا
خلى السياسات حاضرة
ما فيها منتج مُزدرى
،،،،،،،،،،،،،،،،،،،،،،،
وسِّع مواعين الفهم
الثروة نميها بفهم
تنهال وتنساب النعم
نوع مصادرك ودا الاهم
،،،،،،،،،،،،،،،،،،،،،،،،،،
حسِّن للعمال الاجور
وامنع مواعين الفجور
ومظهر فتاتك ليهو دور
رغبها فى احسن ظهور
والصحة اس التنمية
خليها فى ذهنك حضور
بترولنا جد كان الاساس
طلع الدهب وجاى النحاس
وبحرنا ما خاتيهو ماس
ووضعنا للنهضة الاساس
،،،،،،،،،،،،،،،،،،،،،،،،،،
يالجيت عملت المستحيل
احلام بقت واقع جميل
الخطوة بتمشيكا ميل
والحمل مهما كان تقيل
ما بسوى حاجة من القبيل
وتمَّ السلام نورت ليل
وللامن معدوم البديل
وللوحدة ما تاه الدليل
،،،،،،،،،،،،،،،،،،
صوتَ ليك
ومآلى بعد الله عليك
وانا صوتى قارى كتاب مناى
قُبال يجيك
