ليه السودانين كسالة؟؟؟؟؟

[mazza mohammed]

السلام عليكم
يا شباب و شابات المنتدى الناس كلهم بيقولوا انو الشعب السوداني كسول جدا
و ما بأدي الوظائف بشكل جيد السؤال انو هل السودانين كسولين؟ اذا كان الجواب نعم فالسبب شنو؟ و اذا كان لا برضو السبب؟
دايرين نوضح للناس الفكرة الخاطئة دي
ما تبخلوا بمقترحاتكم[

[ولد مكة]

كلامك غلط السودانيين ليسو كسولين
والفيهم من البرود العصبي وعدم النرفزة والهدوء الغالب على جميع الشعب يجعل تأثيرهم أقل على من حولهم وبذلك يقال أننا شعب كسول
تقبل مروري

[yagoub]

انا اتفق معك يا أخى ، لكن التفسير العميق محتاج اختصاصيين فى تقديرى..
والملاحظة واضحة جدا فى كل مناحى حياتنا اليومية مشينا فى الشارع والممرات الضيقة خصوصا النساء.. فى المكاتب .. المطاعم ..فى المواعيد .. العمال والمقاوليين، البنايين، الحدادين،النجارين ، الترزى الميكانيكى ....الخ .
مافى زول يقضى شغلتوا بهمة وفى مواعيدها .. والعندوا شك يجرب اى عامل اوفنى اجنبى وآخر سودانى وشوف الفرق .. وبعد دا كلو بنتشدق.

[ناجي عثمان عبد الرازق]

يامعزة اي سوداني بصحي الصباح بمشي اشتغل وبجي افطر وتاني اشتغل ده بكون اكيد كسلان لانو في اي محل في العالم الناس بتفطر اولا وتشرب الشاي وتشتغل تاني - بعدي الحكاية دي اثرت علي كل الامر التانية من مواعيد واعمال وحتى اعمال المنزل - شكرا لموضوعك الجميل واسف ان اطلت

[مدثر موسى]

السودانيين ما كسلانين لكن عندنا مشكلة فى ترتيب الزمن

[mazza mohammed]

شكرا تسلموا على مروركم

[المصرداني]

الأخوة والأخوات ,الأبناء والبنات الأعزاء

السلام عليكم

أولا لابد من تحديد من يصف السودانيين بهذا الوصف
هذه المقولة أنتشرت وسط الخليجيون أولا ثم أنتشرت في بلاد أخرى وعلي الأخص مصر

إذا ماتمعنت في الإنسان الخليجي وفي طريقة حياته فستجد أنه يكاد لا يقوم بأى عمل يذكر
فإذا كان موظفا حكوميا فهو دائم علي أختراع الأعذار للهروب من العمل
وإذا كان صاحب عمل خاص فستجده جالسا في محله يتناول القهوة أو الكبسة
أما إذا باحثا عن عمل فهو يريد المرتب وليس القيام بالعمل
إذن فهو يتهم من يتوهمه أقل منه

هل هناك سودانيون يعملون في دول الخليج ؟ وهل هم كسالي؟
عموما أهل الخليج لم يبخلو بتوصيفهم علي أحد ,فالمصرى حرامي واللبناني نصاب والسورى حاقد
والفلسطيني خبيث يكرهنا

أما أهلنا "أحبائنا" في الشمال فهم أيضا وأنطلاقا من أحساسهم بالحيرة والدونية فقد صارو علي
الدرب ولا يخفي علي أحد أن اللسان المصرى لا يمل من وصف كل شعوب الأرض بأوصاف تظهرهم بأنهم أقل من المصرى في كل شئ
فالمصرى في يوم من الأيام كان أحسن من الكورى والياباني بس الحظ
الروسي والصيني جعان وصناعته مش قدر كده والسجاد المصرى أحسن من الأيراني
الأفارقة بهايم ومش بيفهمو حاجة
السوداني كسلان ومش قادر يزرع أرضه وأحنا بقه حنروح نأخذها أصلهاخسارة فيه
وماحصل في مباراة مصروالجزائر بالأمس القريب لا ينسي

علي أية حال

مش مهم مين بيقول شنو عليك
المهم أنت شايف نفسك كيف
النقدالذاتي مهم لبلوغ هدف ومستقبل أفضل
ثم يجب النظر جيدا إلي من يوجه إليك النقد
هل تراه أفضل منك؟؟؟؟؟؟!!!!!!!!!!
وهل هو أهل لنقد الآخر؟؟؟؟؟؟؟؟؟؟؟؟؟؟!!!!!!!!!!!!!!!!!!!

وتحياتي

[عبدالعزيز جمالي]

تهمة الكسل لدى اللأشقاء السودانيين غير صحيحة

[بحلم]

احيكى على طرح هذا النقاش
رغم رفضى لهذه العبارة التى تقول انى السودانين كساله
واواضح لكى سبب رفضى ليها
بان يوجد كم من المغتربين السودانين فى جميع اقطار العالم سؤ
كانت دول اجنبيه او عربية ويعتلوا اعلى المناصب
وعلى ما اظن ان هذا النجاح ما بالكسل بل بالمجهود والنشاط والتفوق
المغتربين عزيزتى معزة يدومون من الساعة6 الى اوقات مختلفة
اظن لو فيهم كسل ما هيتواصل اغترب البعض منهم الى عشر سنوات واكثر
او اقل حتى فى السودان ذاتها شوفيها دلوقتى وشوفى التعمير والمشاريع
التى ستجعلها قريب من الدول المتقدمة ان شاء الله بمجهود ناسها
واحيكى مره اخر على هذا النقاش الجميل

[الحويطة]

هو يعني عشان السوداني طيب يكون القط ياكل عشاه زي مابقولو
اولا الناس المطلعين فينا الحاجة دي ما قدرو يعمرو ارضهم وبلدهم بنفسهم واستعانو بينا عشان نعملها ليهم بلد زي الناس .مش ده قمة الكسل.والتاريخ شاهد
والعاملين لينا فيها مافي زيهم على وجه البسيطة ويطلعو فيها النكات عشان يضحكو الناس ويخففو دمهم .انما هم حاسين بعقدة نقص لانو نحن ماشاء الله بلد 1000000ميل مربع



فاقول لك ياسوداني قولها وراسك فوق
انا سوداني وافتخر واللي ماعاجبه ينتحر ويكتب على قبره منقهر


وبعدين السوداني كان حمرت عينه وهرت عروقه ما بشوف قدامه

[mazza mohammed]

و الله كل كلمة قولتوها صح و شكرا على توضيح المعلومة دي للناس

[محسية]

هي تُهمة حاولنا جاهدين نفيها ولكنها للأسف راسخة في الأذهان ...


بالعكس في معظم دول الخليج بتلقي مثلا المهن الفيها حركة معظمها للسودانيين..
مناديب جوازات.... مندوب جمارك.... مهندسيين... وهكذا من اعمال خارج المكاتب..
هي تهمة.. للحسادة فقط.... ولكن الحمدلله اذيلت بمرور الزمن..
ونرجع للسودان حاليا الناس بقت تشتغل يعني الناس بقت تتحرك يعني في نشاط
نعم الواحد اذا لقي فرصة ينوم مابقصر لكن اذا عندو شغل بشتغل..



تسلمى على الموضوع


يعطيكى العافية

[إبنة النيل]

السوداني والله ما كسلان بالعكس اشتهر بالسمعة الطيبة والاخلاق بالاضافة للنشاط انا جد ما عارفة ليه بيقولو علينا كدة. ده والله ده حسد ساكت بس وبصراحة الكلام دة بزعلني شديد.

[صلاح الدين محمد]

نحن لسنا كسالى ولكن نأخذ الامور ببساطه ونتعامل مع الكل بعفويه ومازلنا لان الانسان لا يمكن ان يتغير
والشعب السودانى شعب شاطر وامين والجميع يعترف بذلك واقول الاخوة المصريين الله يهديهم هم السبب
فى هذه المقولة

[mazza mohammed]

شكرا ليكم كلكم على ردودكم الجميلة البتشبهكم

[ابوالتوم]

شكرا ليكم كلكم على ردودكم الجميلة البتشبهكم

الكسل ماجاى من فراغ ،سلوك ينتاب الانسان حين عدم المتابعة،وإذا هضم حقه وموجود بين العالمين كلهم،مش فقط السودانيين،لكن فى شعوب مابترضخ لهضم الحقوق لا تترك العمل وتبحث عن الغير فقط الشعب السودانى ،بيفتكر لو ترك العمل مش حيلقى بديل لمقولة رسخت عندو بالتكرار مثل(جرادة فى الكف ولاألف طائر)وده بيأدى للكسل وموجود...

[Mr.MiSterious]

والله كسلانين كسل!!
الكلام بالحركة البطيئة و المشي بسرعة السلحفاة ,ليش ما عارف!
بس الأجيال الجديدة دي أحسن و حركيين و دمهم حار مافي الفاضي,
كدي ناخدلينا نوما سريعة و نرجع ليكم

[سودانية صريحة]

والله رضينا ما رضينا السودانيين أغلبهم كسولين ، وما عندهم احترام للمواعيد الواحد يقول ليك حأجيك الساعة أربعة يجيك خمسة ده كان ماجاك سبعة ونص ، ياخي هي طيارتنا ذاتها ما عندها مواعيد, عليكم الله سيبونا ساي....

[سحاب]

مشكورة أختي علي طرح الموضوع . هذا الاتهام سمعناهو كثيرا في بلاد الغربة وهو بعيد كل البعد عن الحقيقة وعن الواقع ودائما أتذكر المقولة التي تقول ( رمتني بداءها وانسلت ) فان من يرمينا بهذه التهمة هم أكثر الناس كسلا ولا أدل علي ذلك من حياتهم المترفة والجيش الجرار الذي يخدمهم في بيوتهم من سائقين وطباخين وخدم وشغالات ومربيات حتي انهم فقدوا الخصوصية داخل بيوتهم وفقدوا الترابط الاجتماعي كذلك فالطفل منذ ولادته يدفعون به الي المربية والشغالة هي من تهتم به وباكله وبلبسه وبنومه وبكل صغيرة وكبيرة من شأنة ، والام في راحة كاملة نوما بالنهار واسواقا ومولات بالمساء . وهذا الوضع ولد عندهم عقوق الوالدين عند الكبر فالطفل منذ نشأته لم يشعر بحنان الام ولا عطف الاب لهذا لا عجب من انتشار دار العجزة والرعاية عندهم .
اما عندنا في السودان وهذا مثل بسيط فالام عندنا منذ ان تستيقظ صباحا فهي في خدمة أبنائها وزوجها تهتم بافطارهم للمدرسة وتحضير الطعام ونظافة المنزل غير المجاملات الاجتماعية في الحي أو غيره فتجدها شعلة من النشاط لهذا عندما تتقدم في السن تجد أبناءها يلتفون حولها يرعونها ويتسابقون في رعايتها
أما الذين يرموننا بهذه التهمة من شمال الوادي فالفيصل بيننا وبينهم العمل والانجاز فنحن في الغربة نعمل معهم في الوظائف ونعرف تهربهم من العمل وتبرير ذلك بالفهلوة والشطارة فانهم أكثر الناس الذين يحبون راحة أنفسهم ولو كان ذلك علي حساب الآخرين لا يبالون بذلك وعندي أمثلة كثيرة في ذلك في محيط عملي الا من رحم ربي
وعلي العموم فان كل الشعوب تجد فيها هذا وهذا ولكني في وجهة نظري نحن بريئون من هذه التهمة .

[mazza mohammed]

كلامكم صح لكن ما ننكر انو ما في كسالة في السودان .طبعا اي شعب فيهو الكسلان و فيهو النشيط و الكسل دا جاي من حاجات كتيرة يعني مثلا العطالة و هي اكبر سبب للكسل.
يا خوانا نحن دايرين نضع حد للمشكلة دي و ما دايرينها تزيد .
و شكرا على مشاركتكم لي