الفار وقف.....
جنب القفص ...
سافر خيالو سرح بعيد
لو اكرمو رب العباد
جكسوية واحدة من الجداد
يتزوجا .. ويعيش سعيد
تكفيهوا لا شركاً يصيدو
ولا كديس
تحميه من حظو التعيس
فطورو بيض
وغداهو بيض
وعشاهو بيض
أحلامو بيض
صاحبنا ما اتردد وقال:
قال لي الجدادة تعالى جاي
انا عندي ليكي كلام كتير
قالتلو هاي يالفار اخوى
انشاء الله خير
قال ليها خير
بس منكسف
قالتلو قول ما تنكسف
الفار رجف
طقطق اصابعينو ووقف
قال للأسف
انا ما بقول
احساسي وضاح
ومشاعرى ما عايزة الفضول
الجدادة استغربت
اتنفضت واتهوززت
قاتليهو
ياخ ما تقول يا فار
صاحبنا قام
قال ليها طمعان في الجوار
الجدادة اتدللت
قاتليهو هيي ما انت جار
الفار سرح
راح الكلام منو ووقع
قال لي الجدادة بلاش دلع
لو جاكي فار طالب القرب
طالب ايديك
طالب الغرام من مقلتيك
رايك شنو؟
قاتليهو اييييييييييك
ما يسمعك في الحلة ديك
الفار كضم شم الوضع
شتت مشى
وعيونو من كتر الزعل
ما شايفة حاجة مطششة
ومشاعرو كيف متخربشة
حرد الفطور
حرد العشا
ورسم على جدار الزمن
صورة الجدادة ونقشها
وقال الجدادة قست علي
وعملت علي متحنكشة
باكر بعرس فاره
تمسح دموعي تقشقشها
[size=5]ههههههههه
والله حلوه منك شديد يا ام صبا
هو الفار ده ما سمع بالمثل البيقول مد رجلك على قدر لحافك
وبعدين العين بصيره والايد قصيره
لكن هو يستاهل عشان تاني ما يشطح بعيد كده
وتقبلي مروري يا غاليه[/size]
والله دا فار شجاع واترجل وقال ليها امكن اكون لوقالا لي فاره كيف ؟؟
تقول ليه تجكس جداده ما اصلو الجداد طبعو الجشع وما داير قرابة
انت البراك مشيت تهابش وتنكسر تستاهل ضرب بي قوه وصلابة
اصلو الفيران اتكملت مانحن ليك نديك الحنان بي رقة وطراوة
سيب العناد وتعال براك لا تنسي اهلك وديرتك وكل الصبابة
سامى عادل كتب:والله دا فار شجاع واترجل وقال ليها امكن اكون لوقالا لي فاره كيف ؟؟
تقول ليه تجكس جداده ما اصلو الجداد طبعو الجشع وما داير قرابة
انت البراك مشيت تهابش وتنكسر تستاهل ضرب بي قوه وصلابة
اصلو الفيران اتكملت مانحن ليك نديك الحنان بي رقة وطراوة
سيب العناد وتعال براك لا تنسي اهلك وديرتك وكل الصبابة
احييك والله على الدرر التي تكرمت بها والى مزيد من التقدم
