الغناء الهابط والغربة

[ود ابو شام]

سألني أحد أصدقائي ذات يوم لماذا تستمع لهذه الأغاني الهابطة، فقلت ليه أنني استمع لها بفهم معين ، قال لي ما هو: قلت له نحن في غربة
والغربة كما يعلمها الجميع من اكتوى بنارها ومن سعد بالفرار منها ، تحمل في طياتها كل معاني الشجن والحزن والخوف والترقب والبعد من الأهل والأصدقاء ومن تراب الوطن الغالي،، فهي تأخذ منا الكثير ولا اعتقد أنها تضيف لنا ما يساوي أو يعادل ماتأخذه منا ، عموما نرجع لي موضوعنا
قلت ليو : يا خ إحنا في غربة وأنا هنا ما بسمع طول الوقت أغاني فيها معاني جميلة ومؤثرة وضربت ليو مثل، قلت ليو لمن اسمع ( فات الأوان ما قادر اصدق إنو نحنا آآآآه نحنا نحنا أوانا فات) بتقطع من جواي وبتألم شديد ، مازي لمن اسمع ( مغرزة إنتو سيبو المغرزة راجل المرة حلو حلا)، ولمن اسمع ( حاول يخفي نفسو وهل يخفى القمر .... طبعا لا شفناهو شفناهو) تديك إحساس بالأصالة في الحب، والحبيب البحاول يخفي نفسو
من الناس مازي الحبيب البجري جري لمن يدق الباب( جريت ليو حفيانة.... ماقصدي الخيانة)، ولمن اسمع ( بخاف اسأل عليك الناس سر الريدة بينا يذيع,,) تحس فيها بمعاني التربية الأصيلة المبنية على الحياء والحياء صفة يفترض إنها للمرأة وللرجل ، مازي ( امو ما راضية بي اتحداها .... واجيب قسيمة شرعية) جسارة وتحدي وكسر لكل تقاليد مجتمعنا السوداني الجميل،،،،، والأمثلة كثيرة:
الخلاصة: رغم سلبيات سماع مثل هذه الأغاني لكن قناعتي كانت في ذلك الوقت، أن الاستماع للأغاني السودانية الأصيلة يثير في الإنسان نوعاً من الحزن والشجن الذي ينعكس سلبياً على
العمل وعلى الاستقرار النفسي والعاطفي ، وأوضحت لصديقي أنني استمع لهذه الأغاني لأنها لا تحرك في دواخلي شيئاً ، بل العكس تماما فأنا استطيع أن اخرج من الأغنية وأعود
لها دون أن أحس بفقدان معنى أو قيمة جمالية ، ويمكنني في أي لحظة أن أغلق المسجل دون تردد بعكس الطرب الأصيل الذي تحس أنه يقيدك ولا تستطيع الهروب منه حتى عندما تصل إلى محطتك الأخيرة...
أتطلع إلى سماع آرائكم،،،،
ودمتوم سالمين

[العسوله]

لااستطيع التعقيب بعد كلماتك الرائعه يا ود ابو شام
وكل تفسير انت قلتو
بس بالله شوفو الفرق فظيع كيف......دي خايفه الريده تتذاع ودي بتجري للمحاكم عشان تعرسو
تحياااااااااتي لك ياود ابو شام

[كيمو]

يا ود ابو شام ما تنسي ( يا خاينه يا خاينه يا خسيسه خيانه ظاهره)
والله العظيم كلامك في محلو نحن غير مني القوز وتغريد العشره
ما بنشغل زول ومشكور علي الموضوع الهادف وتسلم يا رائع

[أميرالجعلي]

ههههههههههههه
ابداع اخي ودابوشام بعدك الكلام انتهي

تحياتي

[جذاب وما كذاب]

هههههههههههههههههههه
والله يا ود ابو شام كلام زي الدهب
وزي ما قال ليك كيمو
الهجيج مدور والعـــــــــــــــــــــزه فوق
عليك الله مالنا ومال الهم
يا زول العربيه وراجل المره وناس الشمار لمو ...والخ من الكوكبه الفريده
شفته ديل ما بقيفوا في البيت دا بقي زي دكان الغسال
كيمو 24 ساعه ضاخي ورافع ياياتو
خلينا نهجج يعني نبقي في غربه وسهر وقهر وفراق اهل نموت ساي حسره

[ابراهيم الجيو]

[quote="ود ابو شام"]( جريت ليو حفيانة.... ماقصدي الخيانة)،

[/quote]




جرييت ليهو حفاييينة ،،،،

وما قصدي الخيانة،،،

عايزة يقيــــــــــــــــــــــــــل معانا،،،،،


هاااااااااا ود أب شام:D

الصفقة وين،،،،،،

[ودالدرديري]

جرييت ليهو حفاييينة ،،،،

وما قصدي الخيانة،،،

عايزة يقيــــــــــــــــــــــــــل معانا،،،،،


هاااااااااا ود أب شام:D

الصفقة وين،،،،،،

انت كمان بتسأل الصفقة وين ؟؟؟

في مخرج 18 ياحنين

[سودانية صريحة]

صح لسانك ياود أبو شام.

[أبعاج]

الصفقة وين ؟؟؟