ياماما الناس فى شنو والحسانية فى شنو !!!؟؟؟؟؟

[mubark59]

ذكرت لكم أننى أستعمل الامثال كثيراً فى سياق كلامى فى المنزل !!! بنتا إسلام من مواليد 12 سبتمبر (الحمدلله زاغت بى يوم ) 1996م فى داخاو وبما أن عبدالعال دخل منتدى السقاى سوف أتحدث فى حلقات عن داخاو. ولدت فى داخاو وهى ضاحية تبعد عن ميونيخ 20 كيلو وكنا قد قررنا رغم إعتراض الاخ عبدالعزيز السلاوى على تسمية (إسلام بنتنا ) لان ولده كان إسمه إسلام فقلت له أن الاسم (جوكر ) إسلام بعد وضوعها ب7 شهور نزلنا السودان بعد غياب 6 سنوات متواصله وبعد أن رزقنا ثلاثة من الابناء بعد معاناه 5 سنوات بعد الزواج والحمد لله منّا علينا من فضله بالدعاء والصبر والعلاج (أعقلها وتوكل ) .عندما أصبح عمر إسلام خمس سنوات أنتقلنا الى بون وإسلام كانت وما زالت فصيحة اللسان وعربيها ما فيهو أى مشكله إطلاقاً (أسألوا منها الاخ عبدالعال كانت وهى صغيرة تقول له( أبدلدال) دخلت يوم فى نقاش فى العام 2001م وعمرها خمس سنوات فى موضوع لاأتذكرة ولكن أرادت أمها أن تصرفها من طلبها بذكر روايه لاعلاقه لها بالموضوع الاصلى وكانت تستمع لامها بتركيز وإنفعال وفى قمته النقاش ردت على أمها (يا ماما الناس فى شنو والحسانية فى شنو !!!!) فضحكنا وتغير الموضوع الى ضحك وسألتها أمها شنو العرفك بالمثل ده والحسانية ديل شنو فحكت القصه وقالت الحسانية كان عندهم سباق كلاب وجاتم قبيله تانية عندهم جمال ضايعة وسألوا الحسانية النجدة فقاموا الحسانية قالو ليهم والله نحنا ما فاضين أسع عندنا سباق كلاب فردوا عليهم (الناس فى شنو والحسانية فى شنو ؟؟ !!) فقلنا لها من أين لكى هذا قالت حكاهو لينا بابا قبل سنه وعجبتنى القصه وحفظتها ولان الموقف كان مطابق أستجبت لطلبها وطلبت من أمها أن تنفذ لها ما تطلبه لانها أجادت فى وضع المثل فى مكانوا . وأتمنى أن تجيد وتشترك معنا فى منتدى السقاى حتى لايطير منها العربى وتكون الناس فى شنو والحسانية فى شنو عندما تتحث فقط ألمانى وإنجليزى .

[الهنوف]

[نهـاد]

هههههههههههههه
والله بنت عسل مشاء الله
و ربنا يخليها ليكم يارب


تحيـــاتــــي

[الأسير22]

ههههههههههههههههه



ربنا يحفظها

[مها]

بنتك ماشاءالله عليها
ربنا يحفظها ويدوم عليها بالعقل النير

[أبعاج]

يقال إن المثل (الناس في شنو والحسانية في شنو) قد قاله خليفة المهدي الشيخ عبدالله التعايشي عندما قدم له نخبة من أعيان قبيله الحسانية- التي تسكن بضواحي الخرطوم – دعوة لتشريفهم بحضور وافتتاح سباق الحمير السنوي الذي كانوا يقيمونه مرة في كل عام ( والعاقبة عندكم في المسرات) ولسوء الطالع صادف سباق الحمير لدورة 1898م اقتراب طلائع الجيش الانجليزي المصري بقيادة كتشنر من عاصمة الدولة المهدية فلم يكن أمام خليفة المهدي إلا الإعتذار عن تلبية تلك الدعوة الكريمة من أعيان (نخبة) الحسانية . وأغلب الظن أن سباق دورة 1898م قد تم دون حضور أي ممثل رسمي للدولة المهدية ..

[السودانى الاصيل]

الروايه السمعتها والاقرب للحقيقه

اثناء حملة الدفتردار الانتقاميه والتى قام بها عقب حرق اسماعيل باشا من قبل المك نمر
اثناء ذلك كان الحسانيه فى سباق للحمير حيث كان المتسابق يركب الحمار بالعكس
بمعنى وجهه ناحية ذيل الحمار

شوف الناس اقتلو فيهم والموت شغال وهم بتسابقوا ولا عليهم
الناس فى شنو والحسانيه فى شنو