معاينة خريج

[ديامي وبس]

يا نادر قوم الليلة انته عندك معاينة دخل صوت الحاجة أم نادر من أذنيه كانه دي هائل وأخذ يقول يمة قايم بس لو نمت كامن شوية كدا وبعد أن اصبح لا مفر من الإستيقاظ نظر نادر لوجهه في المرآة بعد غيبة إستمرت قرابة الستة شهور لم يكن ينظر لوجه قط حتى أنه استغرب في بعض الملامح التي بدت عليه ومع السواك أخذ يتذكر تلك الأيام الجميلة - أيام الجامعة وشلةالدقيش والجماعةالباقين وآمال خريج بأن يتخرج ويتعيين دون كد أو عناء- والله يا ناس الواحد كان ما بفكر إنو يجي يوم ويتعين في وظيفة لكن الحمد لله ربنا سهل وحنمشي الليلة المعاينة وربنا يوفق غايتو، كان المعجون يخرج من فمه وهو يتمتم بكلمات غير مفهومة وما أن انتهى من السواك وشرب الشاي اخذ ينظر في الدولاب لقميصه الأبيض - بتاع المعاينات- والبطلون الواحد ولكن - أمك - ........
يمة البنطلون بتاعي وين؟؟ وهنا جاء صوت الأم وهي تكنس في الحوش " غايتو شوف أخوك أمس كان في رحلة مع أصحابو وجلجلت صرخة عالية البيت يا ......... البنطلون بتاعي وين؟ وهو متجه نحو أخيه وما أن نظر اليه وجده نائما والبنطلون في طرف السرير مكرفس تبدو عليه آثار معركة قوية في التغيير. أخذ البنطلون وقطعة موية لينة وقام بمسح البنطلون. ذهب الى محمد جاره حتى يعمل اللازم من حلاقة وخلافه وبعد التوضيب وسيجارة الصباح قاربت الساعة العاشرة والنصف جهز الفكة للمواصلات حتى لا تحدث مشادة بينه وبين الكمساري وحول رصيد بجنيه حتى أن التلفون إستغرب في الرصيد الدخل ده - فهو لم يعتاد الا المسكولات ولو بالغ رسالة - كان أو ل اتصال الى هاجر حبيبته يا هاجر خلاص أن حأشتغل ومن الفرحة لم تسع هاجر الأرض وصاحت أخيييييييييراً مبرووووووووووك يا ندوري. ومع وعود بالزواج اللمة بعد سنة بالكتير اختتم المكالمة.
الجزمة السوداء يمة لبسه منو؟؟؟
قاعد تحت السرير بتاع ابوك - قال انته ما بتلبسه وبقى يلبسه هو للشغل يا ولدي
ما بين المجاررات تلك انتهت نصف الساعة حتى وصلت الحادية عشر ظهراً فمواعيده الساعة اتناشر مع صديقه وأخيراً وصلا الى المؤسسة المنشودة مؤسسة المستقبل موظف يرتدي قميص قيافة وبنلون مكوي سيف نظر اليهم وسأل : على وين يا شباب؟؟
كان نادر من الدهشة طاشي شبكة قالمبنى زجاج والمكيف وكراسي جلوس وكمبيوتر أم كل تربيزة وموظفين يرتدون الكرافت لكن حمزة كان قد إعتاد الدخول في المحلات اللبش دي فأجاب ماشين للمدير العام .
هو المدير العام ده أي زول يجي يقول دايرو يمشي ليهو؟؟ انتو منو وموضوعكم شنو ؟؟؟
نحنه والله خريجيين جايين بخصوص إعلان الوظيفة الفي الجريدة دي - وأعطاه الجريدة،،،،
والله ده ما إعلان بتاعنا
وهنا جات شبكة نادر
قلت شنو ما اعلانكم كيف؟ وهم بضرب الراجل لكن في واحد قاعد قال ليه خليهم يخشوا
سكرتيرة تبدو عليها آثار الراحات ولون كده غريب
ايوة يا شباب اتفضلوا.
مرحب يا أستاذة انا نادر وده صاحبي جايين للمدير العام بخصوص إعلان الوظيفة ده ؟؟؟
ايوة اتفضلوا
كان المكتب يكفي لإقامة حفلة عرس مساحة يجري فيها الخيل ذي ما قال نادر
وبعد برهة فقط جاء رجل آخر شياكة قام نادر وسلم وأضاف والله يا سيادتك أن لي فترة داير اصلك ..
وقبل أن يتم نادر كلامه ...
هههههههه يا ولدي انا ما المدير
دايرين تشربوا شنو ؟؟؟؟
فاجابوا بعد أن تناولوا سندوتش طعمية - وافق في الحلق - دايرين عصير برتكان.
جاء المدير العام وعليه نظرة هيبة وقال مرحب يا أبنائي
ناوله نادر الشهادات وخلو الطرف من الخدمة وشهادة خبرة سنة من شركة صاحب أبوه وبعدين هو أول الدفعة وكده ............
نظر المدير ملياً
وقال
( دايرين زول قريبوا مسئول ).إذا كنت تعرف من هو نادر اخبرني