خواطر و أحلام ...... حلو مُر

[حبوبة]

تعال لي جاي خليني أحكي لك حكاية
انا يا جناي شاربة من موية المحاية
بديت كتابتي بي قلم القصب وسكن الدواية
علي اللوح في المسيد من خشم الفكي وبسم الله آية
ودخلناها المدارس وخبرناها القراية
كبرت واتعلمت واتراكمت اشياء في جوايا
وما لقيت غير الورق أحكيه آلامي ومنايا
معاي يعيش فرحي وكل آهاتي وغنايا
الناس أسرار ودنيانا ياما فيها من خبايا
وفي القلم بلقى راحتي والورق دثاري ودفايا

[حبوبة]

ياخيتى

قـول الشين عند الناس صِِبح مظهر حفاوه

تسلم ياال كلما زاد قولو.. عند الناس إزداد غلاوه

المتل ديل الله لا سخر لهم طاري
إت سَوْ هِمتك وخليك للآخرة شاري
غرور الدنيا أوعاك لا تباري
والكريم يا جنا ليك يلطف يضاري

يسلمك ويديك الزينتين ذرية ومصاري ..

[حبوبة]

[quote="هامس"] تسلم يالوصل حبك للمو دارى والدارى


غلبني وحاتك وربك يعلم
أجاريك فيه موزون الكلم
بالفي القلوب المولى يعلم
وتلقاه جزاك يوم الملم

ربي يخليك ويسلم لي ده القلم

[Hoomy]

حبوبة
ود الرضي قال
الأهلية كملت ياحبيب راحت ياحليل شمس المحنة القربت طاحت

وأنا بقول
الأهلية كملت ياحبيب راحت وخلاص شمس المحنة غربت شاخت
الدنيا ام قدود شالت ملاكي بعييييييييد بي فراقنا إتباهت
والحزن جوة القلوب ساكن خلا ها بعدت ومن الدرب تاهت
والفرح البقى نادر وجوده وأرياحه عدت زمان راحت
والأمل راكن بعيد ماشفنا لا حسينا بي رياحه فاحت


والله يستر

[كباشي مختار]

رايع جدأ هذا النثر

[كباشي مختار]

انا سعيد لترحيبكم بي كعضوا جديد

[سماح البدرى]

الكل اقسم ان ينام ...
يا أنت يا مدن المنافي ..
قد استئت من النيام ...
فأنا أجوب بحيرتي ...
كالطيف ... إلي متي ؟
سأظل ابحث في انتظار
وجهك يطل مع المنام ...

[سماح البدرى]

فلونت الرؤي
واخترت لون الاندياح
احتاجك الفرح الذي ...
يغتال في توجسي.. حزني
ويمنحني بريقا ..
لونه .. لون الحياة
وطعمه .. طعم النجاح.

[معتبر]

حبو

احكي ليك
حكاية علي ابوسن

قام شال حرف وخت حرف
وكترت الحروف
يقعد يعاين ليهن
لوعطش يرصهن ماء
وان قلبه خفق يبقوا حب
ولو عينو وقعت عليهن يخليهن جواهو اماني
اماني حلوة
ولوبقت اغلي المنال
يبقي الحديث شئ تاني
مالو
الريد عندنا طبع
ومحباها
بسمات رضا
محنة دي هي البجيب الود

اجيك شايل لهفتي
القاك اغلي امنيتي

[حبوبة]

الدنيا ام قدود شالت ملاكي بعييييييييد بي فراقنا إتباهت
والحزن جوة القلوب ساكن خلا ها بعدت ومن الدرب تاهت
والفرح البقى نادر وجوده وأرياحه عدت زمان راحت
والأمل راكن بعيد ماشفنا لا حسينا بي رياحه فاحت


والله يستر

[font=tahoma]
الدنيا حالا دوام خوانة فراقة
بيمينا تدينا وبي شمالا سراقة
ما تحزن آ حِبي تسقي أشواقا
كم من حبيب قبلك أهوالا يود ضاقا
للعاشقين ديمة زايداهو خنّاقا
أرميه حزنك غادي لا يبقلك عاقة
وعشم لقياي في جواك .. فتح لك طاقة
علي وعليك دنيا وآخرة [/font]

[حبوبة]

[quote="Hoomy"]الدنيا ام قدود شالت ملاكي بعييييييييد بي فراقنا إتباهت



سبحانو خالق الروح وباريها
كاتب علي عبدُه مما يدخلا يوطيها
يباشرا بالصريخ يعلن سبابو عليها
زايلة خربانة وعدمان البواليها
لمتين يا ابن آدم تظل تايه في أراضيها
خايف منها وساكيها لا راضياك لا راضيها
أدّها ضهرك قبال تدفنك ات بالخصام باديها

[حبوبة]

[quote="Hoomy"]

الأهلية كملت ياحبيب راحت وخلاص شمس المحنة غربت شاخت


هه يا تومي معقول ات ما ليك خبر
المحنة كلما تشيخ تتربى تكبر
كل الفروق تتلاشى تعبر
يفيض الشعور وللخواطر يجبر

[حبوبة]

رايع جدأ هذا النثر

الروعة مرورك يا سيدي

[حبوبة]

انا سعيد لترحيبكم بي كعضوا جديد

وتاني أهلين بيك ومرحب
نشيلك محنة وليك خوتنا تصحب
ديمة بيوتنا فاتحة ولينا الوداد مذهب
بس خليك واصل لا تتاوق وتذهب

[سلمي200005]

حبوبة .. دائما تعجبني كلماتك .. وان شا الله دائما ايامك كلها حلو ...

[حبوبة]

[quote="سماح البدرى"]

أتمنى ليلكك ما يطول
وتكون ربيع باقي الفصول

[حبوبة]

فلونت الرؤي
واخترت لون الاندياح

لونه .. لون الحياة
وطعمه .. طعم النجاح.

بت البدري لون الحياة من خديك صاح
نورُه أشرق في عينيك لاح
همسو الضاحك في بسمك الوضاح
بريقو ف جبينك ضاوي
ونسيم البهجة عطّر فاح
رؤاك من لون قس قزح
سكن حرفك ولينا باح ..

[حبوبة]

قام شال حرف وخت حرف
وكترت الحروف
يقعد يعاين ليهن
لوعطش يرصهن ماء
وان قلبه خفق يبقوا حب
ولو عينو وقعت عليهن يخليهن جواهو اماني
اماني حلوة

الحروف والأماني ديل سبب جناني
في لحظة تكون وجع وتتسطر أغاني
معاها تعيش لوع وريد ماليه تاني
تيسم تعاين ليك بي لهفة وقلب حاني
ترحل هناك بعيد تشوف النجم داني
تحمد إلهك تب تنادي السعد جاني
وبس تقلب الصفحة .. تتناثر أماني ..

وآه منكم و وووب مننا ..

[حبوبة]

حبو

احكي ليك
حكاية علي ابوسن

قام شال حرف وخت حرف
وكترت الحروف

ترسم بإيدك لوحة
تعيش جواها فرحة
بالمعنى واللمحة
بالضمة والفتحة
سكونو مو جرحة
وشدّو ما شَبْحة
ولا بتكسرو بفُسْحة
تعاين في حروفك
تتملى ف وصوفك
تحاكيهن طيوفك
تتمنى بس لمحة ..

و اكتب لي يا غااااالي الحروووووف

[معتبر]

وآه منكم و وووب مننا ..

حبوبة
اقوم افرش انا هنا ولاشنو
يامعذباتننا ومجهجهاتننا
الله يسمحكن اكتر واكتر
ونحن بيكن نظفر
تقسو علينا نقسو اكتر
تدونا محبة نديكم اكتر
تطيروا بينا السماء
نطير بيكم اعلي

ادونا حنية
نديكم الدايرنو