كل مالدنيا تبسم لى الاقى الهم معاى باقى ..ليه يادنيا مأساتى تبدا من صغرى والهم لابسنى عراقى؟؟؟
يالطيب اخوى عليك الخاطر المكسور ,وعليك الجلسة وسط امى وابوى ,,وعليك لمتنا كوولنا يوم العيد لم تجينا انت من الخرطوم ..وجبت معاك تلاتة من الاخوات وانتو داخلين على البيت تقابلكم امى وتلمكم كولكم بى شفع البنات واحدين صغار وواحدين كبار بنات واولاد .وتسال انت وين ابوى يا امى ؟ وقبل امى ماترد عليك تمرق انت على الحوش وتشوف (التراكتور) ان بقى موجود يبقى ابوى عند ناس عم سليمان ولا اكون مشى اشوف عم موسى المريض ليهو شهرين وانت عارفو . وان بقى التراكتور مو موجود ابقى ابوى فى المشروع ..وتعرف الحاصل وتقعد تشرب الليمون .وتسالك امى وين باقى اخوانك واخواتك لى شنو ماجبتهم معاك عشان العيد ؟ تقول ليها ياهو معاك عبدالرءوف وعبدالمنعم وعبدالوهاب وعبدالحفيظ وانا جيت وعلى وعطاالمنان بجو المغرب ..والبنات جو معاى ديل والباقيين ماعارفهم امكن ما اجو .امى تقول ليك ,,,,سجمى كيفن بناتى ما يجو؟ تقوليها يمة بناتك متزوجات ..تنط الشليقة مناهل تقول ليكم الزواج فى السماء امى تقول ليها يابنت انطمى راجلك بسمعك ,,تقول ليكم انشاء الله اسمعنى (طيب ولدتى منو ومليتى الواطة كيف لو ما عاوزاهو طلقيهو) وانت بتشرب فى الليمون امى واقفة وراك وتمسح ليك بى طرف توبا عرق بدا يتساقط على جبينك ونازل فوق وشيك ,,وهنا الشليقة ديك تنط تقول ,,,,,آى البريدو بزيدو هسع يا امى ماكلنا عرقانين ايش معنى بس بتمسحى عرق الطيب براهو؟؟ تقول ليكم امى والله كوولكم بريدكم وياكم جنياتى بس الطيب دة حقو براهو ,, والشمس بدت تغيب وفجاة نسمع صوت الترتر ...وكلنا نقيف واجرى انا على الباب واقابل ابوى واقول ليهو كووول الناس جو (شلاقة اشراقة) ابوى اقول لى قول ماشاء الله ,,ويبدا السلام .. وتعرف انو ابوى ليهو اسبوع فى المشروع تقوم الشليقة تقول ليهو ابوى لى شنو بتقعد اسبوع فى المشروع ؟انت عندك مرا تانية غير امى دى ولا شنو ؟؟ يضحك ابوى ومايعرف يرد ليك ,,
عليك كل دة ابقى كويس وقوم من السرير بتاع المستشفى دة ..
ويجى الليل وكيف النووووووم ؟؟ وين السراير التكفى الناس ديل ؟؟ طبعا ماممكن نشحد من الجيران سراير ,,, عشان العين ماتصيبكم تقول امى ..اقتراح كل 3 بنات فى سرير والاولاد كل واحد براهو بس اتقسمو .الطيب وعلى وعطا وعبدالمنعم ينوموا قدام الصالون ,,,عبدالرءوف وعبدالحفيظ وعبدالوهاب ينومو جوة الصالون ,,ومع آذان الفجر قام ابوى لى الصلاة نسمع ليك كركبة فى باب الصالون ,,,دى امى صحت ليك الجماعة البرة الصالون عشان ادخلو جوة الصالون عشان الناس بيجو من قدام الصالون ماشين الجامع مايشوفو 5 سراير برة ويسحروكم ....عليك كووول دة قوم من سرير المستشفى القبيح دة ..........
الصباح اسالك انا ..الطيب جبت لينا شنو من الخرطوم ؟تقول لى جبت الموز والبرتكان والجوافة واخش المطبخ الاقى بنات الاخوات والاخوان نازلين ليك فرم فوق الفواكه واكورك انا لى امى وتجى تقول ..سجمى فى شنو ؟؟اقول ليها شوفى تقول لى خليهم انشاء الله ينفعهم (وانا فى جواى ماينفعم انشاء الله)
الطيب عشان كل دة تقوم من المستشفى دى .....,,,,,,, وتتنفض وتبقى كويس ,,عشان أبوى ,,عشان أمى ... عشان البنات الخلو بيوتهم وقفلوها ورموا شفعهم وقعدو حرسوك قدام باب المستشفى الطيب خلص الفحص,,الطيب ادوهو الدرب,,الطيب اخد الحقنة,,,الطيب نام ,,الطيب شالوهو من برة دخلوهو جوة ,,, الطيب ح ياخد جرعة الكيماوى بكرة قال الدكتور وهم قاعدين حلفو علا انومو فى مستشفى امدرمان دة الانت فيهو ومايخلوك براك وهم يبكو وكل ما اجى واحد يزورك يبكى وهم يبكو وكل ماتدخل نهال بنتك تبكى وهم يبكو وكل ما تجى نهلة من المدرسة تبكى وهم يبكو وكل ما جا داخل محمد ولدك يبكى وهم وامى يبكو,,,,,,,,,, ...دايرنك عشان دة كلو تبقى كويس وتقوم ,,,,,عشان ابوى اقعد اكلم فى وهيب وحفيظ ياجماعة امشو شغلكم ...الطيب ببقى كويس يقولو ليك نحنا يا ابوى ماماشين اخدنا اجازة لم الطيب يطلع من المستشفى ...ويقعد ابوى مع بنتو الكبيرة ويقول ليها يابتى كلمى اخوانك ديل سابو بيوتم وشغلم وحرسو المستشفى ..تقول ليك مايمشو نحنا كولنا قاعدين هنا وماماشين اى مكان قاعدين مع الطيب ,,,وفجاة يالطيب تجى امى ومعاها اخوك داخلين وفى ايدهم الدواء جابوهو من الصيدلية عشان المستشفى مافيها الدوا دة وتجى اختك التانية وتقول لى امى انتى هسع يا امى مشيتو وين ولى شنو انا الدواء ياهو دة جبتو لى شنو الخسارة دى تول ليك امى خلاص مايضر شوفو ليكم زولا عيان وادوهو ليهو لى زولا تانى امكن محتاجو...عشان كل دة ابقى كويس وقوم من السرير دة ...
عشان الوجعة تتلاشى وعشان الدمعة وسط العين تجف وتقوم ومانهتم ..عليك اللهفة الفى عيون امك ودع المستشفيات ,,عشان امى وانت عارف لم مات اخونا على سوت شنو وبعديها لم غرق اخونا عبدالمنعم عملت كيف ,,ونحنا ماصدقنا بقت كويسة وسابت البكاء
عليك سؤالى عليك وانت تتذكر لم اجى الخرطوم ,,,من المطار ولى بيتك وفى بيتك القى الاخوان والاخوات جو من الجزيرة والجاء من مدنى والجاء من ودرملى حارسنى ..وبعد شوية قبل الشمس تغيب تقول لى يلا رءوف افتح الشنط دى وادى كل بنت حاجتها عشان يمشو بيوتهم وخلى حامد السواق يوديهم قبل الشمس ماتغيب ,,,اقعد انا اسحلف فيك واقول ليك انا مشتاق ليهم خليهم ينومو وانت تقول لا اقول ليك مايمشو انشاء الله اطلقوهم زاتو ما يمشو ,,يجوك البنات ويقولو ليك والله اكان نتطلق الليلة مانمشى علا بكرة ,,وانت تزعل وعيونك تحمر وتقعد تنضم خارم بارم ...مناهل الشليقة تقول ليك ..اسمع لو انت خايف من سمك العشاء ح نجيبو الليلة بالريال ,, وتمد ايدا لى انا واعصر ليها مائة ريال واسالها امى وين ؟تقول لى امى ح تجى بكرة ونحنا حارسنها هنا دة وماماشين كلم الطيب دة كدة .... وفجاة زول ادق الباب وتجى جارية نهال وتنط فوق كتفى واقول ليها يانهال انت عمرك 14 سنة بطلى نطيط انتى كبرتى تقول لى عادى ياعمو واعاين وراها اشوف ليك امى ..وجرى على الباب ..وهنا انت تعرف انو بعد دة مافى بنت ح تمشى بيت راجلها يعنى بى جية امى الحكاية باظت والبنات ح يقولو ليك نمشى كيف وهسع امى جات داخلة ..والشليقة تسلم على امى وتقعد تضحك ..يعنى كلامك طلع بيش ,,نحنا ماماشين
عليك كل دة قوم وابقى كويس ,,, انت عارف انا ليه ماجيت وشفتك ؟ واكتفيت بس بالاتصال عليك ؟؟ انا مازى ديل انا اكان جيت وشفتك بالحالة القالتها لى امى بالتلفون دى ,,ناس شايلنك وناس خاتنك وناس رقدوك وناس رفعوك ..وبقيت مابتعرف بناتك وولدك واحيانا جسمك يولع زى النار .زوفجاة يبقى زى التلج زى ماقالت امى ,,انا لو شفت دة بموت وتبقى مصيبة عشان كدى ابوى قال لى يارءوف انا بحزرك اوعك تجى وتزيد لينا المرض الفينا انت لو جيت مابتصبر ..دة السبب بس ابوى قال لى تعال بعد شهرين اكون الطيب بقى كويس ونمشى كلنا نعمل كرامتين واحدة ليك انت وواحدة لى اخوك الطيب بمناسبة شفاهو من المرض ,وانا هسع منتظر باقى شهر ونص واشوفك
عليك الله تبقى كويس وتقوم من السرير بتاع المستشفى دة
يالطيب اخوى عليك الخاطر المكسور ,وعليك الجلسة وسط امى وابوى ,,وعليك لمتنا كوولنا يوم العيد لم تجينا انت من الخرطوم ..وجبت معاك تلاتة من الاخوات وانتو داخلين على البيت تقابلكم امى وتلمكم كولكم بى شفع البنات واحدين صغار وواحدين كبار بنات واولاد .وتسال انت وين ابوى يا امى ؟ وقبل امى ماترد عليك تمرق انت على الحوش وتشوف (التراكتور) ان بقى موجود يبقى ابوى عند ناس عم سليمان ولا اكون مشى اشوف عم موسى المريض ليهو شهرين وانت عارفو . وان بقى التراكتور مو موجود ابقى ابوى فى المشروع ..وتعرف الحاصل وتقعد تشرب الليمون .وتسالك امى وين باقى اخوانك واخواتك لى شنو ماجبتهم معاك عشان العيد ؟ تقول ليها ياهو معاك عبدالرءوف وعبدالمنعم وعبدالوهاب وعبدالحفيظ وانا جيت وعلى وعطاالمنان بجو المغرب ..والبنات جو معاى ديل والباقيين ماعارفهم امكن ما اجو .امى تقول ليك ,,,,سجمى كيفن بناتى ما يجو؟ تقوليها يمة بناتك متزوجات ..تنط الشليقة مناهل تقول ليكم الزواج فى السماء امى تقول ليها يابنت انطمى راجلك بسمعك ,,تقول ليكم انشاء الله اسمعنى (طيب ولدتى منو ومليتى الواطة كيف لو ما عاوزاهو طلقيهو) وانت بتشرب فى الليمون امى واقفة وراك وتمسح ليك بى طرف توبا عرق بدا يتساقط على جبينك ونازل فوق وشيك ,,وهنا الشليقة ديك تنط تقول ,,,,,آى البريدو بزيدو هسع يا امى ماكلنا عرقانين ايش معنى بس بتمسحى عرق الطيب براهو؟؟ تقول ليكم امى والله كوولكم بريدكم وياكم جنياتى بس الطيب دة حقو براهو ,, والشمس بدت تغيب وفجاة نسمع صوت الترتر ...وكلنا نقيف واجرى انا على الباب واقابل ابوى واقول ليهو كووول الناس جو (شلاقة اشراقة) ابوى اقول لى قول ماشاء الله ,,ويبدا السلام .. وتعرف انو ابوى ليهو اسبوع فى المشروع تقوم الشليقة تقول ليهو ابوى لى شنو بتقعد اسبوع فى المشروع ؟انت عندك مرا تانية غير امى دى ولا شنو ؟؟ يضحك ابوى ومايعرف يرد ليك ,,
عليك كل دة ابقى كويس وقوم من السرير بتاع المستشفى دة ..
ويجى الليل وكيف النووووووم ؟؟ وين السراير التكفى الناس ديل ؟؟ طبعا ماممكن نشحد من الجيران سراير ,,, عشان العين ماتصيبكم تقول امى ..اقتراح كل 3 بنات فى سرير والاولاد كل واحد براهو بس اتقسمو .الطيب وعلى وعطا وعبدالمنعم ينوموا قدام الصالون ,,,عبدالرءوف وعبدالحفيظ وعبدالوهاب ينومو جوة الصالون ,,ومع آذان الفجر قام ابوى لى الصلاة نسمع ليك كركبة فى باب الصالون ,,,دى امى صحت ليك الجماعة البرة الصالون عشان ادخلو جوة الصالون عشان الناس بيجو من قدام الصالون ماشين الجامع مايشوفو 5 سراير برة ويسحروكم ....عليك كووول دة قوم من سرير المستشفى القبيح دة ..........
الصباح اسالك انا ..الطيب جبت لينا شنو من الخرطوم ؟تقول لى جبت الموز والبرتكان والجوافة واخش المطبخ الاقى بنات الاخوات والاخوان نازلين ليك فرم فوق الفواكه واكورك انا لى امى وتجى تقول ..سجمى فى شنو ؟؟اقول ليها شوفى تقول لى خليهم انشاء الله ينفعهم (وانا فى جواى ماينفعم انشاء الله)
الطيب عشان كل دة تقوم من المستشفى دى .....,,,,,,, وتتنفض وتبقى كويس ,,عشان أبوى ,,عشان أمى ... عشان البنات الخلو بيوتهم وقفلوها ورموا شفعهم وقعدو حرسوك قدام باب المستشفى الطيب خلص الفحص,,الطيب ادوهو الدرب,,الطيب اخد الحقنة,,,الطيب نام ,,الطيب شالوهو من برة دخلوهو جوة ,,, الطيب ح ياخد جرعة الكيماوى بكرة قال الدكتور وهم قاعدين حلفو علا انومو فى مستشفى امدرمان دة الانت فيهو ومايخلوك براك وهم يبكو وكل ما اجى واحد يزورك يبكى وهم يبكو وكل ماتدخل نهال بنتك تبكى وهم يبكو وكل ما تجى نهلة من المدرسة تبكى وهم يبكو وكل ما جا داخل محمد ولدك يبكى وهم وامى يبكو,,,,,,,,,, ...دايرنك عشان دة كلو تبقى كويس وتقوم ,,,,,عشان ابوى اقعد اكلم فى وهيب وحفيظ ياجماعة امشو شغلكم ...الطيب ببقى كويس يقولو ليك نحنا يا ابوى ماماشين اخدنا اجازة لم الطيب يطلع من المستشفى ...ويقعد ابوى مع بنتو الكبيرة ويقول ليها يابتى كلمى اخوانك ديل سابو بيوتم وشغلم وحرسو المستشفى ..تقول ليك مايمشو نحنا كولنا قاعدين هنا وماماشين اى مكان قاعدين مع الطيب ,,,وفجاة يالطيب تجى امى ومعاها اخوك داخلين وفى ايدهم الدواء جابوهو من الصيدلية عشان المستشفى مافيها الدوا دة وتجى اختك التانية وتقول لى امى انتى هسع يا امى مشيتو وين ولى شنو انا الدواء ياهو دة جبتو لى شنو الخسارة دى تول ليك امى خلاص مايضر شوفو ليكم زولا عيان وادوهو ليهو لى زولا تانى امكن محتاجو...عشان كل دة ابقى كويس وقوم من السرير دة ...
عشان الوجعة تتلاشى وعشان الدمعة وسط العين تجف وتقوم ومانهتم ..عليك اللهفة الفى عيون امك ودع المستشفيات ,,عشان امى وانت عارف لم مات اخونا على سوت شنو وبعديها لم غرق اخونا عبدالمنعم عملت كيف ,,ونحنا ماصدقنا بقت كويسة وسابت البكاء
عليك سؤالى عليك وانت تتذكر لم اجى الخرطوم ,,,من المطار ولى بيتك وفى بيتك القى الاخوان والاخوات جو من الجزيرة والجاء من مدنى والجاء من ودرملى حارسنى ..وبعد شوية قبل الشمس تغيب تقول لى يلا رءوف افتح الشنط دى وادى كل بنت حاجتها عشان يمشو بيوتهم وخلى حامد السواق يوديهم قبل الشمس ماتغيب ,,,اقعد انا اسحلف فيك واقول ليك انا مشتاق ليهم خليهم ينومو وانت تقول لا اقول ليك مايمشو انشاء الله اطلقوهم زاتو ما يمشو ,,يجوك البنات ويقولو ليك والله اكان نتطلق الليلة مانمشى علا بكرة ,,وانت تزعل وعيونك تحمر وتقعد تنضم خارم بارم ...مناهل الشليقة تقول ليك ..اسمع لو انت خايف من سمك العشاء ح نجيبو الليلة بالريال ,, وتمد ايدا لى انا واعصر ليها مائة ريال واسالها امى وين ؟تقول لى امى ح تجى بكرة ونحنا حارسنها هنا دة وماماشين كلم الطيب دة كدة .... وفجاة زول ادق الباب وتجى جارية نهال وتنط فوق كتفى واقول ليها يانهال انت عمرك 14 سنة بطلى نطيط انتى كبرتى تقول لى عادى ياعمو واعاين وراها اشوف ليك امى ..وجرى على الباب ..وهنا انت تعرف انو بعد دة مافى بنت ح تمشى بيت راجلها يعنى بى جية امى الحكاية باظت والبنات ح يقولو ليك نمشى كيف وهسع امى جات داخلة ..والشليقة تسلم على امى وتقعد تضحك ..يعنى كلامك طلع بيش ,,نحنا ماماشين
عليك كل دة قوم وابقى كويس ,,, انت عارف انا ليه ماجيت وشفتك ؟ واكتفيت بس بالاتصال عليك ؟؟ انا مازى ديل انا اكان جيت وشفتك بالحالة القالتها لى امى بالتلفون دى ,,ناس شايلنك وناس خاتنك وناس رقدوك وناس رفعوك ..وبقيت مابتعرف بناتك وولدك واحيانا جسمك يولع زى النار .زوفجاة يبقى زى التلج زى ماقالت امى ,,انا لو شفت دة بموت وتبقى مصيبة عشان كدى ابوى قال لى يارءوف انا بحزرك اوعك تجى وتزيد لينا المرض الفينا انت لو جيت مابتصبر ..دة السبب بس ابوى قال لى تعال بعد شهرين اكون الطيب بقى كويس ونمشى كلنا نعمل كرامتين واحدة ليك انت وواحدة لى اخوك الطيب بمناسبة شفاهو من المرض ,وانا هسع منتظر باقى شهر ونص واشوفك
عليك الله تبقى كويس وتقوم من السرير بتاع المستشفى دة
