الاستيكة

[سلمي200005]

بتصرف
قال ليك محمد كان في المكتبة.. قعدت جنبو بت حلوة.. قالت ليهو "تسمح؟" و
شالت منو الإستيكة قبل ما يرد.. و ختتها فوق منديلها و جاء الهواء كفى المنديل
على الإستيكة.. فقامت شالتها جوة المنديل جوة شنطتها و مشت الكافتيريا
وجات راجعة.. فقال ليها
قال تسمح؟
و كيف يا الحلوة ما بسمح؟
أصابعي العشرة تكتب ليك
و قلبي أبقيه إستيكة
عشان بس للغلط يمسح
يذوب بين أصبعين حلوين
يتوه وسط السطور يسرح
و لمن تنتهي الكلمات
يخش الشنطة في منديل
و نمشي القهوة نتفسح
و صار عاشق يطيع سحرك
يجيب الفانتا شان أمرك
تختي الشنطة في حكرك
وقلبي الدايش وسط منديلك
يسكلب ساي يقول يا ليل
و جوة الشنطة يتمرجح
و ترجعي تاني يا الحلوة
و أكون راجيك هناك مصلوب
أشوف الناس طشاش في طشاش
و أقرأ سطوري بالمقلوب
تقعدي
و أعاين ليك.. تغمضي إنتي
تعايني لي.. أغمض أنا
و أعاين ليك.. تغمضي إنتي
تعايني لي.. أغمض أنا
نعيد الكرة من أول
و أعاين ليك.. تغمضي إنتي
تعايني لي.. أغمض أنا
و أعاين ليك.. تفري البسمة
تضوي سنة
أحك راسي
و أبلع ريقي
و أتنحنح
و أجر الكرسي لي قدام
و أرجعو تاااني و أتزحزح
و أقول للسمحة لو تسمح
ممكن كلمة في زاوية؟
تقول بسمح
تقوم السمحة تتلمم
و تتبسم
و أنا أتراجف.. و أتخمخم
و أقوم أفرح
و أدق الجيك
و أطق روري
و أرمي الكرسي.. أوب سوري
و أقع في الجنبي.. أوب سوري
و أدقش الماشي.. أوب سوري
و جنب السلم.. أوب سوري
هناك في الزاوية نتقعد
و أستغفر.. و أتشهد
و أشيل أنفاسي.. و أتنهد
و أقول ليكي
والله
و غايتو الزول
و الحاصل
و في الواقع
و ما عارف
هه ما قادر أقول ليكي
تقول لي
هي يا دا
و فيها شنو
و معانا منو
و يخسي عليك
و قول يعني
هه ما تخجل.. و تتعقد
أنا أتعقد؟؟؟
أجر الكرسي
أزيد الخمسة تدليكة
و أقول ليها
وبي صوتا ندي و رايع
يفيض رقة و مزيكه
من فضلك
و أترجاك
ترجعي لي الإستيكة

[سلمي200005]

ممشكوووووور والله يعطيك الف عافيه

[ود الزوحي]

يابت استيكتيك سمحة عديل ..

تسلمي ..

[نهـاد]

هههههههههههههههه
دا كلو عشان يقول ليها ترجعي أستيكة
اها لو شالت القلم بحصل شنو


لكن جد أبداع مشكورة
تحيــــــاتـــــــــي

[ملاك الورد]

هههههههههه
ده لو بقى شي من الاستيكه
و مشكوره

[أبوالمطارق]

سلمى ممكن مداخلة واستأ1ن : كل شئ إتمسح لم يبقى لى حتى التعليق؟

[مها]

ابدعتى والله يا سلمى حلوه

[مجنون جدا]

عصيدة حلوة .. أأأأقصد قصيدة حلوة
ودينا من راسك وللا كراسك ؟؟؟؟

[تنبش]

مشكور على القصيدة
لكن الاستيكه بالغت
الطلعت الكلام ده كله
وان شاء الله الشالت الاستيكه تكون ما بتشبه الاستيكه

تقبل مروري

[رحـــال الشمـــال]

مشكورة ياسلمى على الاستيكة
لأنو موضوع ظريف صراحة

وللأمام تقبلي مروري

أخوك: رحـــال الشمـــل