كيف تجيبي عريييييييييييييس؟؟؟

[نهر المحبه]

هههههههههههه
مشكوره ياسلمى
والله خطه عجيبه لكن تنفيذها ......................
احنا والحمدلله جبتي لينا حل
الاخوان في الله البايرين
يقبلو وين
خخخخخخخ

[أبو أحمد]

مافى حاجة بتغلبكم يا جنس حواء والله
بقيتوا صعبات خالص.

[سمارا]

طيب ياختى ولو دايره اطفشه اعمل شنو




مشكوره على البوست الرائع

[سلمي200005]

تسلمو ياحلوين ويديكم العافية اصبري علي شوية سمارا عشان اعمليك خطة للتطفيش

[مها]

ورينا الخطه يا سلمى عشان نكون جاهزين

[رءوف]

هههههههههههه
مشكوره ياسلمى
والله خطه عجيبه لكن تنفيذها ......................
احنا والحمدلله جبتي لينا حل
الاخوان في الله البايرين
يقبلو وين
خخخخخخخ

قصدك منو لو سمحتى

[مها]

قصدك منو لو سمحتى

ايوه قصدك شنو لو سمحتى

[سلمي200005]

ايوه قصدك شنو لو سمحتى

مها انتي حاشاك البورة

[سلمي200005]

وينكم يابناااااااااااااااااااات

[jasmina]

[glow=FFFF66]

ههههههههههههههههههههههههههههههههههههههههههههههههههههههههههه

بالـــــــــــغتــــــي لكيــــــــــن

ماكان كبتن البيعملوا ليهو التخطيط دا كلو

لا لا نقرا قرايتنا .... والعريس بيجي جاري جري وواقع على وشوا

بس لما ربنا يكتب ليهوا لكين الواحده تكتم نفسها دي too much

ويسلموا على البوست اخت سلمى


.

[/glow]

[jasmina]

طيب ياختى ولو دايره اطفشه اعمل شنو




مشكوره على البوست الرائع

[glow=ffff66]

اول حاجة مافي احسن من الصراحة صارحيهوا انك ماعايزاهوا ومافي نصيب

اذا مامن النوع البيفهم او ماقادره تصارحي

اعملي عكس الكلام الفي البوست


.

[/glow]

[سمارا]

ياختى فى ناس اصلو ما بحسو ثقيلين ثقاله مبالغ فيها

غايتو بحاول اطنش بس يا جاسمينا



سلمى راجياك بالخطط



مها شاركينا برضو

[jasmina]

[glow=ffff66]

خلاص ادعي ربك بس يحلك ويغترب ليهوا في بلد بعييييييييد

[/glow]

[البنيه]

والله بالجد اشكرك يا سلمي خلطتك عجيييييييييبه بخلطتك دي الاسبوع الجاي كلنا بيكون عندنا عرسان هههههههههههه

[سلمي200005]

والله بالجد اشكرك يا سلمي خلطتك عجيييييييييبه بخلطتك دي الاسبوع الجاي كلنا بيكون عندنا عرسان هههههههههههه

اميييييييييييييييييييييييييييييييييييييييييين يارب

[امال الناس]

إلى كل سحلية واقفة في حلق أهلها وما عارفه تتصرَّف مع إنهم خاتِّين معاها أُخُتا مجاناً لزوم الترويج وكدا!!!

إليكي يا إنتي..

كيف تصطادين عريساً باستخدام الأساليب الحديثة غير المكلفة وذات الأثر؟


للإجابة على هذا السؤال خذي بالآتي:

1.أول خطوة ركِّزي على النسوان العجايز.. وبخاصة (أم الحريف) العليو النظر.. (ما تعايني لي كدا قصدي العريس).

2.خليكى لاصقه جنب أمك وبطِّلي عوارة وجرى ورا البنات صحباتك (شِن سوِّيتي بالخفة والهبالة يالفالحة؟!!)

3. لمَّ تكوني ماشَّة راسك الكبير دا تختيو بين كتافينك وأبداً ما ترفعى لي فوق عشان يقولو مؤدَّبة وما متقندفة وبطِّلي فلهمتك الما جابت ليك غير البلاوي!!

4.كلمة خالة دي خليها طوالي فوق لسانك وخاصةً لي (أم الحريف هي قصدي العريس) عشان تحس بالتميز من بقية العجايز القاعدات معاها (ما في مانع تنادى واحدة تانية بخالتك الدنيا ما معروفة يمكن الخطة ما تنجح وفي الحالة دي لساتكك ما تطير وبكون عندك بديل جاهز.. وخلي بالك العمر جاري ).

5.أول ما أمك تبدا الكلام ألكزيها بي تحت من غير ما زول يحس عشان تدخِّلك الموضوع حتى لو ما كان عندك مزاج.. زي ما بقول المثل كَترَت الكلام تكسر الحديد.!! (عارفك ح تقولي لي المثل دا ما ليو داعى بس ما لقيت لي مثل غيرو!!!!).

6. أخوانك الصغار أجرى وراهم واعملي انك مهتمة بيهم كأنك أمهم عشان (أم العريس) تقول عليك إنك حنينه على أولادك (ربنا يخلف عليك)...!

7.كل شي تاكلو أم العريس ويكون حلو خلي أمك تقول والله نفس الأكلة البتسويها بتي (حتى ولو كانت أكلة من المطعم الصينى!!).

8. لو مديتي إيدك لي شي (اريتا بالكسر) اتوجَّعى واتنهَّدي (بس براحة كدا.. لأنو صوتك شين) خلى أمك تقول يديها العافية انا أقوليها ما تنضِّفى الشارع إلا هي كاتلاها النضافة (ولو جينا للجد تلاقيك اوضتك ما قادرة عليها والصراصير سيرة عرس بي دلاليكا.!!!).

9.بعدين لما تقعدي خليك قاعدة في الطرف وشدِّي طولك زى البالعة ليك عود عشان طولك ما ينقص (الكلام دا للقُصار تحديداً..!!).

10.إذا النسوان العجايز ديل اتكلمو عن أي عرس اكتمي نَفَسِك لغاية ما خدودك يحمِّرَن عشان يقولو البت خجلانة (وأعملي حسابك ما تكتمي نفسك للنهاية بعدين تروحي فيها وتودينا فى داهية..!!).

11.مهما كان الموضوع حماسي خليكي راااااسية وتقيلة وبطِّلي خفَّة وما تنحشرى فيو (التِحشِّر دا بتجيب أجل الخطة كلها وطيارتك ح تقوم..!!).

12.شعيراتك ديل خليهن مفرودات أوعك من الطاير والمنكوش (النسوان العجايز ديل جنهن وجن الشعر المنكوش..!!!).

13. اها أكان العجوز (أم السجم قصدي العريس) قالت أي حاجة أكان سياسة ولا اقتصاد إن كان مسيخ وما منطقي ولا أفقي (حتى لو قالت أمبارح بوش كان فاطر معانا) قولي بي حُسن نية وبراءة وليه يا خالتي ما كلمتينا نجي نساعدكم؟!!

14. إي عرس قاعدة فيو (ام العريس) أوعك من النطيط والرقيص.. اهمدي واتلمى وقولي بطريقة تسمعا (إنو الرقيص دا عيب)..!!

15. لو جات سيرة السوق خلى امك (ربنا يصبرا عليكي) تقول بناتى أصلن ما بمشن السوق وأي حاجه بجيبا ليهن ابوهن (وتلاقيك حايمه السوق زى بتاع الترمس)..
16- اقفلى الموبايل اوخليهو صامت عشان ام الكوتش ماتقول البت جنها تلفونات(ودى حقيقه اصلا )
احتمال وارد

بينك وبين نفسك ممكن تقولي إنو العجوز (أم صاحبنا) خاتا عينا على وحده تانية والبتسوي فوقو إنتي دا ح يروح شمار فى مرقه ساي!!! أوعك تصدقي الأوهام دي.. ركزي في تنفيذ الخطة والحاجة ح تقع يعني ح تقع وح تجيبي كثافتا لا محالة بي حركاتك دي..!!
الشغل الخاص بالعريس
1.اها (أم العريس) بعد ما تخش الشبكة.. نجي بقى للعريس ذاااااااااتو.. وأول تبادي اتلمى وخليك فى بيتكم واوعك من الحوامة..

2.أكان جاكم العريس خلى أبوك يقول ليو والله لازم تشوف البت وتاخد راحتك عشان ما تقول غشيتونى بس هى بتنكسف تظهر عليك كدى ادينا مهلة نقنعا (دي طبعاً وهمة ساي)..!!

3.قبل ما يجى اليوم اليشوفك فيو العريس بحوالى أسبوع كدا (حسب شنات وشِّك) لفي من كوفير لي كوفير.. ومن صبغة شعر لي فرد ضهر.. وتنظيف طبلون ونتف شعيرات العيون وما تنسى شعيرات الرقبة التحت الدقن وما تقصري أبداً فى روحك (دا عريس يالمطرطشة وجا بعد وجع سنين )..!

4. لما يجى (مقطوع الطاري) خلى أخوك يكون معاك واقف جنب الشباك يضاري الضو عشان المسكين يخجل منه وما يشوف حاجة ويظهر المخبي.. وضو الشباك يبيِّن المندسِّي.. تطبيقاً لنظرية اللمحة ضبحه (ما تسألوني عن المثل دا أنا جبتو من وين..!).

5. اها بعد دا يجي أبوك داخل أكان حظك سمح العريس ح ينط فى راس ابوك وهاك يا بوس لامن يقرب يشفط مخوو.. وطوالي ح يسألو.. أها ياعمي العرس متين؟!!

6.بعدا الله يوفقك وما تنسينا من حلاوة العرس.. بس حسك عينك تقولى لى زول منو العلمك الكلام دا.. الحُسَّاد كُتااااااااار.. تجي وحده من اياهم تستعمل نفس الخطه ولساتكك تطير وتمشي بي عجل حديد بعد اك.!
تحذييييييييير
ابعدي من العجايز المتعلمات البلبسن الجزمه لون الشنطه الماشا مع الفستان.. ديل مصايب ودايرين خطط جهنمية أنا ما بقدر عليها..!
نصيحه
صحباتك ح يلاحظن التغييرات الحاصلة ليك اوووعك لسانك دا أبلعي وسرك خلي فى بير بطنك وإلا لساتكك ح تطير قبل العريس..!
منقوووووووول

تسلمي يا عسولة نصائح جميلة ومشكورة عليها

[البنيه]

لكيين برضو يا سلمي الوحده تضمن ولمن تكبر تكون ضامنه العريس وما تبدا رحلة البحث

[سلمي200005]

ها يابنات يديك العافية 56 رد انشاء الله يكون في واحدة سنارتها غمزت

[سماح البدرى]

دمك خفيف واسلوبك دمو عسل ...انشاء الله يارب عشان انا بالجد متضايقة من حكاية اي زول يسألك اها مافي جديد ..الجديد شنو...يارب جديد لكل الاخوات........ايامك ايامي احلامك احلامي في ربيع الدنيا منيات الهامي يا الذوقك عالي

[الهنوف]