كل ما اقعد في مجلس فيه نسوان او اكلم واحده متزوجه تشكي من نسيبتها
بتذكر كان في بت سنيرتي في الجامعه مخطوبة (دي الحالة لسه على البر)
وكل ما الاقيها بتشكي من نسيبتها وتشتم فيها
ودايما بشاكلها لانو نسيبتها مره طيبة بس هي ماقادرة تفهما ولا عندها استعداد تكسبها.
ودي مشكلة اغلب البنات ما بقدرو يفهمو النسيبة
وانا عملت بحث في الموضوع دا ووصلت لانو النسيبة انواع
اولا النسيبة الفضولية:
ودي عاوزه تعرف عنك وعن ابنها اي شي واهم شي عشان تكسبي ودها انك تحاولي تشبعي
حب الاستطلاع العندها باشياء ما مهمة
حسسيها انك ما بتدسي منها اي شي لو جبتي اي شي جديد فرجيها
لو عملت اي شي كلميها لازم تحس انها عارفة كل صغيرة وكبيره
ثانيا النسيبة الغيوره:
ودي بتغير على ابنها جدا عشان كدا لازم تحاولي تحسسيها انها هي الاهم عند ابنها وعندك ,
وما تتدلعي فيه قدامها لانو القيامة حتقوم عليكي ,
وادفعي ابنها انو يكون قريب منها دايما عشان ما تقلب عليكي وتحس انك خطفتيه منها
ثالثا النسيبة المسكينه:
ايوا في نسيبة مسكينة ما عندها اي متطلبات كل العاوزاه انها تشوف ابنها واولاده سعيدين ومرتاحين
يعني ما تجي تلقاك ما طابخة ولا هدوم سي السيد ما مغسلة كدا بتقلب وتبقى شريرة ومفترسة كمان ,
عشان كدا تعملي حسابك وزي ما بقولو اتقي شر الحليم اذا غضب
رابعا النسيبة المتسلطة:
والنوع دا متوفر بكثرة لكن دي برضو عندها حل تحاولي تحسسيها انها فعلا متحكمة في ابنها وفيك
بانك تمشي كلامها في الامور الصغيرة ولو ما قدرتى تمشي كلامها فهميها انها هي صاحبة الفكرة
الانتي نفذتيها واوعي من كلمة ما تتحكمي فينا ولا كلام زي دا
بعد شوية هي بتزهج من التحكم وما بتقدر عليه بس في البداية بتكون عاوزه تثبت وجودها.
وفي النهاية لازم تختي في راسك انو نسيبتك هي أمك التانية ولازم تحترميها وتقدريها
مهما كانت سلوكياتها معاكي
وصدقيني لو كانت أسوأ إنسانه في الدنيا لما تشوف احترامك ليها وتقديرك لابنها
حتحبك وتعاملك زي بنتها وممكن تشاكل ابنها عشانك
وختي نفسك مكانها انتي تعبتي وربيتي ابنك وكبرتيه وتجي واحده عرفت يومين
تاخدو منك , الاحساس دا هو البخلي النسيبة تعامل زوجة ابنها بصوره متقلبة او صعبة
لكن لو حسستيها انها كسبت بت تانية وما خسرت ولا حتخسر ابنها حتلقي منها احسن معاملة .
وفي النهاية هي ام زوجك وقرة عينك اذا عاوزه ترضي ربك وتكسبي رضى زوجك
بري أمه حيشيلك في حبابي عينيه .
رايكم شنو في كلامي دا العاجبو يقول لي والعندو راي يقولو
والمعترض يسجل اعتراضه
واختلاف الآراء لا يفسد للود قضية.
(عل فكرة سنيرتي خطيبها سابها
)
