مادام انت سوداني لي بتنكر الفن السوداني؟

[Amru_2t]

بستغرب دايما لمن أمشي السودان ويبقوا الناس يسألوا فيني (( نتوا المغتربين بتسمعوا سوداني ؟؟ ))
دايما بضايق لمن أشوف واحد من اخوانا السودانيين و خاصة المغتربين المعانا بنكروا الفن السوداني وبعتبروا كلام فاضي وبميلوا للأغاني الغربية و بعضهم للراب العربي و طبعا دا موضوع تاني ....
المشكلة لمن تمر بيك مواقف بتدل على الواقع دا ... يعني الواحد يعرف كل شي عن مغنيين الغرب و يجهل الفنانين السودانيين ... صاح انو الفن السوداني ما واصل لكن برضو الواحد لازم يتمسك الزول لو شوية بي فنوا البعبر دايما عن عاداتو وتقاليدو...
وطبعا من أكبر المشاكل بقت تطلع أغاني الجيل الجديد الي بتعكس نظرة سلبية للفن السوداني ... ما تفهموني غلط أنا شاب و بسمع برضوا لأغاني انجليزية و لكن ما بنكر الفن السوداني ... و في طبعا موضوع انو أخوانا العرب بقوا ياخدوا فكرة غلط عن الغنى السوداني بي الفيديوهات بتاعة (( عصمان )) و الكلام الفاضي دا ..و طبعا في دور كبير للاعلام في الموضوع دا ... زبدة الموضوع انو بس كنت عايز أشوف رايكم شنو في الموضوع دا و لأنو حاجة بتأسر على مجتمعنا بالزات
وأتمنى أسمع ارآكم

[ملاك الورد]

سلامو
كلامك نايس
اولاد المغتربين و مشاكلهم الكتيره
اولا بتولدوا بره السودان و بعد عمر مديد برجعوا للسودان وطنهم
انا لمن كنت طفله كنت ما بحب افتح قناة السودان و لا اسمع سوداني و لااااا
زي كل اولاد المغتربين الفي عمري
لكن هنا بظهر دور الاهل
لو الاب و الام " الاتنين" واعين وثقفين "مش الاتنين متعلمين خريجين " المهم واعين
الاولاد بتربوا على الاطول و القي و تمسكين بهويتهم
اصلا الماعنده اساس و اصل و هويه و ماضي " ما عنده مستقبل ولا وجود"
دي المشكله اغلبية اولاد المغتربين فاقدين هويتهم
في فترة الطفوله شخصية الانسان بتتبني عشان كده مفروض الاهل يثبتوا لاولادهم هويتهم


لكن لمن تلقى الام زاتها " و هي صاحبة اكبر تاثير على الطفل" تقول ليك " انا ما بدر على السودان و الحركات دي!" تتوقع الولد يطلع يقول شنو؟؟؟
المهم بعدين لمن يكبروا حيحسوا بالفراغ بتاع الهويه و يرجعوا يسمعوا سوداني او يفضلوا بدون هويه كده دايما
اما الوهم " عصمان ده" صراحه شوه صورة الفن السوداني مع انه حاول ينقل الثقافه لكن ما اختاروا الصوره الصح
نحن ما بنتكلم كده بطريقته الغريبه دي ....
و لك تشكراتييييييي

[Amru_2t]

شكرا على ردك يا ملاك و كلامك صحيح 100 100 و أتفق معاك انو الأهل ليهم برضو وبحب أضيف انو المجتمع المحيط برضو ليهو دور كبير
كلانا في الهوا سوا ... و يا حلييييلنا !!

[ود الزوحي]

الموضوع يا أخ عمرو .. كلو عبارة عن فترة زمنية لا أكتر ..

بعد ما الشباب (المغتربين) يرجعو للتأقلم مع الوسط السوداني .. أكيد إنهم حيتأثروا بالثقافات السودانية ..

يعني ما تتضايق .. المسألة عايزة شوية وقت .. لا أكتر .. ومافي حاجة اسمها انكار للثقافة السودانية



تحيااااااااتي

[وجهة نظر]

والله كلامك سليم .. الهويه السودانيه بقت مفقوده نوعا ما في الشباب السوداني بسبب دور الاهل وتاثر الشباب بالقنوات الفضائيه

لكن الغريب شايف ان غلب الردود بتتكلم عن اولاد المغتربين بس ... بالعكس انا شايف ان حتى شباب السودان بقى بيميل للغناء العربي وبالتحديد بنات الجيل الحالي المقيمات في السودان غالبيتهم بستمعوا للاغاني العربيه دون السودانيه ... يمكن يكون الاولاد نوعا ما محتفظين بالفن السوداني

تسلم على الموضوع

[Amru_2t]

والله أنا شايف انو حالة المغتربين شاذة شوية لأنو ما عندهم أي علافة بالمجتمع السوداني ... المهم نأمل انو يتصلح الوضع و يبقى السودان فوووووق بشبابه !!

و شكرا على مشاركاتكم يا جماعة :]