اذا عرضت عليك جنسيه غير سودانيه هل تقبل؟؟؟

[سمارا]

بسم الله الرحمن الرحيم





اعزائي الكرام


اذا جاءتك فرصة انك تنال جنسية غير السودانية
اي بمعني اصح تتنازل عن الجنسية السودانيه مقابل غيرها

هل تقبل ؟؟

ولماذا تقبل؟؟

وما هو مردودك النفسي لهذا الامر ؟؟
وارجو من كل من يشارك يضيف لي شي بسيط ومهم؟؟

ماذا تعني لك كلمة الوطن ؟؟
هل هو الشعب ؟؟؟ام الارض ؟؟ ام الحكومه ؟؟

في انتظار ارئكم

و دمتم

[patshe]

والله ماعندي أي مشكلة ....
بس بشرط جنسية سعودية ........

[ست الودع]

اذا ما كنت سوداني كان وا اسفاي وا مأساتي وا زلي



قطعا لا اقبل،،،،،،،،،،،،،،،، ولو لم اكن سودانية لتمنت ان اكون سودانية


بلادي أنا
بلاد ناسا في أول شئ
مواريثهم كتاب الله ،
وخيل مشدود،
وسيف مسنون حداه درع،
وتقاقيبهم تسرج الليل مع الحيران
وشيخا في الخلاوي ورع
وكم نخلات تهبهب فوق جروف الساب
وبقرة حلوبة تتضرع وليها ضرع ،،،
وساقية تصحّي الليل مع الفجراوى..
يبكى الليل ويدلق في جداولو دمع
يخدر في بلادي سلام ..
خدرة شاربي موية النيل ..
تزرد في البوادي زرع
بلادي أنا بتشيل الناس وكل الناس
وساع بخيرها لينا يسع،
وتدفق مياه النيل علي الوديان
بياض الفضة في وهج الهجير بتشع،،،
بلادي سهول ،،بلادي حقول،،
بلادي الجنة للشـافوها ،أو للبرة بيها سمع ،،
بلادي أنا بلاد ناساً تكرم الضيف
وحتى الطير يجيها جيعان
ومن أطراف تقيها شبع ،،
بلادي الصفقة والطنبور ،،
وبنوتاً تحاكي الخيل
،يشابن زيي جدي الريل،
وشبالن مكنن في طريفو ودع ،،
بلادي أمان ،،بلادي حنان،،
وناسها حنان ،يكفكفوا دمعة المفجوع ،
يبدوا الغير علي ذاتهم ،
يقسموا اللقمة بيناتهم ،
ويدوا الزاد ،حتى إن كان مصيرهم جوع ،
يحبوا الدار ،
يموتوا عشان حقوق الجار ،
ويخوضوا النار عشان فد دمعة ،،
وكيف الحال كان شافوها
سايلة دموع ؟؟،،،،
ديل أهلى..
البقيف في الداره
وسط الداره
وأتنبر وأقول للدنيا ديل أهلي
عرب ممزوجة بي دم الزنوج الحارة..
ديل أهلي
ديل قبيلتي ، لما أدور أفصل للبدور فصلي..
أسياد قلبي والإحساس
وسافر في بحار شوقم زمان عقلي
أقول بعضى..
ألاقيهم تسربوا فى مسارب الروح بقو كلي
محل قبلت ألقاهم معايا، معايا زي ضلى
لو ما جيت من زي ديل..
كان ،أسفاي..
وآمأساتي..
وآذلي..
تصور كيف يكون الحال
لو ما كنت سوداني وأهل الحارة ما أهلي
تصور كيف؟

كلمات :اسماعيل حسن

& ست الودع &

[النجمة الحمراء]

اختى سمارا
لكى كل الود والاحترام
انا عن نفسى ما بقبل انى اخذ اي جنسية غير السودانية
تقبلى مروووورى

[سمارا]

ست الودع تسلمى اختى على الكلام الجميل

النجمه الحمراء نورتى يا غاليه

patshe شكرا للرد( شكلك ما مولود فى السودان)

[محمد الجعفرى]

لوملكونى الدنيا على ان اتنازل عن هويتى السودانيه والله لم ولن ارضى بغير هذا الدم السودانى الذى يجرى فى وجدانى

[رءوف]

والله ماعندي أي مشكلة ....
بس بشرط جنسية سعودية ........

اسمع فى السودان برضو فى سيارات زى الفى توقيعك دة ما تخاف

[مسلمة وافتخر]

سمارة يا عسل سلامات

انا عندى الجنسية السودانية والجنسية الفلندية

لكن اذا كان الشرط انى اتخلى على الجنسية السودانية مقابل الفلندية

لا والف لا

لانى حتى ولو مشيت المريخ حاكون سودانية المولد والجنسية

[ABOODY8]

شكرا على الموضوع

اقسم بالله
اقسم بالله
اقسم بالله
لن اقبـــل





وطني لو شُغلت بالخُلدِ عنه… نازعتني إليه بالخُلدِ نفسي

[صوفيا لورين]

جنسيه مع الجنسيه السودانيه بقبل لكن اني اتخلى عن جنسيتي دي ما بعملها
يسلمو ع الطرح الحلو

[البريئة]

اكيد لا انا بتشرف اكون سودانية ومستحيل
اقبل جنسية اخري

[بنت ملوك النيل]

بسم الله الرحمن الرحيم





اعزائي الكرام


اذا جاءتك فرصة انك تنال جنسية غير السودانية
اي بمعني اصح تتنازل عن الجنسية السودانيه مقابل غيرها

هل تقبل ؟؟

ولماذا تقبل؟؟

وما هو مردودك النفسي لهذا الامر ؟؟
وارجو من كل من يشارك يضيف لي شي بسيط ومهم؟؟

ماذا تعني لك كلمة الوطن ؟؟
هل هو الشعب ؟؟؟ام الارض ؟؟ ام الحكومه ؟؟

في انتظار ارئكم

و دمتم

وطني هو ناس بيتنا وعيلتنا و جيرانا شارع بيتنا ومدرستي وشارع المدرسة وصاحباتي ومحل الايسكريم ..... ايام الجامعة وشارع الجامعة وزملاء الجامعة.... سندوتش الفول والطعمية ...
وطني الكتاحة وريحة المطرة وشاي المغرب وصوت القمري في حوش ناس جدي الساعة 12 وقت حقيبة الفن...فطور الجمعة وصباح العيد ....و......و.....و...........

بلادي الصفقة والطنبور ،،
وبنوتاً تحاكي الخيل
،يشابن زيي جدي الريل،
وشبالن مكنن في طريفو ودع ،،
بلادي أمان ،،بلادي حنان،،
وناسها حنان ،يكفكفوا دمعة المفجوع ،
يبدوا الغير علي ذاتهم ،
يقسموا اللقمة بيناتهم ،
ويدوا الزاد ،حتى إن كان مصيرهم جوع ،
يحبوا الدار ،
يموتوا عشان حقوق الجار ،
ويخوضوا النار عشان فد دمعة ،،
وكيف الحال كان شافوها
سايلة دموع ؟؟،،،،
ديل أهلى..
كيف يمكن ان اختر وطنا" اخر ..؟!!

[وهج الخيال]

يمكن زمان لمن كنا صغار وما فاهمين شي ..وتربية الخليج كانت طاغية علينا .. كان ممكن نقول ايوه ممكن نتنازل .. عن وطن مابنعرف منو شي غير اسمو ..

لكن اسه اصبح مفهومنا للوطن اعمق .. ما بقى الوطن بس هو المكان البتعيش فيهو .. اصبح هو المكان الي ممكن يحتويك ويعتبرك جزء منو رغم بعدك عنو ..

رغم اني ما زرت السودان لكن بحس انو بيجري في دمي وبتنفس هواه..

[patshe]

اسمع فى السودان برضو فى سيارات زى الفى توقيعك دة ما تخاف

ياسيد:رءوف أنا ما بتكلم عن السيارات
أنا بتكلم عن المعيشة والله مابتخارج ....
والحوار لسع ماإنتها......

[patshe]

[quote="سمارا"]
ست الودع تسلمى اختى على الكلام الجميل

النجمه الحمراء نورتى يا غاليه

patshe شكرا للرد( شكلك ما مولود فى السودان




يا سمارا أنا لامولود ولامتربي ولاعايش في السودااااان
وتحياااااااتي........

[فتى السقاي]

مستـــحيل طبــعا ..!

[omar babikir]

تحياتي لك وللجميع وبعد لفه طويله في المنتدي وجدت ان هذا افضل موضوع لكي ابدا به مشاركتي

بالرغم من الاستياء الشديد من السودان ( ليس الوطن بالتاكيد) ولكني احس باني ولدت سوداني وسوف اعيش سوداني واموت سوداني....
اين اذهب بهذه اللهجة التي نطقت بها اول كلماتي وانا طفلا لم يعي شيئا...
اين اذهب من ذكرياتي في الابتدائيه ... ومن معلمي .. كيف لي ان ابدل بدفتر جديد مرحلة انتقالي من الطفوله الى المراهقة بالمدرسة المتوسطه وكل احلامي وامالي سودانيه ميه بالميه....
ولمن يفكر بالتخلى عن جنسيته اقول ....ستجد نفسك على الدوام الغريب في المجتمع ...الدخيل الوافد..
مواطن من الدرجه الثالثه وفي بعض الدول ربما ( بدون) ...
وطني السودان عنوان هويتي ومصدر الهامي ...ومستودع ذكرياتي ... وملاذي عند الشدائد

[رءوف]

ياسيد:رءوف أنا ما بتكلم عن السيارات
أنا بتكلم عن المعيشة والله مابتخارج ....
والحوار لسع ماإنتها......

باتشى مالها المعيشة فى السودان ومعيشة الخارج احسن من السودان بى شنو
قول سبل المعيشة هنا متوفرة اكثر من السودان واذا كنت فى السودان فى سبل معيشة برضو
بس مش زى هنا وبرضو انا ااكد ليك انك ح تتاقلم معاها
انت اتكلمت كلام عابر ومتاكد انا انك مش قاصد كدة وانا بس حبيت انصحك لو قبلت اهلا وسهلا ولو لا
انا اسف على المداخلة لانو كل انسان حر فى رايه وانا احترم رايك

[patshe]

باتشى مالها المعيشة فى السودان ومعيشة الخارج احسن من السودان بى شنو
قول سبل المعيشة هنا متوفرة اكثر من السودان واذا كنت فى السودان فى سبل معيشة برضو
بس مش زى هنا وبرضو انا ااكد ليك انك ح تتاقلم معاها
انت اتكلمت كلام عابر ومتاكد انا انك مش قاصد كدة وانا بس حبيت انصحك لو قبلت اهلا وسهلا ولو لا
انا اسف على المداخلة لانو كل انسان حر فى رايه وانا احترم رايك

سيد:رءوف كلامك في محلو بس تقول شنو ؟....!
متربي وعايش ومولود في البلد دي....وأنا متأكد لو مشيت السووووودان
ما حنتأقلم لو قعدنا سنين ......
وتحيااااااااتي....

[الدويحي 2]

لو كان الخيار هو ترك الجنسية السودانية مقابل أخرى فمستحيل أتنازل عن جنسيتي السودانية
أما .... فمرحباً بالجنسية الأضافية على أن تكون اروبية أو أمريكية ..
ياااااااااااااااارب جنسية أروبية عشان ألف العالم ده كلو